文／王德兆，新竹縣竹東人，退休人士（海陸腔）

對𫣆俚客人來講，「先生」係當分人尊敬个兩隻字！尤其係教書先生。客人會尊敬教書先生，主要係因為𫣆俚當深个「耕讀傳家」觀念，因為在傳統農業社會裡肚，讀書係家庭翻身唯一个方法。加上客人總係摎希望寄託在後代做得透過讀書來出頭天，所以摎「先生」當做係自家子弟人生个啟蒙人。

𠊎讀國中个時節，因為該量時係能力分班，所以逐儕都愛做「智力測驗」，該年公布分班結果个時節，𠊎對第一班開始尋𠊎个名仔，尋到第五班，還吂看著自家个名仔，𠊎斯想，無𠊎對最尾班12班尋往轉好咧？吂知斯看著𠊎个名仔在12班个名單頂高。想著𠊎个學習成績乜無恁㜮啊！仰會分學校分到最尾一班呢？

學校同學笑講這班安到「放牛班」，在這班𠊎兜上課个時節哪有認真上課，專門在該搣漦搣濞、想空想缺想愛搞，睡个睡、搞个搞，搣到先生斯無心性上課哩喲。

有一日，英文先生吳碧珠先生摎𠊎喊到佢个辦公室，開嘴又無罵𠊎哦！問𠊎：「若爸係做麼个頭路个？」𠊎應佢講：「𠊎爸係打炭个！」佢又講：「若爸做恁危險、恁辛苦个頭路摎你送來學校受教育，你仰會恁綻又恁毋煞猛？你仰會盼得分佢失望呢？你个英文發音已好，下二擺愛好好學習，知無？」。𠊎个心肝頭嗄怩惄一下，目汁斯溚溚跌，噭到目汁濫泔話都講毋轉。

佢个話改變了𠊎个想法，乜改變𠊎个人生。對該量時開始，𠊎認真聽課、認真讀書做筆記，第二年斯分學校調到第一班，安到「升學班」。𠊎想，一個好个先生做得改變一個人个人生，做先生儕係仰般值得分人尊敬个啊！對該量時到這下堵堵好50年，𠊎還係清清楚楚記得先生个名仔、佢个樣仔，佢摎𠊎講个話，見擺想著這件事情，𠊎斯會喉嗹硬硬，目珠框紅紅，目汁緊跌。

《管子．權修》：「十年之計，莫如樹木；終身之計，莫如樹人」。意思係講種一頭樹仔愛十年正做得變成用得个木材，分人拿來用，想愛培養一個人才愛一生人恁久，所以想愛培養一個人才係一件相當困難个事情。

這下社會个價值觀，「尊師重道」个觀念像形當少咧！這下人降著少，儕儕惜子惜到像寶樣，因為現下法律規定學生仔打毋得乜罵毋得，學生仔動啊著斯對爺哀投這投該，不管佢有影抑係無影，自家著抑係毋著。不管自家有理抑係無理，好抑毋好，家長動啊著斯投學校無斯投教育單位，講哪個先生仰般又仰般！

這下做先生月給又毋高，行政事務又多，三不二時還會分家長投，學校會開麼个「校事會議」檢討，搣到當多後生先生雖然受過正式个教育培養乜拿著教育資格嗄無愛來學校教書，有兜學校愛招先生去學校教書十招斯招無先生來教。

𠊎國中時節因為吳碧珠先生个話，改變了𠊎个人生，這下𠊎有機會做教書先生，𠊎乜想愛做一個「能夠了解學生仔个想法，做得在堵好个時節分學生仔有兜無共樣个想法，改變學生仔人生」个先生。有好个先生正有好个學生仔，仰般做對學生仔較好？逐儕人心肝肚都有一支尺，𠊎相信先生認真教書，從細斯摎學生仔講做人做事个道理，恁樣，「尊師重道」个觀念斯會分這隻社會再過拈轉來。

華語

對我們客家人來說，「老師」是非常受人尊重的兩隻字！尤其是教書老師。客家人之所以尊重教書老師，主要是因為我們有很深的「耕讀傳家」觀念，因為在傳統農業社會裡，讀書是家庭翻身的唯一方法。加上客家人總是將希望寄託在後代可以通過讀書來出人頭地，所以將「老師」當做是自已兒女人生的啟蒙人。

我讀國中的時節，因為那個時候是能力分班，所以每個人都要做「智力測驗」，當年公布分班結果的時候，我從第一班開始找我的名字，找到第五班，還是沒有看到自已的名字，𠊎就想，不然我從最後一班12班往回找好了！誰知道我就看到我的名字在12班的名單上面！我想我的學習成績也沒那麼差吧！怎麼會被學校分到最後一班呢？學校同學笑說這班叫到「放牛班」！在這一班我們上課的時候哪有認真上課！都嘛在那胡搞瞎搞、想東想西想要玩！睡的睡、玩的玩，搞到老師都沒有心思上課了！

有一天，英文老師吳碧珠老師把我叫到她的辦公室，她開口又沒有罵我喔！問我：「你爸爸是做什麼工作的？」我回她說：「我爸爸是礦工」。她又說：「你爸爸做這麼危險、這麼辛苦的工作把你送來學校受教育，你怎麼會這麼調皮搗蛋又不認真？你怎麼捨得讓他失望呢？你的英文發音很好，以後要好好學習，知道嗎？」。我的心頭好像被針刺了一下，淚流滿面，哭得很傷心連話都講不出來。

她的話改變了我的想法，也改變了我的人生。從那個時候開始，我認真上課、認真讀書做筆記，第二年就被學校調到第一班，叫做「升學班」。我想，一個好的老師可以改變一個人的人生，當老師是多麼值得受人尊敬啊！從那個時候到現在剛剛好50年，我還是清清楚楚記得老師的名字、她的樣子，她跟我講的話，每次想到這件事情，我就會哽咽，眼眶泛紅，眼淚直流。

《管子．權修》：「十年之計，莫如樹木；終身之計，莫如樹人」。意思是說種一棵樹要十年才會變成可以用的木材，被人拿來使用，想要培養一個人才要一輩子的時間，所以要培養一個人才是一件相當困難的事情。

現在社會的價值觀，「尊師重道」的觀念好像非常少了！現在人生的少，每個父母疼愛小孩就像疼愛寶貝一樣！因為現在法律規定學生不能打也不能罵，學生動不動就向父母投訴這投訴那，不管是真的還是假的，自己對還是不對，不管自己有理還是無理，好或不好；家長動不動就投訴學校不然就投訴教育單位說哪個老師怎樣又怎樣。

現在當老師薪水又不高，行政事務又多，三不五時還會被家長投訴，學校會開什麼「校事會議」檢討，搞到非常多年輕老師雖然受過正規教育培訓也拿到教育資格卻不要來學校教書，有些學校要找老師去學校教書十次招聘都招不到老師來教。

我國中的時候因為吳碧珠老師的話，改變了我的人生，現在我有機會當教書老師，我也想要做一位：「能夠了解學生想法，可以在適當的時候給學生有些不一樣的想法，改變學生的人生」的老師。有好老師才會有好的學生，怎麼做對學生比較好？每個人心裡都有一把尺，我相信老師認真教書，從小跟學生講為人處事的道理，這樣，「尊師重道」的觀念才會被這個社會再重拾回來。