文／曾馨儀
北科附工／桃園高中客語支援教師，客語績優薪傳師，係苗栗人，這下歇在桃園市（四縣腔）
書香來做伴，綠意共下行。這全台灣最靚个綠建築圖書館，係讀書人放冗心情、細人仔泅入（註1）書海个所在。先用一首客家俳詩做開頭紹介：
〈悠遊總圖〉
曦光晴日晟（註2）／曉白雲間任悠游／生命樹中綠能藏
最美圖書館／青翠幕簾跈風捲／鏡池漠漠掀
百萬書冊豐／公園建築晨昏聚／分齡分衆自在享
四圍景色靚／季春紫花迷霧旋／蕊蕊繁星戀
淡淡楝花香／餳來路人頓恬（註3）望／打卡遊尞暢
夏迎鬧棚（註4）蟬鳥唱／樹影 風穿涼
在桃園藝文特區，有一棟8棧樓个文創地標，分人喊佢係全臺灣最靚个綠建築圖書館，結合環保、智慧閱讀、書店、咖啡香……，有舒適个看書放冗場所乜有「網美打卡點」，做得享受文青个生活氣氛。
這座圖書館仰般變做恁鬧熱个景點呢？有麼个特色呢？歸座圖書館个外牆，係用環保木紋玻璃結構，做得抵熱又節能。這建築係日本建築師設計个「生命樹」概念。用白色鐵架打造「環保節能採光井」个樹身，連接各層樓个室內採光。像漏斗形个螺紋錐體建築，故所乜分人安做「綠色生命樹」。
簡單來紹介一下，一樓有蔦屋書店、有老人家、後生人，無論男女都合味个咖啡廳。放尞日還有文創細攤仔，種類多到算毋清。二樓有借還書个區域，樂齡雜誌、報紙閱讀專區，特別準備分老人家用个膨鏡（註5）桌燈，凳仔坐著乜較鬆爽，還有樂齡桌遊展示區，下把仔乜會有志工𢯭手渡等搞活動。
三樓係色彩繽紛个親子閱覽區，做得借繪本、看書、還做得借玩具同細人子共下搞摎學習。逐禮拜六、禮拜日，三樓个小劇場都有先生講故事分細人仔聽，有華語、日本話、英文、學老話，還有客家話喲。𠊎乜逐隻月會輪一擺用客家話講故事，細人仔學會講「恁早」「正來尞」「失禮」…心肝頭會感覺當燒暖哦。
𠊎最中意个係五樓電扶梯上來右手片，有客家文學專區，雖然講客家書無盡多。毋過已經有歷史傳記、語言文學、繪本、禮俗宗教等分類，算起來係對客家作家最大个肯定。希望將來有還較多客家文學作品入館，對書頁肚走出醹醹（註6）个客家書香味。
註釋
（註1）泅入qiuˇngib：游進。
（註2）晟cangˇ：熾盛、明亮。
（註3）頓恬dunˋdiamˊ：暫停。
（註4）鬧棚nau pangˇ：開場鑼鼓，形容熱鬧的樣子。
（註5）膨鏡pong giang：放大鏡。
（註6）醹醹neuˇneuˇ：濃濃的。
華語
書香作伴，綠意同行。這是全台灣最美的綠建築圖書館，是讀書人放鬆心情、孩子們游進書海的地方。於此以一首客家俳詩作介紹：
〈悠遊總圖〉
明亮的晨曦照射／拂曉白雲任意悠遊／生命之樹中潛藏著綠能
最美的圖書館／青翠簾幕隨著風捲動／鏡池迷濛水色微微掀起
百萬冊藏書豐富／晨昏相聚於公園建築內／分齡分眾自在共享
四周的景色清麗／暮春紫花如迷霧旋繞／朵朵的花蕊如繁星般
淡淡清香的楝花／牽引路人駐足凝望／遊賞拍照讓人心情舒暢
夏日迎來熱鬧的蟬鳴鳥叫聲／搖曳的樹影涼風從葉縫中穿過
在桃園藝文特區，有一棟8層樓的文創地標，稱之為全臺灣最美麗的綠建築圖書館，結合環保、智慧閱讀、書店、咖啡廳…等.，有舒適的閱讀放鬆場所，也是「網美的打卡點」，還可以享受文青生活的氛圍。
這座圖書館如何成為鬧熱的景點呢？有什麼樣的特色呢？整座圖書館的外牆建築，是用環保木紋玻璃結構，既能隔熱又節能。這座建築是日本建築師設計的「生命樹」概念。用白色鐵架打造「環保節能採光井」的樹幹，連接各層樓的室內採光。像漏斗形的螺紋錐體建築，所以被稱做「綠色生命樹」。
簡單的介紹一下，一樓有蔦屋書店、有年長者、年輕人，不論男女都喜歡的咖啡廳。假日還有文創小攤子，種類繁多到數不清。二樓有借還書的區域，及樂齡雜誌、報紙的閱讀專區，特別準備有年長者使用的放大鏡桌燈，椅子也較為舒適，還有樂齡桌遊展示區，有時也會有志工老師幫忙帶著做活動。
三樓是色彩繽的親子閱覽區，可以借繪本、看書、還可以借玩具，親子一同玩樂與學習。每個禮拜六、禮拜日，三樓的小劇場都有志工老師說故事給小朋友們聽，有華語、日本語、英文、台語，還有客家語喲。我也是每個月會輪值一次用客家語說故事，讓孩子們學會用客語說「早安」「再見」「對不起」…此時心中感覺到特別的溫暖。
我最喜歡的是，五樓電扶梯上來右手邊，有客家文學專區，雖然說客家的書冊藏書不多。不過，有歷史傳記、語言文學、繪本、禮俗宗教等分類，算起來，館方對客家作家也給予最大的肯定。期望將來有較多的客家文學作品入館，在書頁裡能飄出濃厚的客家書香味。
