文／余景有，東勢客家人，這下戴石岡（大埔腔）

避暑尞涼撇，開學無幾久，朝脣頭行路去學校，行到橋項斯鼻著清香个氣味，這係白鶴花个花香味，乜係八月半个味瑞。

八月半个暗晡頭愛拜月光，阿姊招𠊎去細河壩拗白鶴花，拗三四枝轉去，尋一隻玻璃盎，裝淰水插落去。食夜了後，阿爸擎一張桌去禾埕，阿姆準備月光餅、柚，還有該盎白鶴花。

月光對山背慢慢跋䟘來，吾等細人喊：「月光出來咧！」當圓！當大！阿爸笑笑喊：「來拜月光！」大家圍在桌脣項，拜月光、食月光餅、擘柚、戴柚帽，還搞囥人尋，搞到歸山肚都係吾等个笑聲。吾等細漢時，阿爸驚細人吵，啦歌哩曲，佢老个時，顛倒愛熱鬧，過年過節希望世細轉去看佢，大家共下過節，佢斯當歡喜。

兩年前有一日，阿爸睡當晝，愛䟘來屙尿，無細義跌倒，頭那磕地泥，「砰 」已大聲，阿姆嚇醒，阿爸疾著目汁緊跌，送到病院檢查，先生講腦出血當危險，入院兩個零月，八月半前一日，病院發出病危通知，吾等遽遽去病院，厥个滿妹堵好在日本尞，聽著這壞消息，乜遽遽飛轉來台灣。

看著阿爸戴緊氧氣落，敨氣當大聲，吾等心肝肚實在毋盼得佢受苦，八月半下晝滿妹轉到台灣咧，二姊講：「今晡日係八月半，來買一盒月光餅，同阿爸共下過八月半。」月光餅送來病院个病房，七個世細同阿姆圍在阿爸脣項，逐個人同阿爸講勞瀝佢个話，目汁含緊，食月光餅，實在當苦，該盒月光餅堵好有九粒，吾屋家九個人，一粒代表一個人，一家人團圓。

雖然阿爸無法度同吾等講話，毋過𠊎相信，佢使得聽著吾等講个話，也感受得著大家對佢个愛。農曆八月十六朝脣七點外，阿爸轉到屋家，佢目珠打開看看屋肚，無幾久佢就跈佛祖行咧。𠊎想阿爸擇八月十六走，係佢無希望分吾等過艱苦傷心个八月半，阿爸實在當偉大！

八月半月圓人團圓，該年係阿爸盡尾个一個八月半，厥个人生圓滿咧！八月半个味瑞，毋單淨係白鶴花个香味，乜係阿爸留分吾等一世人難忘个愛同思念。

中秋節

暑假結束，開學沒多久，早晨走路去學校，走到橋頭就聞到清香的氣味，那是野薑花的香味，也是中秋節的味道。

中秋節的晚上要拜月亮，姊姊找我去河裡採野薑花，採三四支回家，然後再找一個玻璃瓶，裝滿水插進去，晚餐過後，爸爸搬一張桌子到庭院，媽媽準備月餅、柚子，還有這瓶野薑花。

月亮從山背慢慢地升起，我們小孩子喊：「月亮出來了! 」很圓！很大！爸爸笑笑喊：「來拜月亮！」，大家圍在桌旁，拜月亮、吃月餅、剝柚子、戴柚帽，還玩抓迷藏，玩得整個山裡都是我們的笑聲。我們小時候，爸爸最怕小孩子吵，但當他老的時候，卻愛熱鬧，過年過節，希望孩子能回去看他，大家一起過節，他就很開心。

兩年前有一天，爸爸睡午覺要起來上廁所時，不小心跌倒，他的頭著地，「砰 」很大聲，媽媽嚇醒，爸爸痛得眼淚直流，送到醫院檢查，醫生說是腦出血很危險，住院兩個多月，在中秋節的前一天醫院發出病危通知，我們趕緊去醫院，他的小女兒正好在日本旅遊，聽到這個壞消息，也趕緊飛回台灣。

看到爸爸戴著氧氣罩，呼吸非常大聲，我們實在心裡很不捨他受苦，中秋節的下午小女兒終於回台灣了，二姊說：「今天是中秋節，買一盒月餅和爸爸一起過中秋節。」月餅送到醫院的病房，七個小孩子和媽媽圍繞在爸爸的身旁，每個人都和爸爸說感謝他的話，眼眶含著淚水，吃著月餅，實在很苦。那盒月餅正好有九顆，我們家有九個人，一顆月餅代表一個人，一家人團圓。

雖然爸爸無法和我們說話，不過我相信，他可以聽到我們說的話，也感受得到大家對他的愛。農曆八月十六，早上七點多，爸爸回到家裡，他眼睛睜開環顧屋內，沒多久他就跟著佛祖走了。我想爸爸會選擇八月十六走，是因為他不希望讓我們過一個難過傷心的中秋節，爸爸實在很偉大！

中秋節月圓人團圓，那年是爸爸最後的一個中秋節，他的人生圓滿了！中秋節的味道，不單是野薑花的花香味，也是爸爸留給我們一輩子難忘的愛與思念。