文／巫素萍，桃園人，國小先生（海陸腔）
還記得該係雙十節前一暗晡，外背落水落到滴滴溚溚，吾老公个耳空當利，佢聽著屋前圍牆肚个花缽有貓仔在該噭，佢講：「你兜試聽看啊﹗係毋係有貓仔在該緊噭？𫣆俚去花缽該看看啊好無？」
歸屋人去到花缽該尋看有貓仔無？無想著正經有一條貓子在花缽肚細細聲喊，厥姆在圍牆頂看著𫣆俚開門出來，黏皮斯跳出去，就像佢摎貓子送分𠊎兜共樣，做得安心離開，毋使煩惱畜毋起貓子咧﹗
大家七手八腳，遽遽摎貓子揇落屋肚，正一隻手巴掌恁大个貓子，歸身泥棍棍，驚到激激顫，𠊎細心細意用燒水摎佢洗身，洗出滿地泥个泥漿水，洗好摎佢捽燥，愛用吹風機吹佢該下，佢又驚到愊愊掣，𠊎又安慰佢毋使驚，開細細个燒風摎佢个毛吹燥來。
人講：「捉貓子，看貓嫲。」𫣆俚還吂看清楚貓嫲生到仰般，厥姆斯決定摎嘴肚含等个貓子，掉到吾屋下，這正經係有緣來相會哪﹗吾老公講既然係貓嫲送來个貓子，表示佢相信𫣆俚歸屋人會好好照顧佢个細孲仔，該斯當然愛畜佢、惜佢、照顧佢哩喲﹗
吾家娘看等這條目珠大大粒，額頭像英文字母「M」个花紋，當得人惜个花貓子，佢隨口就講：「就喊佢來爾富好啦﹗佢來到𠊎屋下，就係為𠊎兜帶來財富啊﹗」
從該日開始，來爾富正式係𠊎兜个「屋下人」哩喲﹗從佢尛尛仔飼佢食奶，拿紙巾仔搵滴仔暖暖个水，輕輕捽佢个胠罅下，刺激分佢屙尿、屙屎，到佢自家會去貓砂盆跍便所、食飼料，好久好久摎佢洗身，雖然逐項都係大工程，好得家娘全心照顧佢，無幾多隻月，佢斯緊來緊大條哩。
來爾富當精，你若係喊佢个名，佢斯知係在該喊佢，成時乜當調皮，跳到高高个所在，麼个空佢乜鑽入去，滿哪仔去「巡邏」，歸間屋全部係佢个「領土」，成時佢係當歡喜，還會飆上飆下，像人在屋肚開運動會共樣。
佢食飽用貓爪洗面該下，毋好人嬌惹佢；下把佢會偎兼人个膴身，愛人輕輕用手摎佢「梳毛」，佢會發出「呼魯呼魯」个聲。這隻貓嫲送來个「等路」，係完屋人个心肝仔，帶來淰淰个「財富」摎歡喜。
華語
還記得那是雙十節前的一個晚上，外面下著滴滴答答的雨。我老公的耳朵很靈敏，他聽到屋前圍牆那裡的花盆有小貓在哭叫，他就說：「你們聽聽看！是不是有小貓一直在叫？我們去花盆那裡看看好不好？」
全家人一起到花盆那裡尋找有沒有小貓？沒想到真的有一隻小貓在花盆裡小聲哭喊著。牠的媽媽在圍牆上一看到我們開門出來，立刻就跳了出去，就像是牠特地把小貓送給我們一樣，終於可以安心離開，不用再煩惱養不起小貓了！
大家七手八腳，趕緊把小貓抱進屋裡。才一個手掌心這麼大的小貓，全身都是泥巴、髒兮兮的，嚇得全身不斷發抖。我小心翼翼地用溫水幫牠洗澡，洗出滿地的泥巴水；洗好後幫牠擦乾，要用吹風機吹乾時，牠又嚇得心驚肉跳。我趕忙安慰牠不要害怕，開著小小的溫風把牠的毛給吹乾。
俗話說：「抓小貓，看貓媽媽。」我們都還沒看清楚貓媽媽長得什麼模樣，牠就決定把嘴裡含著的小貓，叼來丟在我們家，這真的是有緣來相會呀！我老公說，既然是貓媽媽送來的小貓，表示牠相信我們這家人會好好照顧牠的小孩子，那當然要養牠、疼牠、照顧牠囉！
我的婆婆看著這隻眼睛大大顆、額頭有著像英文字母「M」的花紋，非常討人喜歡的花貓，隨口就說：「那就叫牠來爾富好了！牠來到我們家，就是為我們帶來財富呀！」
從那天開始，來爾富正式成為我們的「家人」囉！從牠還小小隻、餵牠喝奶開始，拿著紙巾沾點溫水，輕輕擦拭牠的胯下，刺激牠排尿、排便，直到牠自己會去貓砂盆蹲廁所、吃飼料，隔一陣子幫牠洗一次澡，雖然每件事都是大工程，幸好有婆婆全心全意照顧牠，沒幾個月，牠就越長越大隻了。
來爾富非常聰明，你若是叫牠的名字，牠就知道是在叫牠；有時候也很調皮，喜歡跳到很高的地方，什麼洞牠都要鑽進去，到處去「巡邏」，整間房子全都是牠的「領土」。有時候牠太開心，還會在家裡衝過來、衝過去，好像在屋子裡開運動會一樣。
牠吃飽用貓爪洗臉的時候，不喜歡別人去招惹牠；有時候牠會依偎在人的身體旁邊，想要人輕輕用手幫牠「梳毛」，這時牠就會發出「呼嚕呼嚕」的聲音。這隻貓媽媽送來的「禮物」，是全家人的心肝寶貝，為我們帶來了滿滿的「財富」與歡喜。
