【蔡兆程／彰化報導】 彰化國立北斗家商日前舉辦「幼幼客語闖通關」認證進階師培研習，在現場學員肚，正20歲、讀臺中教育大學台灣語文系个陳孟宏特別引人注目。在板橋出世、自細講福佬話个佢，大漢後正知阿奶係雲林詔安客家人，自此燃起搶救瀕危母語个使命感；平時佢毋單淨自學詔安客話，歇睏日還長透騎奧多拜去崙背尋老人家請教，這擺特別投入師資培訓，發誓愛為「保育類肚个保育類」詔安客語傳承盡一份心力。
陳孟宏係在新北市板橋區出世，今年正二十ㄧ歲忒等，係研習現場盡後生个學員，厥屋家肚自溜做下講學老話，到尾正知厥阿奶係客家人，還係盡特殊个雲林詔安客家人。這下當在讀臺中教育大學台灣語文系三年生，都係因為恁泥斯對本土語言傳承有一種使命感，正自家同詔安客話慢慢拈轉來，當認真學習詔安腔客話，歇睏日若有閒，佢自家長在騎緊奧多拜走去雲林縣崙背鄉尋詔安腔老者儕來學習，佢講臺中離雲林當近，這滿分佢還較有動力來同＜雲林詔安客事尋到轉來＞。
陳孟宏講詔安客事愛仰脣傳承下去呢?除撇在屋家肚愛有使用客語个母語者以外，無客語環境个人學習客語斯會已辛苦，這對厥等愛學習詔安客事個人定著會造成當大个難關。今這下會講詔安腔个人伸九千外儕人等，在雲林有當多家庭多數獎个話語也使用華語，在這種語言斷層个情況之下，應該愛盡量改勸後生人轉來學習詔安腔客語，多宣傳客語家庭，分世大人同後輩總下知在家庭中愛使用客語个重要性，比將講在屋家肚無使用客語，下一代斯毋會有流掠講詔安腔母語个人咧。
佢希望使得為詔安客語傳承出一份心力，佢當歡喜參加這擺幼幼客語闖通關師培訓研習，乜當想愛來為客語傳承來𢯭手，佢講厥等詔安腔使得講係保育類動物中个保育類，毋單淨在這擺研習中使得同當多詔安腔个前輩、好朋友等等共下來為客家打拚，還希望使得為客語傳承來付出，佢試著當有意義！
