文／黃麗芬，苗栗客人，現下戴臺北市，現職係客語薪傳師、客語教學支援先生（四縣腔）
「頭家，珍珠乳茶一杯。」買个時節，𠊎看著店前个品牌理念：「毋係逐粒粉圓，都做得安到珍珠。」平平都係粉圓，放入滾水肚煮，無麼个差別。毋過，火愛開到堵堵好、時間愛罅，糖膏乜愛慢慢仔收入味，正做得變成承牙餳人个珍珠。𠊎心肝肚想：「人，敢毋係恁樣？」該央時，𠊎想著渠之先生……。
「先生，這段論文，𠊎改好了。」渠之先生收著學生仔个論文，一頁一頁詳細看。過無幾久，佢指等其中一段講：「這位，還愛修正！」學生仔無奈何講：「這篇改當多擺了呢，仰還……」渠之先生細聲講：「改，毋係尋若麻煩，係愛分論文有你自家个想法。」
有人問：「渠之先生，仰會恁嚴？」𠊎想，愛對厥个求學經歷講起。頭擺，渠之先生修聲韻學个課，淨有七儕人，厥先生係大家講个大名鼎鼎个「嚴羅王」[1]。該央時，流傳一句笑話：「嚴羅王開當店。」大家淨聽著就青驚摝天，還吂考試就先愁。
毋過，就因為有壓力，七儕人更加煞猛，共下讀書、討論問題，一遍又一遍，落尾全部順利通過。到今，渠之先生還記得个，毋係驚分「嚴羅王」當忒，顛倒係共下打拚个情分。原來，嚴條無一定係傷害，還會帶來成長个力量。
這下，渠之先生自家做先生了，乜用共樣个標準要求學生仔。識有學生仔利用別人个論文，字一隻一隻照等打，再過修改兜仔內容，就想愛變做自家个作品。渠之先生請佢重新修正，因為佢知：「寫論文，淨這擺；誠信个態度，斯係一生人个大事，比該張畢業證書還較重要。」
到這下，𠊎正知：好先生，乜係恁樣一步一步磨出來个。當時，佢在嚴羅王个教導下訓練；今晡日，換佢教學生仔，毋係挳字眼、揀揀擇擇，係愛分學生仔行正路、走較遠。客人講：「食果子，拜樹頭；食米飯，拜拳頭。」學生仔敬重渠之先生，毋係因為厥要求少，顛倒係因為佢揢緪原則，真心守顧學生仔个未來。
毋係逐粒粉圓，都做得安到珍珠；毋係逐個先生，都做得變成學生仔心肝肚个珍珠。正經个好先生，毋驚時間个考驗，用一生人个心血，慢慢仔煮出一粒又一粒承牙餳人、入味好食个珍珠。
註釋
［1］「嚴羅王」：因為先生姓羅，平常時對學生个要求嚴格、治學認真，學生私底下講笑喊佢「嚴羅王」。「嚴」係嚴格之意，「羅」係先生个姓，偎音「閻羅王」，帶有幾分學生仔對老師敬畏又親个意思。
華語
「老闆，珍珠奶茶一杯。」買的時候，我看到店前的品牌理念：「不是每顆粉圓，都能叫做珍珠。」一樣都是粉圓，放進開水煮，沒沒甚麼區別。不過，火愛用得剛剛好、時間要夠，糖漿也要慢慢收入味，方能變成彈牙吸引人的珍珠。我心裡想：「人，難道不是這樣？」那時，我想到渠之老師……。
「老師，這段論文，我改好了。」渠之老師收到學生的論文，一頁一頁仔細看。過沒幾久，她指著其中一段講：「這兒，還要修正！」學生無可奈何講：「這篇改很多次了呢，怎還……」渠之老師小聲說：「改，不是找你的麻煩，是要讓你的論文有你自己的想法。」
有人問：「渠之老師，怎會那麼嚴格？」我想，要從她的求學經歷說起。以前，渠之老師修聲韻學的課，只有七個人，她的老師是大家口中鼎鼎大名的「嚴羅王」。那時，流傳一句笑話：「嚴羅王開當鋪。」大家光聽到就驚惶失措，還沒考試就先擔心。
不過，就因為有壓力，七個人更加努力，一起讀書、討論問題，一遍又一遍，最後全部順利通過。到現在，渠之老師還記得的，不是怕被「嚴羅王」當掉，反而是一起打拚的情分。原來，嚴格不一定是傷害，還會帶來成長的力量。
現在，渠之老師自己當老師了，也用一樣的標準要求學生。曾有學生利用別人的論文，字一個一個照著打，然後修改些內容，就想要變成自己的作品。渠之老師請她重新修正，因為老師知道：「寫論文，只有這次；誠信的態度，卻是一輩子的大事，比那張畢業證書更重要。」
到現在，我才知道：好老師，也是這樣一步一步磨出來的。當時，她在嚴羅王的教導下訓練；今天，換她教學生，不是雞蛋裡挑骨頭、挑三揀四，是要讓學生走正路、跑更遠。客家人說：「吃果子，拜樹頭；吃米飯，拜拳頭。」學生敬重渠之老師，不是因為她的要求少，反而是因為她掌握原則，真心守候學生的未來。
不是每顆粉圓，都可以叫做珍珠；不是每位老師，都可以變成學生心裡的珍珠。真正的好老師，不怕時間的考驗，用一輩子的心血，慢慢地煮出一顆又一顆彈牙吸引人、入味好吃个珍珠。
