文／李秀鳳，新竹客家人，中小學客語先生，這下戴中壢（腔頭：海陸腔）
眼看千遍，毋當手做一輪。摎小朋友講客家粄食有幾好食，客家點心个味瑞有幾餳人，雖然講个人講到口水波潑，聽个人聽到嘴勺勺，毋過，鼻毋著也食毋著。最好个方式，就係分佢兜實際做一擺，毋單淨做得認識客家先民打粄个文化背景，也體會著唯有煞猛出力亼粄、團結合作挼粄，正有法度共下分享客家美食，正經係當湛斗个品德教育。
忠福國小个客家社團，在羅明訓校長个鼓勵推動下成立，佢希望客語教學做得行入生活當中。平常時除忒練習打竹板配唸童謠、棚頭、看客語繪本學講古以外，這擺就來做熝湯粢，特別邀請舂粢打粄个慶人—莊臺芳、劉富妹兩個先生來指導小朋友。
熝湯粢，係有名个客家點心之一，看字就知，這路點心定著摎粢粑有關係。著！「熝」係煮个意思，「湯」係薑嫲湯，「粢」就係粢粑。毋過，做法摎舂粢粑當無共樣。熝湯粢，係摎亼好个粄斷做一截一截（像做大粄圓恁大截），挼圓了後過搭扁，用手指公在中央揤一隻窟。
仰愛揤一隻窟呢？係因為熝湯粢又安到「毋甘願粄」，佢有一隻當生趣个古，聽講頭擺有一個家娘當好食粄，輒常要求心臼打粄分佢食。這日臨暗仔，心臼做忒一大堆田事轉來，還有一拖拉庫个家務吂做，悿喞喞仔，實在毋甘願又愛打粄，心臼無恁大神氣挼細粄圓，佢摎粄圓挼到大大粒，過用手巴掌摎大粄圓搭扁，還用手指公揤一隻窟，緊搭緊揤又緊噥噥哢哢，怨嘆家娘盡刁琢人，自家仰會恁歪命。
心臼摎這怪奇形投个粄煠熟後，放入攪好个烏糖水碗肚，過掖兜炒好个地豆仁、麻仔，兜分厥家娘食。無想著家娘食了後會尋尾，安腦心臼頭腦當精靈，恁會變食，阿腦到會企。就恁樣，毋甘願粄嗄變成好食个客家點心。
講煞毋甘願粄个古，續等摎細人仔講，心肝肚若有麼个慍悴，通棚摎佢揤落窟肚煮來食忒，心肝頭就會活活開。聽𠊎恁樣講，儕儕揤窟揤到當煞猛，一片揤還一片唸唸唸唸，看小朋友恁認真揤窟个樣仔，實在還古董、還好笑。
熝湯粢還有一隻浪漫个傳說。逐年舊曆七月七係七娘生，這日，牛郎摎織女在天頂个鵲橋項相堵頭。牛郎會兜等一碗熝湯粢分織女食，因為這係佢兜一年一擺个見面機會，織女緊食緊噭，天公落水，就係表示織女淚漣漣，熝湯粢該隻窟堵堵好分佢張目汁。
細人仔聽𠊎講煞續等講：「織女恁好噭，這兜淺淺个窟，哪有罅張？」有一個高年級个細阿妹仔帶頭摎窟揤較深兜，講愛分織女張較多目汁，童言童語正經當得人惜。
這下有當多人摎熝湯粢喊做牛搵水，其實，兩種个做法多少仔有爭差。牛搵水係摎炊好个粄斷好，放入薑嫲烏糖水裡肚浸等來食，當像頭擺耕種人个牛，當好在有濫膏糜个水竇肚搵來搵去共樣，所以安到牛搵水。牛搵水因為係用熟粄，所以佢就一種白色定定。熝湯粢係用生粄，摎粄挼圓搭扁又揤一隻窟去煠熟，正放入薑嫲烏糖水肚。因為係用生粄，所以做得幾下種色合共下，像這擺富妹先生就準備兩垤紅色个火龍果、茄色摎黃色个番薯還有綠茶粉，勻開來摎粄共下亼，熝湯粢个色目看起來就會當鬧、當靚。
不管係安到熝湯粢抑係牛搵水，對小朋友來講，都係醹醹个客家味瑞，毋單淨做得體會著打粄个趣味，還做得認識客家文化，最重要个還食得著好食个客家點心，確實係盡有意義个社團活動。
華語
眼看千遍，不如動手做一遍。跟小朋友講客家粄食有多好吃，客家點心的味道有多吸引人，雖然說者說得口沫橫飛，聽者聽得入神，不過，聞不到也吃不到。最好的方式，就是讓他們實際做一次，不只可以認識客家先民做粄的文化背景，也可體會唯有勤奮出力搓揉粄團，團結合作搓捏粄，才有辦法一起分享客家美食，真是很棒的品德教育。
忠福國小的客家社團，在羅明訓校長的鼓勵推動下成立，他希望客語教學能走入生活當中。平常除了練習打竹板配唸童謠、棚頭、看客語繪本學講故事以外，這次就來煮甜湯麻糬，特別邀請做粄達人—莊臺芳、劉富妹兩位老師來指導小朋友。
煮甜湯麻糬，是有名的客家點心之一，看字就知，這道點心一定跟麻糬有關係。對！「熝」是煮的意思，「湯」是薑湯，「粢」就是麻糬。毋過，做法跟搗麻糬很不一樣。煮甜湯麻糬，是把搓揉好的粄團斷成一截一截（像做大湯圓這麼大截），搓圓之後再拍扁，用拇指在中央擠壓一個凹洞。
為什麼要擠壓一個凹洞呢？是因為煮甜湯麻糬又叫做「不甘願粄」，它有一個很有趣的故事，聽說從前有一個婆婆很喜歡吃粄，經常要求媳婦做粄給她吃。這天傍晚，媳婦做完一大堆田裡的活回來，還有一拖拉庫的家務還沒做，
極為疲憊，實在不甘願又要做粄，媳婦沒這麼大精神搓小湯圓，她把湯圓搓得大大粒，再用巴掌把大湯圓拍扁，接著用拇指壓一個凹洞，一邊拍一邊擠壓又一邊唸唸有詞，怨嘆婆婆很會捉弄人，自己怎會這麼苦命。
媳婦把這奇形怪狀的粄煮熟後，放進攪拌好的黑糖水碗裡，再撒些炒好的花生、芝麻，端給她婆婆吃。沒想到婆婆吃完後意猶未盡，誇獎媳婦頭腦很精靈，這麼會弄吃的，有點過度誇讚。就這樣，不甘願粄卻變成好吃的客家點心。
講完不甘願粄的故事，接著跟小朋友說，心中若有鬱悶不快樂，全部把它擠壓到凹洞裡煮來吃掉，心胸就會很開朗。聽我這麼說，每人擠壓凹洞擠壓得很努力，一邊擠壓還一邊碎碎唸，看小朋友如此認真擠壓凹洞的模樣，實在很滑稽、很好笑。
煮甜湯麻糬還有一個浪漫的傳說。每年農曆七月七日是七星媽誕辰，這天，牛郎和織女在天上的鵲橋相會。牛郎會端著一碗煮甜湯麻糬給織女吃，因為這是他們一年一次的見面機會，織女邊吃邊哭，天空下雨，就是表示織女淚漣漣，煮甜湯麻糬那個凹洞剛好給她裝眼淚。
小孩聽我講完接著說：「織女這麼愛哭，這些淺淺的凹洞，怎麼夠裝？」有一個高年級的小女生帶頭把凹洞再擠壓深一點，說要給織女裝較多淚水，童言童語真的很可愛。
現在有很多人把煮甜湯麻糬喊做牛玩水，其實，兩種的做法多少有些差異。牛玩水是將蒸好的粄斷成一截一截，放入黑糖薑汁裡浸泡來吃，很像從前農夫的牛，喜歡在有爛泥巴的水裡滾來滾去一樣，所以叫做牛玩水。牛玩水因為是用熟粄，所以就一種白色而已。
煮甜湯麻糬是用生粄，把粄搓圓拍扁又擠壓一個凹洞去煮熟，才放進黑糖薑汁裡。因為是用生粄，所以可以幾種顏色混搭，像這次富妹老師就準備兩塊紅色火龍果、紫色和黃色番薯還有綠茶粉，均勻分開和粄一起搓揉，煮甜湯麻糬的顏色看起來就會很熱鬧、很漂亮。
不管叫做煮甜湯麻糬還是牛玩水，對小朋友來講，都是濃濃的客家味道，不只可以體驗做粄的趣味，還能認識客家文化，最重要的是吃得到好吃的客家點心，確實是很有意義的社團活動。
