文／簡雅麗
桃園人，客語文薪傳師、社大講師、國小客語先生（四縣腔）
「客家庄好地方，茶園滿山岡，鵝鴨滿陂塘，青山綠水好風光……」每擺聽著這首童詩，𠊎總會想起細个時節戴个所在。該位正經係當靚个客家庄，有山有田有茶園。行在路項，輒輒會看著雉雞、兔子在路項走相逐。農事做忒，吾爸就會去捉蝦公、魚仔、蛤蟆，下把還會捉著蛇哥轉來加菜。該央時𠊎自家都毋知，原來𠊎自細時食个，就係最天然个山珍海味。
一條山路自崎頂溜啊下，第一間灰瓦紅磚个伙房屋就係吾屋下。屋前有禾埕，後背有竹林，寒天燒暖熱天涼。企在崎頂遠遠看啊去，青油油个禾田連等遠遠个山，白鶴仔飛過就像一幅畫；等到禾仔黃了，金黃个禾浪花，牛嫲帶子落陂塘，該種安靜个靚，係城市人體會毋著个福氣。
吾屋下係佃農，緊工个時節，𠊎這兜細孲仔乜愛𢯭手。送點心、晒穀、收穀，𠊎國小時就做得在田塍路項用自行車仔載穀包，實在還「慶」！爺哀教𠊎三姊妹愛煞猛，大人若係無閒，細孲仔就愛自動行兼來𢯭手，縈草結、煮飯、餵豬餵雞鴨，大家輪等做，無人會推懶，這就係客家人講个「家和萬事興」。
該央時个生活較苦，無零嗒好食，屋脣野生个「雉雞卵」挖出來，洗淨俐就做得生食，脆脆甜甜，大家食到歡喜靂天。平常食自家種个米摎菜，等過年過節正有肉好食，人講「少食多香味」，𠊎兜當惜福。頭擺無錢買玩具，全部自家做，大大个樹屋、細細个燈籠，鋸樹枋、釘鐵釘，全在國小就學到當會了。
逐擺放學，功課寫忒就瀉出去尋同學，共下騎自行車滿哪走。拈揚尾仔、打草蜢、灌土狗，無就去田項揙湖鰍仔、捉𧊅仔，抑係去河壩釣魚覓蜆仔。長透在大自然肚搞到毋記得轉屋，逐日都當快樂! 想起頭擺該段無愁無慮个時光，真係𠊎一生人最幸福个歲月。
國中後搬到鬧熱个大路脣，無山無水，淨有當吵个車仔聲，目珠嗄變近視，愛仰結煞正好？上擺轉去看老屋，早就分草仔揞忒，鄰舍乜全搬走了，只伸著回憶留在吾心肝肚。雖然老屋會舊，毋過該段在伙房屋下、田路項个純真時光，永遠係𠊎心頭最燒暖个記憶。
華語
「 客家庄好地方，茶園滿山岡，鵝鴨滿埤塘，青山綠水好風光……」每次聽到這首童詩，我總會想起小時候住的地方。那裡真的是很美的客家庄，有山有田有茶園。走在路上，常常會看到雉雞、兔子在路上賽跑。農事做完，我爸爸就會去捉蝦子、魚、田雞，偶爾還會抓住蛇回來加菜。當時我自己都不知道，原來我從小時吃的，就是最天然的山珍海味。
一條山路從坡頂貫穿下來，第一間灰瓦紅磚的三合院就是我的家。屋前有曬穀場，後面有竹林，冬天溫暖夏天涼。站在坡頂遠遠望去，綠油油的稻田連著遠方的山，當白鶴飛過，美的就像一幅畫；等到稻子黃了，金黃的稻浪花，牛媽媽帶小牛進池塘，那種安靜的美，是城市人體會不到的福氣。
我家是佃農，農忙期間，我們這些小孩也要幫忙。送點心、曬稻穀、收穀，我小時就能在田埂路上用腳踏車載穀包，真的很「厲害」！ 父母教我三兄妹要勤奮，大人若是沒空，小孩就要自動來幫忙，繞草結、煮飯、餵豬餵雞，大家輪流做，沒人會偷懶，這就是客家人說的「家和萬事興」。
那時的生活比較艱苦，沒零食可吃，屋旁野生的「腎蕨」挖出來，洗乾淨就可以生吃，脆脆甜甜，大家吃得高興極了。平常吃自己種植的米和菜，等過年過節才有肉吃，人家說「少吃多香味」，我們都很惜福。以前沒錢買玩具，全部自己做，大大的樹屋、小小的燈籠，鋸木板、釘鐵釘，全在小學就學到很熟練了。
每次放學後，功課寫完就跑出去找同學，一起騎自行車到處跑。抓蜻蜓、打蚱蜢、灌蟋蟀，不然就去田裡抓泥鰍、捉螃蟹，不然就去河邊釣魚找蛤蜊，常常在大自然裡玩到忘記回家，每天都很快樂! 想起以前那段無憂無慮的時光，真是我一生中最幸福的歲月。
國中後搬到熱鬧的大路邊，無山無水，只有吵雜的車聲，和變成近視的眼睛，該怎樣麼辦才好？上一次去看老家時，已被雜草掩蓋，鄰居也都搬走，只剩下留在我心中的回憶。雖然老家會變舊，但那段在三合院下、田埂路上的純真時光，永遠是我心中最溫暖的記憶。
