文／劉菊英
桃園龍潭客家人，客語文薪傳師、社大講師、國小客語先生（四縣腔）
𠊎个發展比一般細人慢，在班項總是最尾一名（鷝瀝屎），這係𠊎一年生个故事。
放學前，先生个面挷挷、目䁯䁯仔緊叮囑：「天光日愛考試，大家轉去愛多看書，做毋得淨知好搞！」同學隻隻煞猛頷頭，齊聲共下應講：「知啦！𠊎兜知了，一定會用功！」話一講煞，大家共下講「先生恁仔細，正來尞！」就相賽走到尾瀉屎。
𠊎盡驚分先生打，因為世大人有規定，先生打一下，轉來還愛加打一下。故所天光日愛考試，就有重鈂鈂个煩勞。轉到屋下，𠊎乖乖拿出課本，煞猛牯緊看。看了盡久，還係看無半滴，書項个字像天書。愛仰結煞正好哪！𠊎越想越煩勞，就去問同學阿珮。阿珮聽了𠊎个煩惱，額皺皺仔講：「𠊎乜無把握，𫣆共下來去問排長看啊仔。」𠊎兜就共下去尋排長，將這隻重鈂鈂个煩惱全講分佢聽。排長行來行去愐有一下仔，目珠忽然擘金，拍手講：「啊！有了！𫣆兜共下來去伯公廟拜伯公，請伯公保佑𫣆兜考試順利！」
𠊎講：「𫣆無牲儀又無供品，愛仰般拜呢？」排長盡精靈，一下就拿出主意：「阿英，妳最會跋樹仔，妳去摘幾隻朳仔；劉珮去尋幾垤瓦析來做盤仔；我去挷幾頭山紅菜來做牲儀！」講做就做，𠊎兜分頭去做：𠊎蹶上樹頂摘朳仔，劉珮去尋瓦析，排長去挷了幾頭山紅菜。無一下仔，𠊎兜就帶等「牲儀」，遽遽走到細伯公廟前，歡喜靂天。排長將山紅菜擺在瓦析項，又將朳仔放到好勢好勢，雙手合掌虔誠準備祈求。
𠊎看著該又細又硬个朳仔，忍毋核講：「這兜朳仔細又硬，伯公恁老，敢怕無牙齒好咬朳仔了。」三儕人你看𠊎，𠊎看佢，嗄忍毋核笑出來。𠊎提議講：該無𫣆來同伯公先咬較細垤兜！」三隻細嘴空一口接一口將朳仔咬做細細仔，正過細心細意放轉瓦析項。接等，𠊎兜誠心同伯公講：
伯公、伯公，請您保佑𠊎兜天光日考試順利，乜愛食𫣆兜咬好个朳仔，雖然有一點仔口水，毋過𠊎兜係驚您咬忒硬，牙齒咬跌下來！」講煞，三儕人都笑到軟怠怠。該日，𠊎兜帶等虔誠又盡有盼望个心轉屋，心肝肚想：有伯公保佑，天光日个考試一定做得順利過關！
華語
我的發展比一般小朋友慢，在班上總是最後一名，這是發生在我一年級的故事。
放學前，老師非常嚴肅的臉、凶巴巴的眼神叮嚀我們：「明天要考試，大家回去要多看書，不要只知道玩！」每位同學都猛點頭，齊聲說：「知道！我們知道了，一定會用功！」話說完，大家一起說「謝謝老師，老師再見！」一溜煙全跑光了。
我非常害怕的就是被老師打，因為長輩有規定，老師打一下，回來還要加倍打。明天要考試，我有沉甸甸的煩勞。回到家裡，我乖乖拿出課本，努力地讀。看了很久很久，還是看不懂，書上的字就像天書。要怎麼辦才好？我越想越煩惱，就去問同學阿珮。阿珮聽了我的煩惱，皺起眉頭說：「我也沒有把握，不如我們一起去問排長。」於是我們一起去找排長，並將重擔般的煩惱全都說給她聽。排長聽了來回踱步好一回，突然眼睛一亮，拍手說：「啊！有了！我們一起去土地公廟拜土地公，請土地公保佑我們考試順利！」
我說：「我們沒有牲儀又沒有供品，要怎麼拜呢？」排長非常聰明，一下就拿出主意：「阿英，妳最會爬樹，妳去摘幾顆芭樂；阿珮去找幾片破瓦片來當盤子；我去拔幾顆山紅菜來做牲禮！」說做就做，我們分頭去做：我爬上樹去摘芭樂，阿珮去找破瓦片，排長拔了幾顆山紅菜。一會兒，我們就帶著「供品」，趕緊跑到小土地公廟前，歡天喜地。排長將山紅菜擺在瓦片上，又將朳仔擺得整整齊齊，雙手合十敬虔的準備祈求。
我看著那又小又硬的芭樂，忍不住說：「這些芭樂又小又硬，土地公這麼老，恐怕沒有牙齒可以咬芭樂了。」三個人你看我，我看她，忍不住笑了起來。我提議：那我們一起先幫土地公咬小塊些！」三個小嘴巴一口接一口將芭樂咬成小塊，再小心翼翼放回瓦片上。接著，我們誠心和土地公說：
土地公、土地公，請您保佑我們明天考試順利，也要吃我們咬好的芭樂，雖然有一點仔口水，不過我們是怕您咬太硬，牙齒掉下來！」說完，三個人都笑到軟趴趴。那天，我們帶著虔誠又非常有盼望的心回家，心裡想：有土地公保佑，明天的考試一定可以順利過關！
