文／蕭宥（國中生、台東客家人、現下戴台東）
新曆二月初年正過忒，陪阿姊剪頭那毛个時節，忽然間看著舊年暑假共下參加廣播營隊个朋友傳來一條分人著驚个訊息，講該央時來到台東擔任指導先生—講客廣播電台个台長徐智俊先生過身咧。
想起在廣播營隊个種種回憶，一時間，心肝肚嗄有一陣酸酸个感覺。好好个人才，仰會旋旋風就過身咧？在廣播營隊進行該下，徐先生𢯭手𠊎兜當多，不管係摎客家廣播車－講客號借分台東个𠊎兜，分𠊎兜做得使用盡好个設備來試做廣播節目，分台東个後生人有一隻機會，同全台灣个聽眾朋友相借問，分大家聽著有關台東个好聲音同特色，佢還親身坐火車來到台東指導𠊎這兜後生人，一步一步教𠊎兜有關廣播方面个專業知識，𠊎兜都盡感恩。
在徐先生來台東客家學堂教學个期間，𠊎在厥身項學著廣播節目愛仰仔做正會餳人來聽、一個專業个廣播人做事情个態度，乜學著透過當多新媒體講出自家真實个想法分大家知，像係錄Podcast、投稿客新聞、做自家个Youtube頻道這兜，佢教𠊎兜：「自信雖然重要，毋過一個做廣播个人，除忒自信同技巧，還愛有當遽个反應來面對旋風發生个情況。」還舉真實發生在佢身項个例仔分𠊎兜聽，將自家頭擺个經驗全部分享出來，全無保留，希望𠊎這兜新一代个後生人做得帶等這兜知識在廣播這條路項緊向前行，佢對後生人總係保持親切个態度，另外一方面又對自家个要求當高，係一個十分專業、乜當煞猛培養後生人才个先生。
𠊎相信，徐智俊先生个熱情毋單只影響了參加廣播營隊个人，在佢識經過个地方，在後生人个心肝肚一定會暴芽、生根，將佢个精神一代一代傳下去。
像舊年舉辦第一屆个客聲獎，台東就有兩個廣播營隊个學生仔參加，一儕入圍、一儕得獎。𠊎就係該得著第八類聲優組全國第三名个台東後生人，𠊎做得當負責任講：在該製作這件作品个時節堵著困難，有當大个部分係聽著先生个教學同建議，𠊎正想著愛仰般去改正，先生个專業知識同廣播經驗，分𠊎這後生人得著當大个幫助。在頒獎典禮項，徐智俊先生毋單淨無討功勞，對無得獎个同學乜一息仔誚㸐都無，顛倒鼓勵𠊎兜繼續加油、期待𠊎兜在客語同做廣播這兩件事情項做得越來越好，對𠊎兜來講，佢永遠都對學生仔最包容、最鼓勵後生人勇敢向前行个先生，佢講：「客家話最需要个就係後生人，培養後生人同細人仔，佢兜大漢之後過繼續培養其他人才，將語言永久傳承下去。」
佢个智慧同想法雖然還吂分還較多人了解，但係𠊎知：台東這兜後生人會摎佢个理念好好个傳揚出去，在台東這片土地項，有一群細細个後生生力軍慢慢在該成長，不管係自家个Podcast節目、台東薪傳師个故事人培養、滿哪仔做母語推廣活動、用客語創作音樂、同其他客語沉浸式學校互相交流、認識、訪問無共樣縣市摎領域个各種客家人才……等，都係𠊎兜帶等同先生共樣个理念對母語做出个行動。
雖然這兜行動同徐先生為母語做个恁多事情比起來都無算麼个，但係𠊎想，不管愛用幾多年个時間，這兜細事情總有一日會變到當大个力量，𠊎這代个後生人一定做得影響下一代个母語生力軍。徐先生雖然既經過身了，但係佢為客家廣播个貢獻，還有佢溫柔對待後生人个精神，會永久存在𠊎這兜學生、先生、同識分佢感動个人个記憶裡肚，在𠊎兜心肝肚，徐先生毋單止係講客廣播電台个台長、乜係最好个先生、還有陪大家在客語這條路項共下行个好朋友。
最尾，希望徐智俊先生做得在天頂做一個快樂个天使，看等𠊎兜仰般帶等佢个指導、態度同精神繼續行下去，在未來同新一代个人講佢个故事，分大家知：在台灣這片土地項，識有一位對母語、廣播當有熱情，盡心指導學生仔客家先生。
華語
二月初剛過完年，陪著姐姐剪頭髮的時候，忽然看到去年暑假一起參加廣播營隊的朋友傳來一條令人震驚的訊息，說那時來台東擔任指導老師——講客廣播電台前台長徐智俊老師辭世。
想起在廣播營隊的種種回憶，一時之間，心中湧出一陣酸楚。一位人才，怎會突然過世了？在廣播營時，徐老師幫助我們許多，不論是將客家廣播車——客號借給台東的我們，讓我們得以使用最好的設備實作廣播節目，給台東的年輕人一個機會，與全台灣的聽眾朋友打招呼、讓人們聽見有關台東的好聲音和特色，或是親自坐火車來到台東指導我們這些年輕人，一步一步的教導我們有關廣播工作的專業知識，這些都讓我們感激萬分。
在徐老師來台東客家學堂教學的期間，我在他身上學到廣播節目要怎麼樣做才會吸引人前來收聽、一個專業的廣播人做事情的態度，也學到我們這個時代的人，可以透過新媒體講出自己真實的想法，讓世界聽見，像是錄製Podcast、投稿客新聞和做自己的Youtube頻道等，他教導我們：「自信固然重要，不過一個做廣播的人，除了自信、技巧之外，還需要有敏捷的反應來面對突發狀況。」還舉出真實發生在他身上的例子給我們聽，將自身經驗全部分享出來，毫無保留，希望我們這些新一代的年輕人可以帶著這些在廣播這條路上不斷前行，他對年輕人總是保持親切的態度，另一方面又對自己的要求頗高，是一位十分專業，盡心盡力培養年輕人的老師。
我相信，徐智俊老師的熱情不單單只影響了參加廣播營的人，在他曾經去過的地方，在年輕子弟的心中都會萌芽、生根，將他的精神一代一代傳下去。
像去年舉辦的第一屆客聲獎，台東有兩位廣播營隊的學生參加，一位入圍、一位得獎。我就是得到第八類聲優組全國第三名的台東年輕人，對此，我可以非常負責任的說：在製作這件作品時遇到困難，有很大一部分是聽到老師的教學與建議，我才構思出要如何改正，老師的專業知識和廣播經驗，對我這個年輕人來說是很大的幫助。在頒獎典禮上，徐智俊老師不只沒有邀功，對沒有得獎的同學一點都沒有責難、恥笑，反而鼓勵我們繼續加油、期待未來在客語和做廣播這兩件事情上能夠越來越精進，對我們來說，他永遠都對學生們最包容、最鼓勵我們勇敢向前行的老師，他說：「客家話最需要的就是年輕人，培養年輕人與小孩子，在他們長大之後便會繼續培養其他人才，將語言永久的傳承下去。」
他的智慧與想法，雖然還沒有被更多人了解，但是我知道：台東這些年輕人會把他的理念好好傳揚出去，在這片土地上，有一群小小的年輕生力軍慢慢在成長，不管是自己的Podcast節目、台東薪傳師个故事人培養、到各地倡議母語推廣活動、用客語創作音樂、與其他客語沉浸式學校互相交流、認識，訪問不同縣市和領域的各種客家人才……等，都是我們帶著與台長相同的理念對母語付出的行動。
雖然這些行動比起徐老師為母語做的這麼多事情，比起來微乎其微，但我想，無論要花費多少年的時間，這些小事情有一天終會變成巨大的力量，我這一代的年輕人一定會默默影響著下一代的母語生力軍。徐老師雖然已經長辭於世，但他為客家廣播的貢獻，還有他溫柔對待年輕人的感動，將會永久存在我們這群學生、老師、以及曾被他所感動者的記憶中，在我們心中，徐老師不只是講客廣播電台的台長，也是最好的老師、及陪伴我們在客語這條路上前行的好朋友。
最後，希望徐智俊老師在天上做一個快樂的天使，看著我們帶著他的教導、態度與精神繼續走下去，在未來與新一代的人們訴說他的故事，讓大家知曉：在台灣這片土地上，曾經有一位對母語、廣播相當有熱情，指導學生們不遺餘力的客家先生。
