文／邱鴻春，客語文薪傳師，桃園楊梅 伯公岡客家人（海陸腔）
細人客語差
認真背詞無摸些
成果展演表現佳
先生、隊輔、工作人員儕儕皮弓緪準備好，續下來就愛看小朋友个表現咧，上課前先調查一下，發現正兩三儕小朋友，做得講簡單个對話，這對愛演出全客語音樂劇來講，係一大挑戰！
好得早先規劃課程，就有考慮著這兜問題，若係單純排戲教台詞，無添兜仔其他个內容，細人定著佇毋著，所以除了戲劇肚輕快个歌詞改寫，摎生趣好記个唸謠之外，第一日先安排破冰遊戲，還過伯公岡在地个文化導覽行讀，下晝學習認識音符節拍，學讀歌謠歌詞還過唸謠，一日下來，細人歡喜靂天，感覺盡有意思又盡好搞，家長乜反應當好。
第二日手工創作體驗，分細人發想創意，利用選舉回收个扇仔，畫出自家靚靚个圖，呈現逐儕个無限夢想空間，同時扇仔還係戲劇裡肚會用著个傢啦伙，畫出來个不管係動物、植物，抑係風景，全做得練習講出客話來，有達著快樂學客語个目的，下晝教唱、選角色、讀劇本，開始排第一場、第二場个戲齣，看著細人踴躍爭取角色，顛倒嗄分大人反省學習，下課後𠊎錄劇本台詞分家長，請家長轉去𢯭手摎小朋友複習。
第三日直接到農場報到，農場看仙草、食仙草茶，紹介關西仙草桃園一號、楊梅仙草桃園二號，還有新開發个桃園三號，了解無共樣个位所。看轉來就在教室DIY仙草茶包做等路，接下來就練歌仔摎唸謠還過排戲，當中還有客委會委員來訪視指導，又係充實个一日。
第四日九點就邀請客家美食鍾先生，來教做牛搵水、粄圓，十點零做好食點心，相賽食到飽𩜰𩜰，接等就交分導演排戲，韶下晝就愛成果發表咧，小朋友雖然無時恬，毋過記才全盡好，認真起來還係會做得个，這量時乜有客家電視台來錄影採訪。
最尾日緊張个時間來咧，發表个場所係隔壁个萬善廟廟坪脣，十點左右就渡小朋友到現場排練，畢竟場所無共樣，經驗豐富个導演，黏時調整出、入場位所，練了幾擺小朋友就熟絡咧，斷真到下晝正式演出，係幾下日來个練習最湛斗个，所有來賓、家長通棚當阿腦，係一擺當成功个全客語演出，小朋友做著咧。
華語
學生客語差
認真背詞不含糊
成果展演表現佳
老師、隊輔、工作人員每位都繃緊準備好，接下來就要看小朋友的表現了，上課前先調查一下，發現只有兩三位小朋友，可以講簡單的對話，這對要演出全客語音樂劇來說，是一大挑戰！
還好前期規劃課程，就有考慮到這些問題，如果只是單純排戲教台詞，沒添加其他的內容，小朋友一定受不了，所以除了劇裡輕快的歌詞改寫，和有趣好記的唸謠之外，第一天先安排破冰遊戲，還有富岡在地文化導覽走讀，下午學習認識音符節拍，學習歌謠歌詞還有唸謠，一天下來，小朋友歡天喜地，感覺很有意思又很好玩，家長也反應很好。
第二天手工創作體驗，給小朋友發想創意，利用選舉回收的扇子，畫出自己漂亮的圖，展現每個人的無限想像空間，同時扇子還是戲劇當中會用到的道具，畫出來的不管是動物、植物，或是風景，都可以練習講出客語來，有達到快樂學客語的目的，下午教唱、選角色、讀劇本，開始排第一場、第二場的戲碼，看著小朋友踴躍爭取角色，反而給大人很好的反省學習，下課後我錄劇本台詞給家長，請家長回家幫忙和小朋友複習。
第三天直接到農場報到，農場看仙草、喝仙草茶，介紹關西仙草桃園一號、楊梅仙草桃園二號，還有新開發的桃園三號，了解不一樣的地方。看回來就在教室DIY仙草茶包，做好可帶回家，接下來就練歌和唸謠還有排戲，當中還有客委會委員來訪視指導，又是充實的一天。
第四天九點就邀請客家美食鍾老師，來教做牛搵水、湯圓，十點多就做好開始吃點心，大家都吃的很飽，接著就交給導演排戲，明天下午就要成果發表了，小朋友雖然好動沒停過，不過記性都很好，認真起來還是很棒的，這時候也有客家電視台來錄影採訪。
最後一天緊張的時刻到來，發表的場所是隔壁的集義祠廣場旁邊，十點左右就帶小朋友到現場排練，畢竟場所不一樣，經驗豐富的導演，馬上調整出、入場位置，練了幾次小朋友就熟悉了，真的到下午正式演出，是幾天的練習中最棒的，所有來賓、家長都很稱讚，是一次很成功的全客語演出，小朋友做到了。
