文／劉家興，上班族，桃園楊梅伯公岡客家人（四海腔）

在油、電摎物價這兜个「起價聲」響起該下，𠊎兜做細老百姓个人，生活痛苦指數緊來緊高，幸福指數嗄直直跌下來。為著「日求三餐，夜求一宿」，除忒有份穩定个頭路摎收入以外，學習幾套抗起價个步數乜變做現代社會裡肚个一門顯學。

盡幸運，屋下肚因為有一細垤菜園，阿爸阿姆照時節來自家種對時个青菜，全係有機天然耕作，一來毋使愁農藥食落肚个危險，二來又做得省著買菜錢；係講收成好个時節，還做得送分親朋好友共下來享用。

平常上班个時節盡量無愛在外背食，當晝食阿姆為𠊎兜用心準備个愛心飯包，毋單淨毋會營養無均衡，乜做得毋使愁慮愛去哪買晝抑係愛食麼个个問題。熱天時熱𤐰𤐰仔，行在路項會嘴渴，總係想來一杯涼涼个飲料，便利商店摎各大連鎖飲料店个商品長透係大家个第一選擇，毋過係講無嫌麻煩，分自家慣帶等杯仔，自家準備滾水抑係用公共場所个飲水機，正毋會食著昶多个糖分抑係人工化合物，還過省下無必要个開銷。

買東西个時節，盡量有用著正買，無必要个東西，就先暫時摎佢放到脣項莫插佢。同時善用網路，多方面比較賣場、超市、線上購物這兜个價數，利用打折優惠个期間買東西，分緊來緊無力个錢做得發揮最大个效果。

另外，關稅議題同物價起價這兜都係𫣆俚無辦法控制个事情，多多少少會造成煩惱同愁慮。試減少用手機个時間，正毋會接觸昶多个負面訊息，抑係培養規律个運動習慣，都做得放輕鬆自家个身心，減輕壓力摎煩惱。

係講多个時間同體力，收入無多个後生人乜做得利用下班時間斜槓兼職，毋單淨在日常生活肚省錢，乜做得多份收入來對抗通貨膨脹。毋過愛考量自家个情況，「幾大个鳥仔，做幾大个竇」。

抗漲價過生活一息都毋會難，淨愛大家多花兜心力，毋多知就做得積少成多，成功抵擋通貨膨脹，這另種形式个減薪！

華語

在油電、物價等一片「漲聲」響起下，身為小老百姓的我們，生活痛苦指數成正比不斷攀高，幸福指數卻直直往下落。為了能求得一口溫飽，除了有份安穩的工作收入外，學習幾套抗漲招數也儼然成為現代社會中的一門顯學。

很幸運地，家中因為有一小塊菜園，爸媽依照時節親自栽種當季的蔬菜，全部有機天然耕作，一來不用擔心農藥吃進肚的危險，二來又能省下買菜錢；若有豐收時，還能分送親朋好友一同享用。

平常上班時盡量不當外食族，午餐吃媽媽為我們精心準備的愛心便當，不但不會營養不均衡，也能省去煩惱該上哪買午餐或該吃什麼的問題。夏季天氣炎熱走在路上口渴，總是想來杯清涼的飲料，便利商店和各大連鎖飲料店的商品常是大家的第一首選，但若能不嫌麻煩，養成攜帶隨手杯的好習慣，自備開水或是使用公共場所的飲水機，都能讓自己免於喝下過多的糖分或人工化合物，並且省下不必要的開銷。

購物時，盡量降低自我的物慾需求，非必要的東西，就先暫時將它擱在一旁不理。同時善用網路，多方比較賣場、超市、線上購物等的價錢，利用折扣特惠檔期採購商品，讓效用越來越小的消費預算能發揮到最大的功效。

另外，外在的關稅議題和物價上漲等，都是我們無法掌控的事情，或多或少都會造成心理層面上的焦慮與不安。試著減少滑手機的時間，避免接觸過多的負面資訊，或是培養規律的運動習慣，都能適時放鬆身心，減輕壓力和焦慮感。

如果行有餘力，上班小資族們也能善用下班時間斜槓兼職，不止在日常生活中節省開銷，也可以多份收入來對抗通膨。但要衡量自身情況，量力而為。

抗漲過生活一點也不難，只要大家多花點心力，無形間就能積少成多，成功抵擋「變相減薪」的通貨膨脹！