【蔡兆程/彰化報導】為了分台灣少數的客家腔頭饒平腔同詔安傳承，客家委員會日前在彰化舉行「幼幼客語闖通關」認證師資培訓研習，客家委員會語言發展處副處長吳昌成對大家熱烈參與表示感謝，佢講：「當勞瀝大家過再第二擺對全臺灣恁多个所在、又恁早斯過集合䟘來參加這擺進階个研習，感謝大家對少數腔調。」佢指出，饒平腔同詔安腔客語傳承个支持，好得有大家个協助，正使得同𫣆等个客語一代一代傳落去。
客家委員會逐年辦个「幼幼客語闖通關」認證，這個活動係對101年起勢推動，主要係透過搞遊戲、闖五關个方式，分學齡前个幼兒在自然个環境中緊搞緊學習著𫣆等个客語，鼓勵親師同家長，來帶領細人儕多接觸同中意客語，增加小朋友對客家語言文化个認同。今年的「幼幼客語闖通關」少數腔頭饒平腔同詔安腔个認證師資培訓研習，在115年10月17號，由臺灣師範大學在彰化辦理。
幼幼客語闖通關認證包括：四縣腔、海陸腔、大埔腔、饒平腔、詔安腔、南四縣腔等六種腔頭，逐種腔頭个五大闖關情境單元總下係有華語講个：1. 位置及陳設。2. 天氣變化及生病。3. 清潔好寶寶。4. 學校的一天。5. 一起出去玩。參加活動資格：定著愛有足4歲到國小入學前个幼兒；毋過，逐學年、逐個細人單淨使得參加一擺忒等。闖關認證方式：係採用客委會盡新研發个「認證遊具 2.0 版」來進行施測。
斯因致「幼幼客語闖通關」認證係對101年開始推動，到今有經過十四年添咧，有兜本但斯係人數較少个少數腔頭；饒平腔同詔安腔認證施測先生儕無在做現下个施測工作，客家委員會同臺灣師範大學為著愛分𫣆等个母語-客語傳承落去，斯遽遽對今年六月初開始招集饒平腔同詔安腔个人才來培訓幼幼客語闖通關認證-施測人員个研習；這个研習係分做兩擺來進行，第一擺係初階研習在8月15同16兩日，係在雲林縣崙背鄉東興國小舉辦；第二擺斯係進階研習，在10月17同18兩日舉辦，這擺換無共款个所在來辦理，地點係在彰化縣北斗鎮國立北斗家商。
幼幼客語闖通關認證係分做兩種，一種係在園認證，另一種係全國認證。在園認證係照幼兒所讀个幼兒園，在細人儕讀个幼兒園項還過細人儕上課時間辦理，定著係團體報名（預約制）个方式，來完成闖關活動，在園認證申請時間係在活動前30日前同臺灣師大幼幼闖關中心申請；全國（分區）認證个部分係採用個人報名抑係團體報認證，今年度个舉辦時間係對115年4月到116年7月个拜六。
小朋友若係有參加撇「幼幼客語闖通關」个認證，毋淨使得拿著細人儕个第一張客語認證證書，還使得過拿著生趣又好搞个獎品哦。
經過兩日个研習，還過盡尾个測驗了後，新師培个幼幼闖關饒平腔同詔安腔認證施測先生斯恁泥使得來補充著施測先生个不足，使得共下來𢯭手客語个傳承咧。
