文／陳靜雯，客語薪傳師，係中壢過嶺客家人，本本戴過嶺  （四縣腔）

想起大約三十年前，在𠊎个心肝肚就有一個心願：想愛做摎客家話有關係个頭路。該央時，試著自家當好運，尋著製作客語電視節目公司个助理。無採包尾因為頭家投資失利，公司發毋出薪水，盡多老員工陸陸續續都走忒哩，𠊎這隻菜鳥仔，乜就跈等離開。

雖然這隻頭路淨做了短短兩隻零月，毋過該粒「想愛為客家做事」个種仁，一直埋在吾心肝肚，從來毋識消失。𠊎係一個「踏等夢想前進」个人，會為自家定目標、許願望，願望達成了，就過設定新个目標，假使暫時無法度完成，會先摎佢恬恬仔放落心肝肚，定定仔期待，有一日機會來時，佢就會重新暴芽。

有十過年个時間，𠊎一直在小學做課後輔導先生，逐日學校放學過後，就教學生仔寫功課。因為生活摎做事个環境，盡少有講客家話个機會，故所𠊎同客語个連結，乜定定仔走淡、行遠哩。

直直到前年，服務个學校講愛開客語「四縣腔」个課程，聽著這隻消息，𠊎試著當歡喜。就摎自家講：「這係盡難得个機會，定著愛好好把握！」就恁樣，𠊎就開始認真學習，決定愛尋轉摎客家話个緣分。

雖然離開了電視公司，行入家庭，有異長个時間，同母語就像線斷忒共樣，直直到妹仔讀小學，看等佢開始學客話，𠊎心肝肚該粒睡忒个種仁，就像分雨露涿著共樣，又開始綻筍哩。為著愛陪妹仔，同佢共下學習，𠊎重新行入客家話个世界，渡佢參加學校个客家活動，自家乜認真準備，總算考過了客語中高級認證。

雖然拿著薪傳師證書，毋過心肝肚，一直有一息仔遺憾，愐想：敢還有機會，做摎客語有關係个頭路？總算，在前年機會來哩，辭忒做了十過年个課後輔導先生，去做一個客語先生，為客家文化傳承貢獻自家一息仔个力量。

三十年前種入心肝肚該粒夢想个種仁，總算開花哩！這毋單淨實現了𠊎个願望，還較係送分自家五十歲，盡珍貴、最有意義个禮物。未來除忒會認真教學生仔，乜想愛多多學習教客語个技巧，更加想愛練習寫作，希望𠊎乜做得寫出分人感動个文章，為自家个人生加添色彩。

華語

想起大約三十年前，在我的心裡就有一個心願：想要做和客家話有關係的工作。那時，覺得自己很幸運，找到製作客語電視節目公司的助理職務。枉費最後因為老闆投資失利，公司發不出薪水，很多老員工陸陸續續都離職了，我這隻菜鳥，也就跟著離開。

雖然這個工作只做了短短兩個多月，不過那顆「想要為客家做事」的種子，一直埋在心裡面，從來不曾消失過。我是一個「踏等夢想前進」的人，會為自己訂目標、許願望，願望達成了，就再設定新的目標，假使暫時無法完成，會先將它靜靜的放在心裡面，慢慢的期待，有一日機會來時，它就會重新發芽。

有十多年的時間，我一直在小學做課後輔導老師，每天學校放學後，就教學生寫功課。因為生活和做事的環境，很少有講客家話的機會，所以我和客語的連結，也慢慢的變淡、跑遠了。

一直到前年，服務的學校說要開客語「四縣腔」的課程，聽到這個消息，我覺得好開心！就跟自己說：「這是很難得的機會，一定要好好把握！」就這樣，我就開始認真學習，決定要找回和客家話的緣分。

雖然離開了電視公司，走入家庭，有很長的時間，跟母語就像斷了線一樣，一直到女兒讀小學，看著她開始學客家話，我心裡那顆睡著的種子，就像被雨露淋到一樣，又開始長出新芽了。為了要陪女兒，和她一起學習，我重新走入客家話的世界，帶她參加學校的客家活動，自己也認真準備，總算考過了客語中高級認證。

雖然拿到了薪傳師證書，不過心裡面，一直有一些遺憾，思考著：是否還有機會，做跟客語有關係的工作？總算，在前年機會來了，辭掉做了十多年的課輔老師，變成一位客語老師，為客家文化傳承貢獻自己一些些力量。

三十年前種入心裡那顆夢想的種子，總算開花了！這不只是實現了我的願望，更加是送給自己五十歲，最珍貴、最有意義的禮物。未來除了會認真教學生，也想要多多學習教客語的技巧，更想要練習寫作，希望我也可以寫出讓人感動的文章，為自己的人生添加色彩。