文／李文煥，苗栗縣客人，國中特教教師，客語薪傳師（文學類、語言類），現下戴苗栗（四縣腔）
前一駁仔在面書看著朋友分享水紅色个紅龍果花，佢講係第一擺看著，乜正知講該係仙人掌个花。該央時，突然間勾起𠊎還細時節个回憶。𠊎在下背回應朋友：「這種花，𫣆客話安到石壁花。毋單淨打个果子做得食，連無打子个花乜做得做菜，見擺想著，口涎水強強就會跌下來。」
石壁花係荷蘭統治該央時帶入台灣，佢係仙人掌科植物，因為佢又賤又耐旱，十分好種，毋使特別知理（註1）就會生。輒輒會爬在圖牆（註2）、石䃗、河壩脣這兜所在，𫣆俚大體喊佢「石壁花」，學老人係喊佢「壁蓮花、貼壁蓮」同「倒吊蓮」。佢摎這下大家食个紅龍果係親戚，毋過早期个種當少結果，先民主要係摘厥花來做菜食。
頭擺个客家庄，見擺在熱天時節，河壩脣同䃗崁頂高个石壁花開到又大又靚。係講摘下來食毋忒，大家就會用順應時節个智慧——晒乾。先用滾水摎花煠過，濾燥水分，正一皮一皮定定仔鋪在毛籣（註3）項，拿到日頭下晒。晒燥个石壁花乾帶有一息仔青草香味，拿來煲排骨湯，毋單淨做得解油，湯頭乜十分甘甜，係寒天時節盡好个野味料理。
毋過，𠊎心肚項盡好食、盡難忘个，係還細時節阿姆炒个「石壁花炒豬肉」。見擺在熱天時節，阿姆就會買萋萋个石壁花轉來煮，堵好就係朋友面書頂高該種水紅色个花。阿姆會先擇忒石壁花肚个芯，摎佢切做一條一條，先磡蒜頭落鑊𤐙香（註4），再摎石壁花同切好个豬肉共下放落去炒。
石壁花猛火炒過後，滑滑脆脆（註5）个花皮合等豬油、蒜香，噍个時節會有甘甜个水流出來，黏黏个口感有息把仔像蝓豆（註6），正經係人間美味！
自從結婚徙到別个鄉鎮戴，算起來乜有二十年無食著阿姆煮个石壁花炒豬肉了。這雖然毋係麼个大飯店个菜色，甚至䟓工去客家餐廳，乜無定著食得著；毋過該係「阿姆个味緒」。對𠊎來講，阿姆在灶下煮个每一品菜，裡肚裝个全係佢對子女淰淰个愛。該盤承等母愛个石壁花炒豬肉，係𠊎一生人盡難忘个味緒。
註釋
[1]知理：ziiˊliˊ，知曉如何理順/治理」之意。
[2]圖牆：tuˇqiongˇ，在客家傳統習慣，用「圖」字來借表「圖繞、圍繞」之意。「圖牆」即指圍繞在建築或院子四周、用來劃分界線的牆壁（即圍牆）。
[3]毛籣：moˊ lanˇ，指用竹篾密編的平底圓形淺竹筐，邊緣矮而框實，常用於承放、鋪平曝曬農作物（如菜乾、穀物），或是揉搓粄糰、存放食材。
[4]𤐙香：biag hiongˊ，指用熱油煸炒食材（如紅蔥頭、蒜、豬肉），將油份逼出並提煉出濃郁香氣的烹飪動作（即華語的「爆香」）。
[5]脆脆：coi coi，形容食物口感酥脆、爽脆（如石壁花一咬即斷的口感），或指物品質地脆弱容易斷裂。
[6]蝓豆：ieˇteu，即華語所稱的「秋葵」。因切開後富有黏液、口感黏滑而得名。海陸腔因其果實外形彎曲尖細極似羊角，亦稱為「羊角豆」（此稱呼亦同於星馬客家話與粵語）。
華語
前陣子在臉書上看到朋友分享粉紅色的火龍果花，他說是第一次看到，也才知道那是仙人掌的花。在那時，突然喚起我小時候的回憶。我在下面回應朋友：「這種花，我們客家話叫做石壁花。不只結的果實可以吃，連沒結果的花也可以做菜，每次一想到，口水就快要流下來了。」
石壁花是荷蘭統治時期帶入台灣的，它是仙人掌科植物，因為它生命力強又耐旱，非常容易種植，不用特別打理就會生長。常常會攀爬在圍牆、石駁崁、河堤旁這些地方，我們大多叫它「石壁花」，閩南人則是叫它「壁蓮花」、「貼壁蓮」和「倒吊蓮」。它跟現在大家吃的火龍果是親戚，不過早期的品種很少結果，先民主要是摘它的花來做菜吃。
以前的客家庄，每次到了夏天，河邊和駁崁上面的石壁花開得又大又漂亮。如果摘下來吃不完，大家就會運用順應時節的智慧——曬乾。先用滾水把花汆燙過，瀝乾水分，才一片一片慢慢地鋪在大圓竹盤上，拿到太陽底下曬。曬乾的石壁花乾帶有一點青草香味，拿來燉排骨湯，不只可以解油膩，湯頭也非常甘甜，是冬天裡最棒的野味料理。
不過，我心裡覺得最好吃、最難忘的，是小時候媽媽煮的「石壁花炒豬肉」。每次在夏天時，媽媽就會買新鮮的石壁花回來煮，剛好就是朋友臉書上那種粉紅色的花。媽媽會先摘除石壁花裡面的花蕊，把它切成一條一條，先拍碎蒜頭下鍋爆香，再把石壁花和切好的豬肉一起放下去炒。
石壁花用大火快炒後，滑溜爽脆的花瓣裹著豬油和蒜香，咀嚼時會有甘甜的汁液流出來，黏黏的口感有點像秋葵，真的是人間美味！
自從結婚搬到別的鄉鎮住，算起來也有二十年沒吃到媽媽煮的石壁花炒豬肉了。這雖然不是什麼大飯店的菜色，甚至特地去客家餐廳，也不一定吃得到；不過那就是「媽媽的味道」。對我來說，媽媽在廚房煮的每一道菜，裡面裝的全是她對子女滿滿的愛。那盤承載著母愛的石壁花炒豬肉，是我一輩子最難忘的味道。
