文／鍾鳳珠，客語薪傳師，桃園市楊梅人，現居楊梅埔心（海陸腔）
𠊎熟識，一個幼兒園个園長，同時抑係花園个園長，幼兒園裡肚个花花、草草、大樹摎細樹，總係照顧到當靚，提供小朋友，舒適學習成長个環境，分小朋友有自然个饗宴，佢抑係菜園个園長，除了帶領園肚个先生、小朋友體驗種包粟、種菜頭、番薯這兜快樂、生趣个經驗，還摎菜照顧到當大頭、當營養，做得提供自家園肚个小朋友享用。
佢講自家係客家人，有傳承語言、文化个責任，所以，長透在特別个節日該下，渡等園肚个先生摎小朋友融入客家文化，比論講伯公生日，請先生摎小朋友，共下去伯公下拜伯公，還請家禮先生，紹介仰般敬伯公，請小朋友跌聖筊，對信仰無共樣个家庭，毋會強求，斯分佢知，生活當中有無共樣个文化。
天穿日个時節，除了分小朋友知典故由來，還會渡等先生、小朋友用粄印做五色粄。清明時節，就分園肚个小朋友打艾粄。
五月節會渡等小朋友，熟識艾仔、菖蒲這兜，掛在門口避邪逐蚊逐蟲，還有䌈客家粽。八月半分小朋友做卵黃酥，冬節分小朋友挼粄圓、唱冬節歌謠，到摘大菜个時節，分小朋友體驗頭擺農業社會，用腳跺鹹菜。做鹹菜个過程，年下時小朋友挖番薯、𤌍窯，這兜總下个體驗，分小朋友在食个時節，總係會特別珍惜摎歡喜，還有，在過年前，還會教逐個小朋友，用客語講吉祥話拜年，摎園長領紅包噢！
園長還有一粒大大个膽，敢承擔，盡有創新个想法，行在時代个前頭，跈等時行，佢想愛做个事情，定著認真煞猛去完成。
今年个1月17，園長帶領地球項最強个團隊。在新屋永安漁港，當成功个舉辦了，第一屆宇宙盃迷你馬拉松比賽。
比賽前，輒輒訓練小朋友个體力，園長、先生輒常在園肚、就近个陂塘䃗練習走追仔、鍛煉，分逐個小朋友都有砸磳个身體，做得參加比賽。
比賽前一日，用小朋友、先生摎園長自家種个菜頭炊菜頭粄，做熝湯粢、粢粑摎發粄這兜个客家美食，做盡提供分第二日參加比賽个大、小朋友享用，分佢兜沉浸在客家味緒裡肚，佢就係新學屋、新奇屋幼兒園認真又煞猛个彭桂容園長。
華語
我認識，一位幼兒園的園長，同時也是花園的園長，幼兒園裡的花花、草草、大樹、小樹總是照顧得很漂亮，提供小朋友，舒適學習成長的環境，使得小朋友們有自然的饗宴，她也是菜園的園長，除了帶領園裡的老師、小朋友體驗種玉米、種蘿蔔、番薯等等的樂趣經驗，還把菜照顧的肥美營養，可供自己園裡的小朋友享用。
她說自己是客家人，有傳承語言、文化的責任，所以，常在特別的節日時，帶領園裡的老師及小朋友融入客家文化，例如土地公生日時，請老師及小朋友們，一起到土地廟去拜土地公，還請家禮老師，介紹如何敬拜土地公，請小朋友擲聖筊，對於信仰不同的家庭，不強求，就讓其知道，生活當中有不一樣的文化。
天穿日時，除了讓小朋友知道典故由來，還會帶領老師、小朋友用粄模製做五色粄。清明時節，就讓園裡的小朋友做艾草粄。
端午節會帶著小朋友，認識艾草、菖蒲等，掛在門口避邪驅蚊蟲的植物，還有包客家粽。中秋節讓小朋友體驗做蛋黃酥，冬至，讓小朋友搓湯圓、唱冬至歌謠，到了芥菜採收時，讓小朋友體驗以前農業社會用腳踩酸菜，製作酸菜的過程，年底時小朋友挖番薯、焢窯，這些總總的體驗，讓小朋友在食用時，總是特別珍惜及喜愛，還有，在過年前，還會教每位小朋友，用客語說吉祥話拜年，向園長領紅包喔！
園長還有一顆大大的膽子，敢承擔，很有創新的想法，走在時代的尖端，跟上流行，她想要做的事情，一定認真執著的去完成。
今年的1月17日，園長帶領著地表最強的團隊。在新屋永安漁港，很成功的舉辦了，第一屆宇宙盃迷你馬拉松比賽。
賽前，常常訓練幼兒的肌力，園長、老師常在園裹或附近陂塘的坡上練習跑步、鍛煉，讓每位小朋友都有強壯的體魄可以參加比賽。
比賽前一天，用小朋友、老師及園長自己種的蘿蔔蒸蘿蔔糕，做熝湯粢、粢粑和發糕等等的客家美食，全部提供給第二天參加比賽的大、小朋友、享用，讓他們都沉浸在客家美味中，她就是新學屋、新奇屋幼兒園認真又努力的彭桂容園長。
