文／温志平，銀行行員，新埔客家人，現居新竹縣竹北市（海陸腔）
親愛个老虎先生你好：
𠊎係你个粉絲（註1），從細在故事書還過電視裡肚看著你威風又緣投个樣仔，斯想愛寫信仔分你，毋過一直（註2）都無擎筆，直直到今年个避暑，𠊎正開始擎筆寫信仔分你，想愛摎你講𠊎心肝肚个話。
細細个時節，𠊎輒輒在白紙頂高畫出你威風凜凜（註3）个樣仔，𠊎當中意你膴身頂背烏色一浪一浪个線條，尤其係額頭頂背該幾條，看起來就像一隻「王」字。逐擺看著你在闊闊个草坪項走，當像在該摎風比賽，看麼儕走較遽樣，𠊎當欽羨（註4）你有恁遽个速度，乜希望自家摎你共樣做得走到恁遽。
你有一雙當利个目珠、兩隻當靈个耳空，還有四支飆當遽个腳，這兜優點分你變成打獵个高手。雖然你恁厲害，毋過𠊎輒輒聽著𠊎兜人類在你个後背講你个壞話，佢兜總係講你个性情當粗殘（註5），分你掠著个獵物當衰過，一定分你擘到四髀兩膁（註6）。其實人類一息都毋了解你，佢兜根本毋知你係在該執行一項當偉大个任務，該就係維持大自然裡肚食物鏈（註7）个平衡（註8）。食物鏈係講無你，草食動物就少忒一隻天敵（註9），數量就會增加，到該量時，草食動物會食忒當多个植物，植物个數量減少咧，又會影響著其他生物个食物來源摎生活環境，這兜一隻接等一隻个影響會破壞食物鏈个平衡，引起當嚴重个生態問題，所以食物鏈做毋得無你啊！
續下來，換𠊎偷偷摎你講𠊎兜人類个壞話，其實𠊎試著人類正係最粗殘个。因為人類當貪，大量去捕捉老虎，挷下老虎个牙齒來做避邪用个平安符，剝下老虎个虎皮做高級个地毯（註10），還有摎老虎个骨頭拿去研粉做藥仔用，這兜完全無科學个根據，斯係傳統个迷信定定。人類這兜積惡个行為，害你兜愛面對強強會絕種个命運，人類實在愛好好个反省啊！
今晡日係7月29，乜係「全球老虎日」，又安到「世界愛虎日」，在這隻特別个日仔裡肚，𠊎希望人類做得誠心誠意个檢討，毋好再過非法捕捉老虎咧，分你兜做得自由自在个生活在森林（註11）肚。地球斯有一隻定，人類摎老虎共同生活在這隻靚靚个地球項，應該愛相親相愛，共下合作來維持大自然个生態平衡，分人類摎老虎做得在地球項永遠生生不息、代代相傳。
祝福你平安快樂！
你个粉絲
2025年7月29日筆
註釋：
（註1）粉絲：funˊ siiˋ，英文fans的意思。
（註2）一直：rhid chid。
（註3）威風凜凜：vuiˋ fungˋ limˊ limˊ。
（註4）欽羨：kimˋ sienˇ。
（註5）粗殘：cuˋ can。
（註6）四髀兩膁：siˇ biˊ liongˊ rhamˊ。
（註7）食物鏈：shidˋ vudˋ lien+。
（註8）平衡：pin fen。
（註9）天敵：tienˋ tidˋ。
（註10）地毯：ti+ tanˊ。
（註11）森林：semˋ lim。
華語
親愛的老虎先生你好：
我是你的粉絲，從小在故事書還有電視裡看到你威風又帥氣的模樣，就想要寫信給你，不過一直都沒有動筆，直到今年的暑假，我才開始提筆寫信給你，想要和你說我心裡的話。
小的時候，我常常在白紙上畫出你威風凜凜的模樣，我很喜歡你身上黑色的條紋，尤其是額頭上那幾條，看起來就像一個「王」字。每次看到你在寬廣的草原上奔跑，很像在和風比賽，看誰跑得比較快一樣，我很羨慕你有這麼快的速度，也希望自己和你一樣可以跑得這麼快。
你有一雙銳利的眼睛、兩隻靈敏的耳朵，還有四肢奔馳得很快的腳，這些優點讓你成為打獵的高手。雖然你這麼厲害，不過我常常聽到我們人類在你的背後說你的壞話，他們總是說你的個性很兇殘，被你補獵到的獵物很可憐，一定被你撕得稀巴爛。其實人類一點都不了解你，他們根本不知道你是在執行一項很偉大的任務，那就是維持大自然裡食物鏈的平衡。食物鏈如果沒有你的存在，草食動物就少了一個天敵，數量就會增加，到那個時候，草食動物會吃掉很多的植物，植物的數量減少了，又會影響到其他生物的食物來源和生活環境，這些一個接著一個的影響會破壞食物鏈的平衡，引起非常嚴重的生態問題，所以食物鏈不能沒有你啊！
接下來，換我偷偷和你說我們人類的壞話，其實我覺得人類才是最兇殘的。因為人類的貪婪，大量的獵殺老虎，拔下老虎的牙齒做成避邪用的平安符，剝下老虎的虎皮做成高級的地毯，還有把老虎的骨頭拿去磨粉做成藥粉、藥丸，這些完全沒有科學的根據，只是傳統的迷信而已。人類這些惡劣的行為，害你們面臨快要絕種的命運，人類實在要好好的反省啊！
今天是7月29日，也是「全球老虎日」，又叫做「世界愛虎日」，在這個特別的日子裡，我希望人類可以誠心誠意的檢討，不要再非法獵殺老虎了，讓你們可以自由自在的生活在森林裡。地球只有一個，人類和老虎一起生活在這個美麗的地球上，應該要相親相愛，一起合作來維持大自然的生態平衡，讓人類和老虎可以在地球上永遠生生不息、代代相傳。
祝你平安快樂！
你的粉絲
2025年7月29日筆
