【寫客文】安名仔

文／范雪霞，國小先生退休、苗栗客人、現下歇苗栗

腔調：四縣

「吂降子，先安名」姪女一公布有身項，歸屋下人就七隻和尚八樣腔當毋閒開計，係降倈仔愛安日頭樣仔恁響个名仔，降妹仔愛溫柔好性體靚靚个好名。為著迎接細天使个來到，在秋天、寒天、春天，對嬰兒仔尿墊仔到蝲䗁車，已像做足準備樣，塞淰歸屋間。

「十月懷胎，一朝降子」日仔一日一日過忒，臨尾，在四月迎來得人惜个細阿妹仔。毋過，「逐樣好勢，一項無足」無想著細人仔出世後，還係尋毋著符合爺哀心肝肚所想个好名仔。下後，你一句，𠊎一句：「根據名姓學『三才五十一靈動數』名仔愛安到中性一息，37畫。」算命先生講。

「名仔个筆畫無愛忒多！𠊎該隻「彝」字盡難寫，別儕又毋會唸！」細舅怪爺忒有字墨。

「有了，就安到鄭月娥。起碼做到香港特首」講笑！

「𠊎還阿花仔啦！做到經濟部長」亂講啊！

「爺哀安名仔該使當費心神，無愛為著食擺毋使錢个大餐改名鹹鰱魚太郎。」

嬰兒仔个阿姆「ㄤ咕」：「該，還係先喊『細ㄤ咕』好了。」

「ㄤ咕」客家話係「細Baby」个意思。係講正出世个嬰兒仔先哇哇滾大聲噭，下後發出伊伊呀呀个聲。慢慢个，嬰兒仔盡自然个發出ㄤ咕ㄤ咕个聲，世大人在撩嬰兒仔个時節，乜會用ㄤ咕ㄤ咕个語調交流，嬰兒仔盡自然个乜發出ㄤ咕ㄤ咕个聲回應，在互動間恬恬个傳達感情。嬰兒仔个阿姆「ㄤ咕」就係全家分佢个偏名，一直到結婚降子還恁樣喊佢。

「安好名，有好運。」細人仔个名仔係陪佢一生人个，對儕儕人來講，名仔毋單淨係一隻符號，還包含了爺哀對子女个期望，好名姓分細人仔一生較順序。分細人仔安一隻好聽个名仔愛有意義，還愛有特色。斷真毋係恁簡單个事情！

有兜家族照「字輩」排序分細人仔安名仔，姓加中央个字輩，淨愛想名仔盡後背該隻字就好，盡省事。

「名仔乜毋使尋書摎字典，閃開毋好聽个偎音就好。」姐婆希望細ㄤ咕康健快樂成長就好。

姐公講：「名仔驚怕會共樣，但係逐儕人都係盡特別个。毋好像三歲子貼春聯–毋知上下，莫看著人一句『ㄤ咕』就毋會打，知人我就好。」

細ㄤ咕，阿爸阿姆愐了愐，大家乜𢯭手想，包尾分你安一隻聰明伶俐、知上下个靚名。這係爺哀分若个第一份等路，希望同細ㄤ咕做伴，一生人平安順序。

華語：取名字

「還沒生子，先取名字」姪女一宣布有喜，一家人便七嘴八舌忙獻計，生男要叫得陽光響亮，生女要溫柔婉約美美的好名。而為了迎接小天使的到來，打從秋天、冬天、春天，從嬰兒尿布到學步車，好像做足準備的塞滿整個房間。

「十月懷胎，一朝分娩」日子一天天過去—終於，在四月迎來可愛的女娃。然而，「萬事俱備，只欠東風」沒想到孩子出生後，還是找不到符合父母內心所想的好名字。

於是，你一言，我一語：

「根據姓名學『三才五格及八十一靈動數』名字要取中性一點的，37畫」命理師說的。

「名字的筆畫不要太多！我那個「彝」字難寫，別人又不會唸！」小舅怪爹太有學問。

「有了，就叫做鄭月娥。至少當到香港特首」搞笑！

「我還阿花啦！當到經濟部長」瞎扯啊！

「父母取名字那麼費神，不要為了吃頓免費大餐改名鮭魚太郎什麼的。」

嬰兒媽「ㄤ咕」：「那還是先叫「小ㄤ咕」好了。」

「ㄤ咕」在客家話中是「小Baby」的意思。是說剛出生的嬰兒先哇哇大哭，然後發出伊伊呀呀的聲音。慢慢的，嬰兒很自然的發出ㄤ咕ㄤ咕的聲音，長輩在逗嬰兒時也用ㄤ咕ㄤ咕的語調交流，嬰兒很自然的也發出ㄤ咕ㄤ咕的聲音回應，在互動中悄悄的傳達感情。嬰兒媽「ㄤ咕」就是全家給的暱稱，直到結婚生子仍這樣叫著。

「取好名，享好運。」小孩的名字是伴其一生的，對每個人來說，名字不只是一個符號，還包含了父母對子女的期望，好的姓名讓孩子人生更順利。給孩子取一個好聽的名字要有寓意，還要有特色。真的不是簡單的事情！

有些家族照「字輩」排序給孩子取名字，姓加了中間字輩，只管想名字最後面那個字就好，非常省事。

「名字也不用引經據典找，避開不雅諧音就好。」外婆希望小ㄤ咕健康快樂成長就好。

外公說：「名字有可能會相同，但每一個人都是獨一無二的。不要像三歲孩子貼春聯-沒大沒小，不要看到人不會打「ㄤ咕」一聲不響，知書達禮就好。」

小ㄤ咕，爸爸媽媽絞盡腦汁也集思廣益，終於幫妳取個冰雪聰明、秀外慧中的美名。這是父母給你的第一份禮物，希望陪伴小ㄤ咕一輩子平安順利。