文／李文煥，國中特教先生，苗栗縣客家人（四縣腔）
結果，貓頭鳥飛上去天頂捩兩圈，又斡頭飛轉阿文牯个肩頭企等毋肯走，阿文牯笑等問：「細鳥仔！你係毋係毋盼得𠊎，想愛歇在吾屋下？」吂知，貓頭鳥正經緊頷頭表示愛留下來。阿文牯看着貓頭鳥頷頭，歡喜到耐毋得，煞煞搭一間細樹棚仔分佢戴。日時頭貓頭鳥驚光，會囥在樹棚仔裡肚歇睏，暗晡頭貓頭鳥肚飢，自家會飛出去絡食。從此，阿文牯就像多了一個家人，因為有貓頭鳥做伴，日仔雖苦乜試着甘甜。
有一日，阿文牯轉夜較慢，趕緊入屋愛煮分阿姆食夜。正踏入屋肚就發覺無共樣，歸屋仔撿揫到淨淨俐俐，飯菜乜煮好擺到桌頂了。阿文牯恅着係阿姆个痴呆病好了，遽遽走過去看阿姆，結果發覺阿姆還係共樣迷迷痴痴，單淨講日時有人來照顧佢。恁樣有人拚掃煮飯个怪事，連續發生幾下日。毋過，阿文牯逐日轉夜就係無看着係麼人，有一日阿文牯挑勢提早轉屋，正經就畀堵着有人在灶下煮食。阿文牯問：「細阿妹仔！你係麼人？仰會來吾屋下𢯭手？」」細阿妹著驚斡頭看過來，佢有一對圓圓个大目珠，生到當得人惜。細阿妹仔講：「阿文牯!𠊎就係你救轉來个貓頭鳥，𠊎係山肚个精靈，貓頭鳥係吾原形，天公派𠊎在山肚用叫聲喊醒該兜分魍神迷忒个人。」
細阿妹仔續等講：「半年前，魍神化做細妹仔个形投來尋𠊎報冤仇，魍神就係若大嫂，佢唆慫若哥在背後射傷𠊎。佢利用若哥个貪心，先用迷術控制佢个心性，又摎若姆變做痴呆，再過逐你兩子哀搬出去戴。該日𠊎著傷當傷重（四縣腔：songˊ dong，很嚴重的意思），拚命仔飛正分𠊎走過詐。臨天光該時，吾个法力伸無幾多，險險就會消忒。該載，堵着好心个你摎𠊎救轉來。」
阿文牯嚇著講：「麼个!𠊎嫂係魍神!該仰結煞，你有辦法救醒吾姆同吾哥無？」貓頭鳥姑娘講：「為着報答你救命个恩情，𠊎拚老命乜會救醒佢兩儕。」續下來，貓頭鳥姑娘來到阿文牯个阿姆面前，搖身變轉貓頭鳥，開嘴發出咕～咕～个聲哨。本旦昏哆昏哆个阿姆，聽啊着叫聲黏時清醒過來。阿姆：「仙女!恁仔細!感謝救醒𠊎。」吂知阿姆嗄跪下來噭：「仙女，拜託你救吾大倈仔好無？佢定著乜係分魍神迷着了。」貓頭鳥姑娘講：「阿姆仔，遽䟘起來，𫣆這下就去救大哥。」
三儕轉到老屋，入門就看着大哥橫在壁角歸嘴蟲仔，魍神變个大嫂舂出來摎貓頭鳥姑娘鬥法，包尾魍神打毋贏斡頭瀉走。毋過，貓頭鳥姑娘乜好無哪去，歸身仔著傷法力伸無幾多，盡後還係拚命仔救醒大哥。貓頭鳥姑娘殗殗講：「阿文牯！𠊎這擺著傷當重法力無忒了，一百年變毋轉人形了，愛轉深山裡肚重新修鍊。𠊎無法再聽你講心事了，你愛好好照顧自家。再見!」咕咕！咕咕！話講煞，變轉貓頭鳥飛向遠方。
華語
結果，貓頭鷹飛到天上轉了兩圈，又轉頭飛回阿文的肩頭站著不肯離去，阿文笑著問：「小鳥兒！你是不是捨不得我，想要住在我家呀？」沒想到，貓頭鷹真的一直點頭表示要留下來。阿文看着貓頭鷹點頭，高興到不得了，趕緊搭一間小樹屋給牠住。白天貓頭鷹怕光，會躲在樹屋裡面休息，晚上貓頭鷹肚子餓了，自己會飛出去覓食。從此，阿文就像多了一個家人，因為有貓頭鷹的陪伴，日子雖苦也覺得甜蜜。
有一日，阿文傍晚回家遲了點，急忙進家門要煮晚餐給母親吃。正踏入屋裡就發覺不一樣，家裡整間整理到乾乾淨淨，飯菜也煮好擺在桌上了。阿文以為是母親的痴呆病好了，快快跑去看母親，結果發覺母親還是一樣迷迷糊糊，只是說到白天有人來照顧她。這樣有人打掃煮飯的怪事，連續發生好幾天。然而，阿文每天傍晚回家仍是沒有看到是誰，有一天阿文故意提早回家，真的就給他遇到有人在廚房煮飯菜。阿文說：「小阿妹!你是誰？怎麼會來我家幫忙？」細阿妹驚嚇轉頭望過來，她有一雙圓圓的大眼睛，長得很可愛。小阿妹說：「阿文!我就是你救回來的貓頭鷹，我是山裡的精靈，貓頭鷹是我的原形，天公派我在山裡用叫聲喚醒那些被魍神迷住的人。」
小阿妹接著說：「半年前，魍神化做年輕女人的樣子來找我報仇，魍神就是你的大嫂，她唆使你哥在背後射傷我。她利用你哥的貪心，先用迷術控制他的心神，又把你母親變成痴呆，然後趕你們兩母子搬出去住。那天我受傷很嚴重，拚命飛才讓我跑逃脫。天快亮那時，我的法力剩沒多少，差點就會死掉了。僥倖，遇著好心的你把我救回來。」
阿文驚訝說：「什麼!我嫂嫂是魍神！那怎麼辦是好，妳有辦法救醒我媽和哥嗎？」貓頭鷹姑娘說：「為了報答你救命的恩情，我拚了老命也會救醒他們倆。」接下來，貓頭鷹姑娘來到阿文的母親前面，搖身變回貓頭鷹，張口發出～咕～的聲音。本來迷迷糊糊的媽媽，聽到叫聲馬上清醒過來。阿文媽媽說：「仙女！謝謝妳!感謝救醒我。」哪知阿文媽媽卻跪下來哭：「仙女，拜託你救我大兒子好嗎？他一定也是被魍神迷住了。」貓頭鷹姑娘講：「嬸嬸，趕緊起來，我們現在就去救大哥。」
三人回到老家，一進門就看到大哥倒在牆角滿嘴蟲子，魍神變的大嫂衝出來和貓頭鷹姑娘鬥法，最後魍神打不過轉頭就跑。然而，貓頭鷹姑娘情況也不妙，全身都有傷法力剩沒多少，最後還是拚命救醒大哥。貓頭鷹姑娘有氣無力的說：「阿文！我這次受傷極重法力全無了，一百年間無法再變成人形了，要回到深山裡去重新修鍊。我不能再聽你講心事了，你要好好照顧自己。再見！」咕咕!！咕咕！話說完，變回貓頭鷹飛向遠方。
