文／邱鴻春，客語文薪傳師，桃園楊梅 伯公岡客家人，新楊平社區大學客語文 寫作研習班講師（海陸腔）
摸著癢唩（註1）像死去
先忍一時再增志
原來愛減表面積
聰明植物恁生趣
前幾日在平鎮大佛院做交通志工，分著在大天時坪這片，引導人員上下車還過停車路線，脣頭有一片青青个草坪，看啊過去好遠該位，像有一搭仔紅紅个花點，嗄餳著𠊎个目光。
等到人較少、車較少个衖縫時節，就行兼過去看，到底係麼个？原來係畏羞个詐死草，恬恬仔跍在該，連頭那都無探高起來，偷偷仔開等水紅色毛撐撐个花，無像其他大部分个植物，開花遽遽愛飆高高，就驚無人看著樣仔！
根據農業部農業主題館所寫，詐死草係300零年前，荷蘭人帶落來種个，這下已經係盡容易就看得著个野草、野花咧。因為一摸佢个葉，或者係分大風吹著，就黏時會合起來，葉梗還會墜下去，就像係燥乾、死忒樣仔，正會安到詐死草，講四縣儕就講係見笑花，實在盡生趣，其實佢主要就係愛減少表面積，摎可能个風險傷害降到最低。
「表面積」係一隻盡學術、盡科學个名詞，不管係數學、物理、化學、生物學全會用著。大家可能無注意著，𫣆俚這下身邊甚至手項，逐日已經離毋開「表面積」个相關產品，若係毋曉得運用表面積个原理，就無日常生活中方便个電視、電腦、手機仔，還過其他个3C產品好用咧，因為全部有一隻共同个問題，該就係「發燒」！
愛仰般在最短个時間裡肚分佢退燒，當然第一步就係用風扇吹冷，但係發現1隻、2隻細風扇吹風，根本就吹毋掣分佢退燒，乜做毋得緊加風扇，該產品就會當大，失忒實用性咧！工程師愛解決這隻頭那痛个問題，想著最有效个方式，應該就係在發燒个元件頂高，摎燒氣傳出來分散，包尾總算開發出增加表面積个「散熱器」這隻產品，正徹底解決發燒个問題，現下正有恁多方便進步个3C產品好用，實在就無簡單，試著𠊎俚使用者嶄蠻幸福哦。
萬萬無想著在大自然个植物身項，居然做得看著課本講个，表面積實際運用个例仔，難怪這下各級學校，全有排盡多戶外教學个課程，不再係像頭擺單淨在教室上課定定，希望大家下二擺有看著詐死草，你愛喊佢「智慧草」無斯「科學草」。
（註1）癢唩：音rhongˋ voˋ; 形容動不動就哭的情形，或是稍有一點皮毛之痛就呼天搶地，毫無疼痛忍受度之人。
有智慧的草
一摸馬上像死去
先忍一時再上進
原來要減表面積
聰明植物真有趣
前幾天在平鎮大佛院做交通志工，分配在大廣場這邊，引導人員上下車還有停車路線，旁邊有一片綠油油的草皮，看過去遠處那邊，像有一塊紅紅的花點，卻吸引著我的目光。
等到人較少、車較少的空檔時間，就走上前去看，到底是什麼？原來是羞答答的含羞草，靜靜的蹲在那，連頭都沒有抬高，偷偷的開著粉紅色毛茸茸的花，不像其他大部分的植物，開花要站的高高的，就怕沒人看到一樣！
根據農業部農業主題館所寫，含羞草是300多年前，荷蘭人引進種植的，現在已經是很容易就看得到的野草、野花了。因為一摸它的葉，或者是給大風吹到，就馬上會合起來，葉梗還會垂下去，就像是乾枯、死掉的樣子，客語海陸腔才會叫做詐死草，講四縣的就說是見笑花，實在很有趣，其實它主要就是要減少表面積，把可能的風險傷害降到最低。
「表面積」是一個很學術、很科學的名詞，不管是數學、物理、化學、生物學全會用到。大家可能沒注意到，我們現在身邊甚至手裡，每天已經離不開「表面積」的相關產品，如果是不懂得運用表面積的原理，就沒日常生活中方便的電視、電腦、手機，還有其他的3C產品好用了，因為全部有一個共同的問題，那就是「發熱」！
要如何在最短的時間裡給它降溫，當然第一步就是用風扇吹冷，但是發現1支、2支小風扇吹風，根本就來不及讓他降溫，也不可以一直加風扇，那產品就會很大，失去實用性！工程師要解決這個頭痛的問題，想到最有效的方式，應該就是在發熱的元件上，把熱氣傳出來分散，後來總算開發出增加表面積的「散熱器」這個產品，才徹底解決發熱的問題，現在才有那麼多方便進步的3C產品好用，實在是不簡單，覺得我們使用者好幸福喔。
萬萬沒想到在大自然的植物身上，居然可以看到課本說的，表面積實際運用的例子，難怪現在各級學校，都有排很多戶外教學的課程，不再是像以前只有在教室上課而已，希望大家下一次有看到含羞草，你要稱它「智慧草」或者「科學草」。
