文／林淳華，戴台中市豐原區，學老人（大埔腔）
馬來西亞國家沙巴州裡肚單淨有一條火車路，係在英國統治時代起个，主要係載進出口个東西，這下變做觀光火車，這火車係用枋做个，車廂裡肚係頭擺个裝潢、無冷氣，坐這枋火車會愐著𠊎細漢時節，𠊎坐普通車對基隆到彰化尞涼時節，逐站名斯會背誦，坐這蒸汽火車了後，衫領變烏色个，車廂裡肚裝入中臺灣恁熱个感覺。
沙巴火車坐四十分鐘了後，會落車去吧巴農業小鎮遶尞，這係客家人戴个莊頭，吧巴當像臺灣苗栗縣卓蘭鎮，仰脣恁泥講？行過吧巴街路會看著店面係用枋做个屋，有農藥店，有賣秧个，雜貨店賣滷鹹淡用个塑膠盎，市場外背晒李、晒大菜，市場還有專門賣節慶拜神个點心，比論甜粄、米粽、紅龜粄、粢粑，有兜攤位賣在地青菜水果，可比蕨、石竺這兜，有兜賣滷鹹淡，比將藠頭，當有卓蘭客家莊个感覺。
吧巴客家人煞猛傳承客家精神，分𠊎當感動！一百年前對大陸廣東徙到這位个客家人，因為愛傳承客家語言，厥等集資興建華文小學，繼續講華語同客語；因為愛傳承客家文化，厥等設立廣福宮，宮廟裡肚拜媽祖婆、恩主公、伯公，有籤詩，過年、正月半斯在廟裡肚舉辦活動，同客家文化傳落來。
吧巴小鎮屬於沙巴州，沙巴州華人裡肚，有七成係客家人。毋過，沙巴同西馬个華人遷徙這位過程毋共款，比論旅行社个陳頭家，厥祖先係同英國商人簽契約，在沙巴有土地了後，斯徙來種咖啡、可可、煙草這兜需要當多人工个農作物。導遊阿妹个阿姆係客家人，佢有在臺灣生活个經驗，阿妹乜在臺灣讀大學，轉去沙巴做導遊。
厥姆雖然係大埔客，毋過，阿妹講「客家」係「hagˋ gaˊ」，東勢大埔客講「客家」係「kag^ ga+」，佢講，佢自細漢講華語，客語發音已無標準，𠊎試著係大埔發音懶音化，發音變做四縣腔客語。
行過吧巴沙巴小鎮，對𠊎熟識臺灣客家莊乜有幫助，吾心肝肚愛記得，熟識一個客家莊，斯愛注意厥食物、語言、宗教、學校忒等，這係客家莊特別个地方，因為吧巴恁遠，𠊎做一個外地人，嗄顛倒看還較清楚。
華語
馬來西亞沙巴只有一條鐵道，興建於英國殖民時代，主要是運輸進出口物資，如今成為觀光火車，搭乘這種木製、復古、沒有冷氣的火車，是一趟懷舊之旅，我會想起小時候搭普通車從基隆到彰化員林過暑假，每一站站名都會倒背如流，搭完蒸汽火車之後，衣領都是黑的，整個車廂內都是中台灣的炙熱。
搭乘四十分鐘之後，會下火車，到吧巴農業小鎮巡禮，這是客家農業小鎮，彷彿走進苗栗卓蘭鎮，為何會如此說？因為走在吧巴街道上，店面都是木造房屋，有農藥店，有賣菜苗的店，賣醃漬塑膠罐的雜貨店，市場外面就在曬李子和芥菜，市場還有專賣節慶拜拜需要的點心，像甜粿、糯米粽、紅龜粿、麻糬，有賣當地蔬果的攤位，如過貓、石竺等，有賣醃蕗蕎等醃漬物，非常有卓蘭客家莊的感覺。
吧巴客家人拼命傳承客家精神，很讓我感動！一百年前對大陸廣東遷移到此的客家人，因為要傳承客家語言，他們集資興建華文小學，繼續說華語和客語，因為要傳承客家文化，他們設立廣福宮，宮廟內拜媽祖、關公、伯公，有詩籤，過年和元宵節會在廟裡舉辦活動，將客家文化傳下來。
吧巴小鎮屬於沙巴州，沙巴州華人中，有七成是客家人。不過，沙巴和西馬的華人遷移的過程不一樣，例如旅行社的陳老闆，他的祖先先和英國商人簽契約，在沙巴有了土地之後，才遷移來此，種植咖啡、可可、煙草等勞動力密集的農作物。導遊阿妹的媽媽是客家人，她曾在臺灣住過，阿妹也在臺灣念師大地理系，回到沙巴當導遊。
雖然阿妹的媽媽是客家人，但是阿妹說「客家」是「「hagˋ gaˊ」，東勢大埔腔「客家」是「kag^ ga+」，她說，她從小講華語，客語發音已經不標準了，我認為是大埔音惰化，被四縣腔同化了。
走過吧巴小鎮，對我認識臺灣客家莊也有幫助，我會在心裡記得，認識一個客家莊，要注意他們的食物、語言、宗教、學校等，這些是客家莊特別的地方。因為吧巴很遠，身為一個局外人，反而越是看得更清楚。
