文／徐佳妤，屏東麟洛人，歇新北市，客語薪傳師、客語支援教師（南四縣腔）
「噹噹噹噹！」當晝咧！好食晝吔唷！做得放冗吔，教吔一朝晨个課，總算做得歇睏一下，俗話講「食飯皇帝大」遽啊去餐廳舀香噴噴个營養午餐。
食等這營養午餐，腦膈肚愐起四十零年前，𠊎正讀小學，該時無營養午餐，見到十二點，鐘聲一響，就共快下梯排去校門口等阿姆送飯包來，吾姆無論好天抑係落雨，佢都會同飯菜裝好，赴十二點進前擐等飯包來學校。
為了準備歸家人个飯包，愛買菜、洗菜、炒菜，還愛每日變化菜色，對阿姆來講，正經蓋辛苦！到了高年級，𠊎決定在學校蒸飯，先生分𠊎等蒸飯牌，牌仔个數字代表自家飯包个號碼，有分上、下學期，牌仔兩片有細空做得串棉索仔。
一到暗晡，阿姆開始無閒洎杈，𠊎最好食阿姆个手路菜──貼肉丸，食夜个時節，菜一上桌，大家先裝便飯菜到自家个飯包，繫好蒸飯牌再囥入冰箱。該年代个學生仔，一打早到學校个第一件事情，係同飯包拿出來放入大鐵盒仔肚，第二節下課，值日生會同大鐵盒仔㧡去蒸飯箱蒸，等到第四節下課又㧡轉教室放在講臺項。
記得有一擺，好衰毋衰，吾飯包毋知分麼人拿走咧，仰仔尋都尋無，雖然每隻飯包都有繫蒸飯牌，毋過大家个飯盒仔形仔都差毋多，總會有糊塗仙添放核自家个號碼。𠊎面臭臭仔投先生：「麼人拿毋著飯包？」
先生一講煞，一陣肅恬，該時阿華食倘剔（註1），聽著先生在該問，再過看等自家食个飯包，嚇出一身冷汗，蓋像拿毋著吔！佢緊爪頭那毋知愛仰結煞正好？「壞勢啦！毋堵好拿著若飯包，𠊎毋係特事（註2）个，你食吾飯包，好無？」𠊎眼扁扁仔（註3）看等恁傪菜个飯包，嗄分同學食到會無吔，心肚閼拶（註4）到一句話都講毋出來。
這「蒸飯牌」分𠊎愐起，弄擺人人帶飯包个生趣回憶，對政府推行「營養午餐」政策以來，帶飯包个學生仔緊來緊少吔，屋下人乜毋使恁無閒去準備。今嘎，食等這豐沛个營養午餐，除了感謝營養師、廚師、監廚志工以外，𠊎等還愛「座食莫座爽」同飯菜食淨淨，乜毋好折福哦。
（註1）倘剔：音tang ti，正在做某件事。
（註2） 特事：音ti sii，故意。
（註3）眼扁扁仔：音ngianˋ bienˋ bienˋ eˊ，眼巴巴地不甘心又無奈的樣子。
（註4）閼拶：音adˋ zadˋ，心情鬱悶。
華語
「噹噹噹噹！」中午了！可以吃午飯了！可以放鬆了，教了一早上的課，總算可以休息一下，俗話說「吃飯皇帝大」快去餐廳舀香噴噴的營養午餐。
吃著這營養午餐，腦中想起四十多年前，我讀小學，那時沒有營養午餐，每到十二點，鐘聲一響，就趕快下樓梯去校門口等母親送便當來，我母親無論晴天或下雨，她都會把飯菜裝好，趕十二點前提著便當來學校。
為了準備全家人的便當，要買菜、洗菜、炒菜，還要每日變化菜色，對母親來說，真的很辛苦！到了高年級，我決定在學校蒸飯，老師給我們蒸飯牌，牌子的數字代表自己便當的號碼，有分上、下學期，牌子兩端有小孔可以串棉繩。
一到晚上，母親開始忙碌，我最愛吃母親的手路菜──甩肉丸，吃晚餐時節，菜一上桌，大家先裝好飯菜到自己的便當，綁好蒸飯牌再放入冰箱。那年代的學生，一大早到學校的第一件事情，是把便當拿出來放入大鐵盒仔裡，第二節下課，值日生會將大鐵盒仔抬去蒸飯箱蒸，等到第四節下課又抬回教室放在講臺上。
記得有一次，好死不死，我的便當不知被誰拿走了，怎麼找都找不到，雖然每個便當都有繫蒸飯牌，不過大家的飯盒仔形狀都差不多，總會有迷糊蟲忘記自家的號碼。我臉臭臭地跟老師告狀：「誰拿錯便當？」
老師一說完，一陣鴉雀無聲，那時阿華正在吃，聽到老師問，又再看著自己吃的便當，嚇出一身冷汗，好像拿錯了！他一直搔頭不知如何是好？「不好意思啦！不小心拿到你的便當，我不是故意的，你吃我的便當，好不好？」我不甘心又無奈看著那麼豐盛的便當，卻被同學吃到見底，心情鬱悶到一句話都說不出來。
這「蒸飯牌」讓我想起，以前人人帶便當的有趣回憶，從政府推行「營養午餐」政策以來，帶便當的學生愈來愈少了，家人也不必那麼忙碌去準備。現在，吃著這豐盛的營養午餐，除了感謝營養師、廚師、監廚志工以外，我們要「寧可吃掉也不要浪費 」將飯菜吃乾淨，也不能不惜福哦。
