文／李文煥，苗栗縣客人，國中特教教師，客語薪傳師（文學類、語言類），現下戴苗栗（四縣腔）
在木鐸山看煞三台疊翠，順等三湖路下山，右斡接台13線向南行，經過國立聯合大學、南勢、三座屋……，這條路係頭擺苗栗人去銅鑼、三叉个一條重要路線。早期个客家先民，愛去南片个時節，循等這條南北向个路行，遠遠有兩座比等个山仔，該就係苗栗八景裡肚个第二景──「雙峰凌霄」。
雙峰山高五百三十八公尺，單淨講高度，在臺灣个群山裡背無算異高。毋過，頭擺人看山，毋單淨看山有幾高，還會看山勢摎四周个地形。雙峰山周圍个地形較低，兩座山峰比比突出來，對苗栗平洋向南片看，山勢像係直直揰上天頂。雖然山無異高，毋過在文人个筆下，雙峰嗄變做「凌霄」个奇景。
清朝《苗栗縣志》裡肚，留有幾位文人寫雙峰个詩。謝維岳寫：「高峰如筆欲參天，分插東西斷復連。」兩座山峰像兩枝大筆，一東一西插入天頂，山勢雄奇。
劉少拔寫「東西分插削芙蓉」，摎雙峰比做向天頂伸出个芙蓉；又寫「高寒青起萬株松」，山仔高又寒，滿哪仔就係浸青个松樹。到了曾肇楨筆下，雙峰又變做「雙管齊開倒畫天」，像兩枝大筆，共下向天頂畫開，氣勢更加雄偉。
三儕人看雙峰山，寫出來个樣仔嗄無共樣。有人看著佢个高，有人看著佢个形，乜有人看著佢个勢。山還係該座山，毋過在文人个筆下，就有了無限个想像。
講著雙峰山，乜會想著清朝个吳子光。佢後來徙到銅鑼，在雙峰山下起「雙峰草堂」，在該位讀書、講學、寫文章。對佢來講，雙峰毋單淨係遠遠看得著个山，乜係讀書同生活个所在。山摎人做伴久了，山景乜慢慢仔生出人文个味緒。
推薦一隻看「雙峰凌霄」个好所在，在臺灣客家文化館个好客公園觀景台。該片个視線較闊，看往下，銅鑼街項摎後龍溪全看現現；臥頭向遠遠个山頭望去，兩座山比比企在天邊。天時好个時節，古人詩裡肚講个山勢摎氣象，做得做一擺尋著。
有兜景，毋係因為山仔當高正出名，係因為有人肯頓恬下來看，過摎看著个景寫下來。一代過一代，雙峰本本企在苗栗南片，等等𫣆看著，等等𫣆用自家个話，摎雙峰个靚講下去。
附錄：〈雙峰凌霄〉三首
華語
在木鐸山看完「三台疊翠」後，順著三湖路下山，右轉接台13線向南行，經過國立聯合大學、南勢、三座屋……，這條路是以前苗栗人前往銅鑼、三叉（今三義）的一條重要路線。早期的客家先民，要前往南邊的時候，順著這條南北向的路走，遠遠會看見兩座並排的山頭，那就是苗栗八景裡的第二景──「雙峰凌霄」。
雙峰山標高五百三十八公尺，單講高度，在臺灣的群山之中不算非常高。不過，以前的人看山，不只看山有多高，還會看山勢和四周的地形。雙峰山周圍的地形較低，兩座山峰並排突起，從苗栗平原向南邊望去，山勢像是直直衝上天際。雖然山不是很高，但在文人的筆下，雙峰卻成了「凌霄」的奇景。
清朝的《苗栗縣志》裡，留有幾位文人描寫雙峰山的詩作。謝維岳寫道：「高峰如筆欲參天，分插東西斷復連。」兩座山峰像兩枝大筆，一東一西插入天上，山勢雄奇。
劉少拔寫下「東西分插削芙蓉」，將雙峰比作向天上伸展的芙蓉花；又寫「高寒青起萬株松」，山高又寒冷，滿山遍野都是翠綠的松樹。到了曾肇楨筆下，雙峰又變成「雙管齊開倒畫天」，像兩枝大筆，一起向天上畫開，氣勢更加雄偉。
三個人看雙峰山，寫出來的樣子卻不相同。有人看到它的高，有人看到它的形，也有人看到它的勢。山還是那座山，不過在文人的筆下，就有了無限的想像。
說到雙峰山，也會想到清朝的吳子光。他後來搬到銅鑼，在雙峰山下蓋了「雙峰草堂」，在那裡讀書、講學、寫文章。對他來說，雙峰不只是遠遠看得到的山，也是讀書與生活的地方。山與人作伴久了，山景也慢慢生出了人文的韻味。
推薦一個欣賞「雙峰凌霄」的好地方，就在臺灣客家文化館的好客公園觀景台。那裡的視野較開闊，往下看，銅鑼街上和後龍溪全都看得一清二楚；抬頭向遠遠的山頭望去，兩座山並列佇立在天邊。天氣好的時候，古人詩裡所說的山勢和氣象，可以一次盡收眼底。
有些景緻，不是因為山很高才出名，是因為有人肯靜下心來看，再把看到的景色寫下來。一代接一代，雙峰山依然佇立在苗栗南邊，等著我們去看見，等著我們用自己的話，把雙峰的美麗繼續講述下去。
附錄：《苗栗縣志》卷十五
一、謝維岳
高峰如筆欲參天，分插東西斷復連；
長似銀河作玉硯，空中樓閣寫雲煙。
二、劉少拔
千百峰頭矗二峰，東西分插削芙蓉。
南來海外此兄弟，北去寰中有祖宗。
左右源逢雙帶水，高寒青起萬株松。
何當更到吳山去，拍手成仙快此胸？
三、曾肇楨
誰拋鐵筆大如椽，雙管齊開倒畫天？
共許昂頭扶日月，相隨把臂奠坤乾。
雲陰近覆三村暗，煙樹遙瞻萬丈懸。
聞道燭台曾對峙，崔嵬應讓此峰前。
