文/黃美貞,苗栗客家人,臺北市光復國小个先生, 這下戴臺北市(四縣腔)

十字路口該間早點店,毋單淨賣三文治、卵餅同漢堡,還會賣兜仔青菜水果,分人客帶搭仔買轉屋下。店面無幾大,東西擺到淰淰,有時係幾袋仔番薯,有時係幾包仔青菜,多少仔像莊下个雜貨店,攞攞合合(註1)。

有一日,𠊎行過店頭,看著脣項擺等幾包果子,卵形細細粒仔,外皮生等幼毛。𠊎看來看去,毋知係麼个,頭家笑笑仔喊𠊎揣看啊。講係粗梨仔,又無恁大;講係桃仔,形仔又毋像。落尾,𠊎拿手機仔翕相查資料,正知臺灣乜有原生个獼猴桃。頭家講,這就係臺灣出个,買過个人客都會到轉來尋。

平常食个奇異果,大嫲牯粒像細人个拳頭嫲,還有一張細細張个貼紙,係外國个水果,不時在媒體打廣告。青肉、黃肉還有紅肉,切開來還會看著當多烏籽,食起來酸甜酸甜,當多人好食。這擺看著臺灣出个,細細粒仔,包在油紙落仔肚,無特別个包裝,係無頭家紹介,𠊎還嫌佢生來毋靚,行過就算了。

買轉屋下,𠊎擇一粒軟个,對半切開,用調羹仔挖來食。無想著,一息都毋會酸,果肉軟軟韌韌,甜味當順口,還有淡淡个香氣。賭造化(註2)想講食半粒看啊,無幾久,桌頂就伸兩片空殼。頭家講个無毋著,這種滋味,食過正知。

後來查資料,正知奇異果原來毋係紐西蘭原生个水果,係引進培育過後,正出名到全世界;臺灣山林肚,乜有自家个原生獼猴桃。想著𠊎食恁多年奇異果,一直到今正知這件事,實在異見笑。外國來个,𠊎兜記得名仔,自家土地生个,顛倒毋識貨。

細細粒果子,對山肚來到早點店,又分𠊎帶轉屋下,若毋係頭家多講兩句,𠊎哪會知佢个來歷。想著山肚有人照顧、有人採收,店頭有人肯賣、肯紹介,這份好味緒正有機會分人食著。簡單个一包水果,原來乜有人个心思在裡肚。毋使行遠,自家身邊就有恁好个寶,係一份臺灣自家个甜味哦!

註1:攞攞合合:音loˊ loˊ gabˋ gabˋ;混合在一起分不開。

註2:賭造化:音duˋ co fa;憑運氣,端看上天安排。

早餐店的奇異果

十字路口那間早餐店,不只賣三明治、蛋餅和漢堡,還會賣些蔬菜水果,讓客人順道買回家。店面不大,東西擺得滿滿的,有時是幾袋地瓜,有時是幾包青菜,有點像鄉下的雜貨店,東西混在一起。

有一天,我經過店門口,看見旁邊擺著幾包果子,橢圓形,小小顆的,外皮長著細毛。我看來看去,不知道是什麼,老闆笑著要我猜猜看。說是梨子,又沒那麼大;說是桃子,形狀又不像。最後,我拿手機拍照查資料,才知道臺灣也有原生的獼猴桃。老闆說,這就是臺灣產的,買過的客人都會回頭來找。

平常吃的奇異果,個頭大,像小朋友的拳頭一樣,還貼著一張小小的貼紙,是外國進口的水果,經常在媒體上打廣告。綠肉、黃肉,還有紅肉,切開來會看見許多黑色的籽,吃起來酸酸甜甜,很多人都喜歡。這回看見臺灣產的,小小顆,裝在塑膠袋裡,沒有特別的包裝,要不是老闆介紹,我還嫌它長得不好看,走過就算了。

買回家,我挑了一顆軟的,對半切開,用湯匙挖來吃。沒想到,一點也不酸,果肉軟軟的,帶點韌勁,甜得很順口,還有淡淡的香氣。起初只想吃半顆試試,沒多久,桌上就只剩兩片空果皮。老闆說得沒錯,這種滋味,吃過才知道。

後來查資料,才知道奇異果原來不是紐西蘭原生的水果,而是引進培育後,才聞名全世界;臺灣山林裡,也有自己的原生獼猴桃。想到我吃了這麼多年奇異果,直到現在才知道這件事,實在很不好意思。外國來的,我們記得名字,自己土地上生長的,反倒不識貨。

小小的果子,從山裡來到早餐店,又被我帶回家,要不是老闆多說兩句,我哪會知道它的來歷。想到山裡有人照顧、有人採收,店裡有人願意賣、願意介紹,這份好滋味才有機會讓人吃到。簡單的一包水果,原來也藏著人們的用心。不必走遠,自己身邊就有這麼好的寶,這是一份屬於臺灣的甜味啊!