文／李文煥，苗栗縣客人，國中特教教師，客語薪傳師（文學類、語言類），現下戴苗栗（四縣腔）
舊年有一擺，𠊎到臺中市外埔區教到府教學。學生仔个阿爸駛車仔來載𠊎，歸路仔當熱情摎𠊎介紹路項个風景。佢指等頭前講：「該片就係水美里，斡過該條路就到吾屋下了。」𠊎聽著「水美」兩隻字，遽遽應佢：「水美用客話來講，就係『水尾』。無成這片係客家庄？」佢笑等講：「這片正經係客家庄，毋過現下曉講客話个人無幾多了。」
下課了後，學生仔个阿爸渡𠊎去鐵砧山遶尞，摎𠊎講山頂看落去个風景盡靚。該央時，𠊎還無麼个特別个感受，無想著該位竟然就係苗栗八景第三景「銀錠綺霞」所在。清朝《苗栗縣志》記載，鐵砧山又安到銀錠山。山形像銀錠，臨暗仔時，夕陽斜照山頭，霞光映山，景色當靚，故所有「銀錠綺霞」恁靚个名仔。現下標高大約二百三十六公尺个鐵砧山，當早就係大甲盡有代表性个地標了。
讀著清代文人何敬修个〈銀錠綺霞〉，頭一句就寫：「嶺上平分號鐵砧，飛霞成彩半晴陰。」一句「飛霞成彩」，就摎霞光變化个美景寫出來了。詩裡肚還寫著火焰山、葫蘆墩，還有房裡溪、大甲溪，分人看著當時大甲一帶个山川形勢。這毋單淨係寫景，乜替𫣆俚留下清代大甲个山川記錄。
另一位文人劉少拔，寫个〈銀錠綺霞〉又有另外一種氣勢：「國姓井頭春欲晚，鐵砧山上雨初晴。一江浩蕩開天闕，四壁崎嶇見赤城。」詩人个目光對國姓井、鐵砧山一路望向大甲溪同海口。到尾兩句「誰拋銀錠滄波上，買得朱霞到處生！」更加有想像力，親像有人摎一隻銀錠擲入滄海，天頂个朱霞就隨等夕陽映照，染紅山河。
讀著這兜古詩，𠊎正知，苗栗八景毋單淨係現下苗栗縣个風景定定，清朝時節大甲、外埔還係苗栗縣个一部分。一隻地名，就像一粒細細个種仁，裡背囥等一段地方歷史。下二擺若係行過大甲、外埔，𠊎定著會記得擎頭看一下鐵砧山。𠊎定著會黏時想著劉少拔个詩句：「誰拋銀錠滄波上，買得朱霞到處生！」山還在，霞還在；頭擺詩人筆下个風景，乜還在𫣆行過个路項，定定仔講等苗栗个老故事。
華語
去年有一次，我到台中市外埔區教到府教學。學生的爸爸開車來接我，一路上非常熱情地向我介紹沿途的風景。他指著前方說：「那邊就是水美里，轉過那條路就到我家了。」我聽到「水美」這兩個字，連忙回應他：「水美用客家話來說，就是『水尾』。難不成這裡也是客家庄？」他笑著說：「這裡真的是客家庄，不過現在會講客家話的人沒幾個了。」
下課之後，學生的爸爸帶我去鐵砧山走走逛逛，跟我說從山頂俯瞰下去的風景非常美麗。當時，我還沒有什麼特別的感受，沒想到那個地方竟然就是苗栗八景第三景「銀錠綺霞」的所在地。清朝《苗栗縣志》記載，鐵砧山又名銀錠山。山形像銀錠，傍晚時分，夕陽斜照山頭，晚霞映照山巒，景色綺麗，所以才有「銀錠綺霞」的美名。如今標高約 236 公尺的鐵砧山，很早以前就是大甲非常有代表性的地標。
讀到清代文人何敬修的〈銀錠綺霞〉，第一句就寫道：「嶺上平分號鐵砧，飛霞成彩半晴陰。」一句「飛霞成彩」，就把霞光變幻的美景描繪了出來。詩中還寫到了火焰山、葫蘆墩，以及房裡溪和大甲溪，讓人看見當時大甲一帶的山川形勢。這不僅僅是寫景，也為我們留下了清代大甲的山川紀錄。
另一位文人劉少拔所寫的〈銀錠綺霞〉，又有另一種氣勢：「國姓井頭春欲晚，鐵砧山上雨初晴。一江浩蕩開天闕，四壁崎嶇見赤城。」詩人的目光從國姓井、鐵砧山一路望向大甲溪與海口。最後兩句「誰拋銀錠滄波上，買得朱霞到處生！」更加富有想像力，就像有人把一枚銀錠丟入滄海，天邊的朱霞便隨著夕陽映照，染紅了山河。
讀到這些古詩，我才知道，苗栗八景不僅僅是現在苗栗縣的風景而已，清朝時期大甲、外埔依然是苗栗縣的一部分。一個地名，就像是一顆微小的種子，裡面藏著一段地方歷史。下次如果有路過大甲、外埔，我一定會記得抬頭看一眼鐵砧山。我一定立刻會想到劉少拔的詩句：「誰拋銀錠滄波上，買得朱霞到處生！」山還在，霞還在；昔日詩人筆下的風景，也依然在我們走過的路上，靜靜地訴說著苗栗的古老故事。
附錄
劉少拔〈銀錠綺霞〉
國姓井頭春欲晚，鐵砧山上雨初晴。
一江浩蕩開天闕，四壁崎嶇見赤城。
曉色倒翻桃浪輭，夕陽斜過焰峰明。
誰拋銀錠滄波上，買得朱霞到處生！
何敬修〈銀錠綺霞〉
嶺上平分號鐵砧，飛霞成彩半晴陰。
北騰火焰千章木，南鑄葫蘆百鏈金。
水繞雙溪連海闊，田開絕頂出泉深。
頻登大甲城東望，瑞氣迎眸綺結岑。
