文／田燿圻，北埔客家人， 這下戴新竹縣（海陸腔）
有一擺參加藍鵲書房舉辦个北埔行尞地圖講座⸺「尋『撩動心肝』个靚所在」，先生希望逐儕愛分享自家發現能夠分遊客有遶尞摎回憶个景點，最尾上課忒會收集大自家个推薦，做一份「北埔行尞地圖」分遊客照等圖行就尋得著。該量時，堵堵好聽著有個本地人在譫誃時節講著「後背山」，害𠊎心肝嗄分這「後背山」三隻字掣下，黏時摎𠊎拉轉到做細孲仔時節番綻、撩刁，天轉笠嫲花个回憶中。
毋知儕會問「後背山」在哪町？其實「後背山」就係秀巒山，戴廟脣个人輒常會講「廟後背个山」。該廟斯係慈天宮；北埔人最重要个信仰摎文化中心所在。廟頭前个大禾埕摎該一大片个後背山就變成𠊎兜細人仔伴共下搞最好个地方。秀巒山原旦係紀念大隘區（北埔、峨眉、寶山）頭墾戶姜秀巒先生在北埔開山打林後，決定率領眾人在這傳承後代，所以摎北埔重要个「背靠山」改名「秀巒山」，係北埔人个爺哀山。
春天一到，路脣、崎頂開著當鬧滿坪一搭一搭有大紅色、白色、水紅色無斯茄紅色个石榴花摎山景打扮著像形𠖄等羅帕點過胭脂等等愛行嫁个新娘，靚到無息跌忒，山林肚還有幾下頭當珍貴、還生到靚靚个百年大樟樹，所以乜安到北埔人个後花園。好得來臺祖徙到這幸福个山城，分𠊎个生活雖然平凡簡單毋過張等淰淰个快樂。
「後背山」在慈天宮正後背，對大廟行到山頂有當多條細路，𠊎當好順等廟兩片側角狹擳擳个細巷仔，𫟧到大榕樹下蹶上一條嶇嶇个黃泥路走到山肚去。這座山承有𠊎恁多童年難忘个記憶，天時係好密密拶拶个山林，當像一垤大大垤膏上有青、有黃、還有藍色个畫布包等歸座山，金黃色个日頭絲箭到樹椏縫會映出當多生趣个光影分你去揣，頭那臥往上看等天頂親像鑽石樣金晶百亮，會晟到人个目珠擘毋開。
幾下條有大樹好抵涼彎彎斡斡个山路透到山腳下，儘採你擇看愛跺在鋪等青青溜苔个石碫仔抑係蹶礫礫矻矻个黃泥路通盤做得上到崠頂。對𠊎兜這群好搞又還臭奶臊个細孲仔來講，係最湛个遊樂園。路町會經過慈母亭、烈士紀念塔、百碫崎，還有幾下隻做得歇睏尞涼个涼亭，最遠會直直透到一窟草生塞弄弄个大陂塘，做得去冒險摎釣魚仔。實在囥等當多生趣又得人驚个齣事，算乜算毋揫恁多，連睡目發夢斯會聽著像玲琅仔樣朗朗滾个笑聲，毋會停。
逐年年初ㄧ打早，就會看到有人相賽扛等賭檄桌上山頂，桌仔排在大路脣，差毋多有6、7攤，餳該兜連朝斯無食好賭个人，因為三十暗晡起榼在廟坪前搞毋罅吂煞个檄局，擠擠揫在該繼續相㓾拚輸贏。對朝晨頭戰到斷烏蠟燭點等無歇睏，像形傍等矺「帥士相俥馬炮」个棋仔，摎「123456」骰仔歸下放落嘴肚噍噍仔準晝、準夜（註1）食斯毋會枵。
做得講尖毋開人鬧熱煎煎，斷真有過年喜洋洋个景色，除忒北埔，其它地方應該尋毋著這種年俗。逐張桌擠淰淰愛落手个人，𠊎人細細仔又乜強強鑽到桌頭前用兩隻手个手指捉等桌脣抓核核，兩粒圓滾滾、金晶晶个目珠也順等莊家煞猛大聲胲噦「矺矺矺」、「離手」摎「開咧」个聲捩捩轉看到暢靂靂仔，貼貼愛搞到年初三暗晡正會煞棚，還分「後背山」原旦个恬靜。
一到放尞無斯避暑，天矇光就會聽著大人細子成下近成下遠嘰嘰嘎嘎个人聲在巷肚愛行等去山頂遶尞。當記得長透在食飽夜斯遽遽走出碫下湊幾個較好个鄰舍細人仔伴偷偷匿匿打算韶早愛去搞麼个；像偷摘牛眼、䀯在樹後背捉山狗太、𤌍窯、搞囥人尋、搶坐金交椅摎釣魚仔等等，係𠊎兜仰般搞乜毋會悿个。
阿壽伯公在「後背山」裡肚偎崩崗脣該位，種有當大片各種个水果，最餳人食看著斯會流口水个斯係去偷摘該兜生到層層疊疊，墜椏墜桍又大隻又甜到會嘬心个牛眼。毋過，愛先溜下个石䃗，兩儕人遽板像猴仔樣盤籬吊壁一前一後蹶上樹，一儕人爬左手析尾頭去，另外一儕人就爬往上一頭摘一頭緊食驚到會死又生趣，食毋去有伸个就擲往下分還一個搞伴用手摎衫牽起來準袋仔張，摘罅擺咧就煞煞跳下來瀉到祕密基地囥起來放勢食，就毋驚阿壽伯公抑係厥个倈仔擎棍仔逐等打,實在還過願。
還一隻乜係當好搞个斯係去尋金交椅坐，愛用vanˋ zii（猜拳）來決定麼儕先蹶上去，像形做皇帝、做大王樣坐在最頂高，當風神。該位所係在「後背山」唯一一條通到大湖陂塘个黃泥路脣个石壁頂。當好打赤腳在細路仔頂儘採走上走下，腳跺落下該下該腍腍、幼幼、金金个黃泥砂斯會慢慢對腳趾罅爆出來，歸隻腳底貼等地泥實在還涼還鬆爽。
金交椅離地泥大約有6公尺恁高在竳竳个泥壁最崠頂，該係用手在壁面項挖出一細垤淺淺仔凹落去个地方恁像交椅，堵堵好有一息息仔做得分屎朏卡等，毋會跌下去。千難萬難蹶上去後你還愛當細義个用手指捉著壁項兩片脣有凸出來个雜草抑係漯下去个窟像蹶山蹶壁樣先撐等膴身，順等勢慢慢仔摎歸個隻人轉身過來企穩，正做得在驚驚險險中，坐在「金交椅」頂享受一下仔蹶到崎頂的快樂，斯像蹶過「百岳」个得著勝利樣，當暢。
現下這種个景像既經無在咧，賁賁个馬膠鋪淰歸條路通到「秀綠步道」个盡尾，一路分歲月風雨洗到淨淨連一滴仔蹤跡斯無留，害𠊎嗄認毋識，頭過做細孲仔時節識留在山頂該兜無時恬个笑聲係在哪搭仔？看起來愛去睡夢中正尋得轉咧！當毋盼得，連目汁就強強會跌下來！
跈等時間流轉正經係日月如梭，恁多恁多做細人仔時節靚靚个回憶摎故事講毋忒恁多，佢長下會自家流轉在心肚泅來泅去、在頭那、在夢睡中喊醒𠊎。在𠊎囥等个老相簿裡肚也留有一張在過年時節，阿爸阿姆渡等歸屋家人在「後背山」个紀念碑下背翕个相片，成時翻著相片斯會笑咪咪笑到嘴角彎彎，分𠊎再過想著上早（註2）該段無愁無慮，遶尞在「後背山」快樂个老頭擺，還滿足哦！
註釋
（註1）準晝、準夜：當做中餐、晚餐。
（註2）上早：從前。
華語
有一次參加藍鵲書房的北埔散步地圖講座⸺「尋找『怦然心動』的亮點」，老師希望每位上課學員都能分享自己在北埔遊走發現值得讓遊客有回憶及駐足的景點，最終課後會彙集大家的推薦，製作一份北埔散步地圖給遊客按圖索驥找到自己的最愛。課中有位在地朋友不經意用客語提到「後背山」，一瞬間它竟深深撼動我將思緒拉回到四、五十年前，孩提那段悠遊自在，嬉戲好玩的往事中。
小時候都是講去「後背山」玩耍。很多人問「後背山」在哪裡啊？其實「後背山」就是秀巒山，是住在大廟旁邊的人們用客語説「廟後面的山」的説詞。至於是哪座廟？講的是慈天宮；北埔人最重要的信仰文化中心所在地。以前小時候沒有太多的嬉戲場所，大廟前的廣場及後背山就是我們呼朋引伴一起玩耍的最佳去處。秀巒山是為了紀念大隘區（北埔、峨眉、寶山）首墾戶姜秀巒在北埔開疆闢地後決定帶領眾人在此長居繁衍後代而將北埔重要的「背靠山」更名為現在的秀巒山，它是北埔人的父母山。
春暖時節山道旁斜坡綻放一簇一簇紅的、粉紅或紫的杜鵑花將山景妝扮得嬌艷欲滴，美不勝收，林中甚至還保有幾棵碩果僅存尚在生養喘息的百年大樟樹，所以也稱為北埔人的後花園。有幸祖先有遠見搬到幸福山城，讓我們的童年日子過的雖然簡單卻處處洋溢著快樂。
「後背山」座落在慈天宮的正後方，從大廟走到山上有很多曲徑可依著地景來做選擇，而我最喜歡挨著廟旁左右兩側狹隘的巷弄，繞到後面的大榕樹然後延著一條小小陡上的泥土路跑到山上。這是一座承載我所有童年難忘記憶的小山丘，濃密的山林點綴著或青或黃或藍的色調，蓊蓊郁郁滿滿包覆著整座山，在陽光灑滿枝枒縫隙中鑲著點點藍天白雲好似寶石般的璀璨奪目好不刺目。
幾條再也熟悉不過的小徑蜿蜒曲折錯落分佈在山腳下，大伙可循著佈滿青苔的石碫或凹凸不平的黃泥土上到平台。所有路徑都可互相通達，對我們這群毛頭小孩來説是再好不過的大樂園，途中會經慈母亭、列士紀念塔、百碫階梯及幾個歇腳的涼亭，最深遠處甚至可銜接至一池可冒險及垂釣的大湖，盡是藏匿著連睡覺都會夢見，數也數不完充溢著銀鈴般笑聲，驚奇冒險的孩提故事。
每逢過年初一到初三，一早就會看到有人興致勃勃扛著賭桌上山擺在山道上大約會有6、7張，開始吸引著那些好賭的人群因著昨夜除夕在大廟前廣場未完的賭局，聚集在這繼續廝殺。從早上鏖戰到傍晚不歇，連中飯都免了，配著押「帥士相俥馬炮」的棋子及「123456」甩子在嘴裡咀嚼吞入填腹，全身投入。
場面可説是百頭鑽動好不熱鬧，煞是一幅過年歡樂美好的風景，除了北埔其它地方應該沒有這番習俗。雖然每攤都擠滿下手的人，我們個頭小還是頭前身後硬鑚到桌前用雙手手指牢牢抓住桌沿，兩顆流轉不停圓滾滾的眼珠也隨著庒家激情的吆喝聲「押」、「離手」及「開」一起消磨年節消遙時光，一直要持續到初三才會結束。
一到放假日或暑假，天空尚矇矇亮就會有老老少少或近或遠的人聲在山上做著他們喜愛的活動。還記得常常在吃完晚飯就糾集幾個鄰居要好的玩伴規劃明早要去玩的地方，摘龍眼、抓蜥蜴、烤蕃薯、玩捉迷藏、爬金交椅、及釣魚等等是我們再怎麼玩都不會嫌累的遊戲。
阿壽伯公在山後擁有大片山林栽種各式果樹，最引人垂涎的莫過是偷摘層層疊疊，纍纍掛滿樹梢又大又甜入心坎的龍眼。先爬下石頭堆疊陡峭的山坡，由兩人上樹像猴子般敏捷的一人朝左另一人則往右側樹幹攀爬過去邊摘邊吃既驚險又刺驚，多餘的就往下丟到同伴用手撐開上衣下擺充當袋子來裝，採夠了就火速跳下溜到自建的祕密基地躲藏起來，大家盡情開吃，就不怕阿壽伯公或他兒子拿棍子追打我們,太過癮了。
另一處既神祕也好玩的就是去找金交椅坐，用猜拳來決定輪翻爬上去，想像做山大王威風凜凜一人在上，萬般皆下的感覺。那是在後背山唯一一條通往大湖池塘的黃泥土路上，喜歡赤著腳丫在小徑上自在恣意的奔竄，踩下去軟軟的細砂會慢慢地從腳指縫間迸出然後包覆住你的整個腳掌，非常沁涼舒服。
金交椅在離地面大約6公尺高陡峭石壁的最上端，那是用手及石頭在壁面上挖出淺淺的凹處，剛剛好讓屁股有一點點可以卡住。努力艱辛爬上後你還需要很小心的用手指緊抓住左右兩邊壁面上或凸或陷處或抓住雜草似攀岩般來撐住你的身體然後慢慢轉身才可以安安穩穩但驚心動魄的坐在「金交椅」上享受片刻成功攻頂的勝利，如登百岳的凌駕。
現在這種感覺及景像已不復見，厚厚柏油鋪滿整條路一直通到秀綠步道盡頭，沿途已被歲月風雨洗刷得一點痕跡都不留，我已經認不得那曾經遺留在山上的童稚無瑕笑聲的是在哪塊山壁上，看起來只能在夢中尋回，令人唏噓。
隨著時光流淌，好多好多兒時美好的回憶及故事訴説不盡，它竟時時洄流在心中、在腦海、在睡夢裡敲響我。後背山也映著有我和家人在過年時，爸爸跟媽媽帶著我們全家在涼亭旁拍攝下來唯一一幀美滿幸福的照片在相簿中被珍藏著。偶爾翻閱，嘴角不自覺就會泛起滿滿的笑容，讓我再一次神遊在過去那段無憂無慮，徜佯在「後背山」懷抱的舊時光，好滿足哦！
