【蔡兆程/雲林報導】雲林縣推動「客語深根計畫」交出盡靚个成績單!雲林縣政府民政處前幾日在崙背鄉詔安客家文化館舉辦成果展,現場餳來當多鄉親老嫩大細共下參與;這三年來雲林復振詔安客語有成,客語認證考試對2024年初級个6成6通過率,到今年中級暨中高級第一梯次,還較創下百分之百通過个好成績。客委會語言發展處處長何金樑當面感謝雲林鄉親對傳承珍貴「詔安客」个煞猛打拚。

客家委員會語言發展處處長何金樑表示,詔安客家係全台灣拗蠻重要个客家語文同文化,這幾年在大家共同打拚之下,發展來有越致好个風評。蔡兆程攝
客家委員會語言發展處處長何金樑表示,詔安客家係全台灣拗蠻重要个客家語文同文化,這幾年在大家共同打拚之下,發展來有越致好个風評。蔡兆程攝

「115年雲林縣客語深根計畫成果展」在本月7號於崙背鄉詔安客家文化館盛大舉辦,現場來已多客家鄉親、老嫩大細共下參與,毋單淨係透過動態表演、還抑係靜態成果展示,做下展現出客語同客家文化个傳承。客家委員會語言發展處處長何金樑在活動中表達雲林縣政府對客委會个支持,試著當感謝。佢表示,詔安客家係全台灣拗蠻重要个客家語文同文化,這幾年在大家共同打拚之下,發展來有越致好个風評。

何金樑強調,針對詔安、饒平、大埔等等珍貴个少數腔頭,客委會同地方政府持續推動客家語文養成計畫,這深根計畫集合了客語講古、親子共學、教保人員客家語文培訓、還過客語認證等方向,對𫣆客家語言與文化的保存有當大个相𢯭,希望大家繼續同心共下來推進客家文化个傳承。何金樑在現場,還有同鄉親儕學著詔安詞彙<chenˇ zhong^村長>。

學員儕手工做个面具獅同詔安繪本製作。蔡兆程攝
學員儕手工做个面具獅同詔安繪本製作。蔡兆程攝

客語傳承對細開始 幼兒園演出餳人

這擺成果展活動內容實在當精彩,開場係惠華幼兒園帶來活力十足个表演,學習客語自細斯愛開始,不管係客語抑客家文化,都係為詔安客家文化个傳承注入新血,何金樑在致詞个時節講著,看著人多小朋友,恁細漢斯同詔安童謠跳來分人感動,客語傳承个希望斯係這,還有同學老歌曲共下跳出族群融合个意涵。

雲林縣政府民政處處長張庭魁指出,今年客語深根計畫包括有一擺公教人員、先生同幼保人員个傳習活動,童結合客語講古等等,設定个目標斯係將客語融入大自家日常生活當中。見擺雲林縣政府辦个研習活動都有看著學員同民眾展現出當好个成果同笑容,同客家語言生活化做了有已好个成績。

多講一種語言 建立熟識世界个新角度

張庭魁還用法國作家法蘭斯个名言「多講一種語言,斯係建立一種文化、建立一個世界」,還過臺灣文壇大腳肖林亨泰先生所講「多講一種語言,斯係多了一個熟識世界个角度」,並強調臺灣係一個多元文化開放个社會,地方政府使得來𢯭手來做增進民眾客語能力,毋單淨使得促進大家對客家文化个理解,還使得分社會大眾過較深刻認同並了解𫣆在這項生長个這垤土地同人文化。

雲林縣政府民政處處長張庭魁發講出:「多講一種語言,斯係建立一種文化、建立一個世界。」蔡兆程攝
雲林縣政府民政處處長張庭魁發講出:「多講一種語言,斯係建立一種文化、建立一個世界。」蔡兆程攝

根據雲林縣政府民政處客家委員會深根計畫承辦人員李宜嫻提供个資料,2024年初級認證考次通過率有6成6,2025年中級暨中高級通過率百分百,2026初級多梯次認證有9成个通過率、中級暨中高級第1梯次乜係通過率百分百,客語認證考試个成績表現來當好。

頒發薪傳班先生感謝狀並嘉勉通過客語認證个優秀學員儕獎狀。蔡兆程攝
頒發薪傳班先生感謝狀並嘉勉通過客語認證个優秀學員儕獎狀。蔡兆程攝

這擺成果發表會有頒獎儀式,頒發薪傳班先生感謝狀並嘉勉通過客語認證个優秀學員儕獎狀、續緊有崙背鄉立幼兒園、客語家庭唱客家歌曲,同伯公照護站等等帶來已多詔安特色个客家表演,展現跨世代傳承客家文化个凝聚力。活動盡尾在好食个在地美食同交流中圓滿散棚,客委會真誠邀請大家參與客家活動,同客語同客家文化在𫣆臺灣好好傳承落去!

雲林縣政府深根計畫成績當打眼。蔡兆程攝
雲林縣政府深根計畫成績當打眼。蔡兆程攝