文／張穗風，台大地理碩士，高雄市第一屆客家青年諮詢委員，美濃客人，這下歇台北（南四縣腔）

𠊎會知得桃園新屋个海脣有蚵螺石（註1），係因為𠊎讀大學个時節有𢯭手做過「珍愛藻礁」公投連署个志工。𠊎本底係瀰濃客人，還細無聽過麼个「藻礁」，乜毋知原來台灣有客人歇（註2）在海脣做「討海人」。毋過，因為做連署志工个經驗，分𠊎開始對「藻礁」感著有興趣，想愛過深入去了解。故所，𠊎走去新屋海脣个大牛欄社區（現下安到永興）做田野調查，想愛知當地人仰仔看「藻礁」。

做田野調查个時節，𠊎認識著對文史工作同生態調查攏蓋有興趣个在地民眾阿強，佢帶等𠊎在海脣一哪仔（註3）走上走下，看生趣个動植物。佢同𠊎講，當地人撖「藻礁」喊做「蚵螺石」，𠊎感著這個名仔安到蓋好，就撖佢紀錄下來。

後來，𠊎正知，對新屋到觀音海脣个蚵螺石，生態多元又豐富，毋單止做得看著菟葵、海參、兇猛酋婦蟹這兜生物，假使運氣好，甚至做得看著烏星寶螺、柴山多杯孔珊瑚！故所，有人撖新屋同觀音海脣个蚵螺石，喊做「海洋生物个育嬰房」。

新屋同觀音个族群主要係客人，這片个客人大部分講海陸，但係乜有人講四縣。歇在海脣个客人主要講海陸，佢等發展出蓋多「靠海食海」个文化，像係在海脣，佢等會結「石塭」（註4）來捉魚，還會邀陣去「牽罟」（註5）！

在海脣做事（註6），大家隔啊遠遠，講話溝通毋方便，故所會「歕嘟」（註7）來傳達訊號！加上，捉著个魚仔假使食毋核，就會做「鹹醢」（註8）來保存。這兜故事𠊎第一擺聽著，愐著仰會恁生趣！還細就歇在山腳下个𠊎根本無想像過。

毋管係豐富多元个蚵螺石生態，還係歇在海脣个客人所發展出來个「海客文化」，攏蓋值得受著重視，應當愛邀集大家共下同佢好好保存下來。只毋過，新屋同觀音海脣對大約仔三十年之前，就有規畫愛做液化天然氣接收站，故所開了一個港口，還過結了蓋多海䃗，這幾年開始來用了。這兜工業建設對於蚵螺石生態同海客文化，實在係蓋大个威脅！

有兜人知得蚵螺石生態同海客文化个重要性，故所投入蓋多時間同心力，發起「珍愛藻礁」公投，想愛保留這兜自然生態同在地文化。乜有兜在地人時常去海脣做生態調查，了解蚵螺石生態受著仰仔程度个影響。蓋感謝自家該當時決心投入做田野調查，正做得聽著這兜生趣个故事。

最尾，想愛邀請大家有閒个時節去新屋海脣行行尞尞，認識這塊土地个環境同文化。

（文章主要用南四縣腔寫作，毋過有攞一息海陸客話入去）

註釋
（註1）蚵螺石：o lo shagˋ（海陸腔），用來稱呼多孔隙的海岸礁石，如珊瑚礁或藻礁。
（註2）歇：hed（南四縣腔），居住的意思。
（註3）一哪仔：iˋ lai eˊ（南四縣腔），到處的意思。
（註4）石塭：shagˋ vunˋ（海陸腔），石滬的意思。
（註5）牽罟：kienˋ guˋ（海陸腔），用來稱呼多人合力將網繩中的魚獲拉上岸的傳統捕魚方式。
（註6）做事：zo se（南四縣腔），意指需要勞動的工作。
（註7）歕嘟：pun du（海陸腔），意指吹海螺。
（註8）鹹醢：ham goi（海陸腔），用來稱呼將魚類以大量食鹽醃漬發酵的食物，類似「魚露」。

華語

我會知道桃園新屋海邊有藻礁，是因為我讀大學時有擔任「珍愛藻礁」公投連署的志工。我本身是美濃的客家人，小時候並沒有聽過「藻礁」，也不知道原來台灣有客家人住在海邊當「討海人」。但是，因為擔任連署志工的經驗，讓我開始對藻礁感興趣，想要深入了解。因此，我跑到新屋靠海的大牛欄社區（現名永興）蹲點田野調查，試著了解當地人怎麼看待藻礁。

蹲點田野調查時，我認識到一位對文史工作和生態調查都很有興趣的在地民眾阿強，他時常帶我在海邊到處跑來跑去，看有趣的動植物。他和我說，當地人都把藻礁稱為「蚵螺石」，我覺得這個稱呼很有意思，就記錄下來。

後來，我才知道，原來新屋到觀音的海岸的藻礁，生態十分多元和豐富，不只可以看到菟葵、海參、兇猛酋腹蟹這些生物，若是運氣好，甚至可以看到黑星寶螺、柴山多杯孔珊瑚呢！所以，有人將新屋和觀音海岸的藻礁，稱呼為「海洋生物的育嬰房」。

新屋和觀音的族群主要為客家人，此區域的客家人大部分講海陸，但也有一部分人講四縣。住在海邊的客家人主要講海陸，他們發展出許多「靠海吃海」的文化，例如在海邊，他們會築石滬來抓魚，還會攜手協力去牽罟！

在忙著漁事時，由於大家距離遠，彼此講話溝通不方便，因此會用吹螺的方式來傳遞訊號！除此之外，抓到的魚如果沒吃完，還會做成魚露來保存。這些故事我第一次聽到，心想怎麼會那麼有趣！從小在山腳下長大的我根本沒有想像過。

不管是豐富多元的藻礁生態，還是住在海邊的客家人所發展出的「海客文化」，都很值得重視，應該要邀集各界人士來共同保存這個地方的生態和文化。然而，新屋和觀音海邊從大約三十年前，就已有建設液化天然氣接收站的計畫，因此開闢了一個港口，還築了許多海堤，最近幾年開始啟用。這些工業設施其實對於藻礁生態和海客文化而言，形成了很大的威脅！

有些人知曉藻礁生態和海客文化的重要性，因此投入許多時間和心力，發起「珍愛藻礁」公投，想要保留這些自然生態與在地文化。也有些在地人經常到海邊做生態調查，了解藻礁生態受到怎麼樣程度的影響。很感謝當時的自己有下定決心投入做蹲點田野調查，才能聽到這些有趣的故事。

最後，想邀請大家有空的時候去新屋海邊走走看看，認識這塊土地的環境與文化。

（文章主要用南四縣腔寫作，但有揉雜一些海陸客家話進去）