文／李文煥，國中特殊教育教師，苗栗客家人（四縣腔）

𠊎係中華視障教育學會个秘書長李文煥。在2020年𠊎得着總統教育獎；今年又拿着第十屆星雲教育獎。打幫得獎新聞報導个時節，𠊎發起了「二手iPhone助盲計畫」。因爭𠊎國中該央時著着罕見症頭「雷伯氏症」，故所這下目珠青瞑伸一分目。有當多人摎𠊎共樣，歸日仔生活在一片烏暗裡肚。看毋着這世界，對一儕人个影響當大，毋單淨食頭路、讀書，還有基本个生活都項項難；毋使講出門會堵著幾多困難，還過同人聯絡乜有盡多障礙。故所𠊎想愛摎佢兜𢯭手，分佢兜在生活肚有法度照顧自家、做得融入社會裡肚。

𠊎在2020年發起「募集二手iPhone助盲計畫」，原因係智慧型手機仔當利便，毋單淨做得𢯭手目瞨个鄉親解決當多生活肚个困難，還係一種增加同世界接觸个工具，乜分佢兜毋使項項都偎凴別人。做麼个愛募集iPhone毋係安卓个手機仔呢？因爭iPhone裡肚个「口白」功能，做得摎螢幕頂項个文字朗讀出來，還過無共樣个手勢摎佢撳下去，就會有無共樣个功能，比將講：盲目仔用兩隻手指點兩下螢幕，黏時就做得接電話、掛電話、聽音樂。雖然ANDROID系統乜有語音个功能，毋過逐款手機仔个情況無共樣，在處理事情个時節，有成時還愛別儕人來𢯭手。

同時，摎iPhone安該兜APP，對視障朋友來講乜盡好用，比將講「台灣等公車」這APP，做得解決盲目仔在外背行還過坐車个問題，還有兜APP做得𢯭手辨識紙票幾多錢、脣項个物品係麼个等等，故所現下市面上賣个手機仔，還係iPhone系統个設計，對目瞨个鄉親在使用上較利便、較友善，乜較有幫助。毋過iPhone手機仔毋係逐個視障朋友都有才調買，正會有這項募集二手手機个計畫出現，希望做得分較多人來發揮愛心，捐出自家無需要過用着个舊手機仔，共下幫助在烏暗中个盲目仔，亻恩俚共下點一盞生命肚个明燈，分佢兜較有信心、較有勇氣，做得較堅強兜仔來面對未來个生活同挑戰，乜補足佢兜在生活肚當多个遺憾，一支在屋下無用著个手機仔，就可能會改變一個目瞨鄉親个世界。

𠊎當感謝台灣應用材料科技公司在前年響應這計畫，歸公司个工程師總共捐出60支二手iPhone 7，今年又再過捐出45支二手iPhone 8 Plus送分全台个視障朋友摎視障學生仔，還有當多捐出手機仔个好朋友，佢兜个愛心，正經使人感動。未來亻恩俚還會繼續同企業合作，也鼓勵大家發揮愛心，捐贈二手手機仔。目前手機仔个版本係6S以後个都做得用哦。現下這個「募集二手iPhone助盲計畫」還當在該進行，還愛大家共下來𢯭手支持。係講，大家有想愛捐二手iPhone歡迎同中華視障教育學會聯絡。

華語

我是中華視障教育學會的秘書長李文煥。在2020年我獲頒總統教育獎；今年又獲頒第十屆星雲教育獎。藉著得獎新聞報導的時候，我發起了「二手iPhone助盲計畫」。因為我在讀國中的時候罹患了罕見疾病「雷伯氏症」，所以現在眼睛的視力僅剩0.1。我知道還有許多人跟我一樣，整天都生活在一片黑暗之中。看不到這個世界，真的對一個人的影響很大，不只在工作上、讀書方面，還有基本的日常生活都是樣樣艱難；就不用提出門會遭遇到多少困難了，還有跟人聯絡也有許多障礙。所以我想要幫他們的忙，使他們可以跟外界聯絡、讓他們在生活中可以照顧自己、可以成功的融入社會裡。

我在2020年發起「募集二手iPhone助盲計畫」，原因是因為智慧型手機很方便，不只可以幫助盲人解決許多生活中遇到的困難，還是一種讓盲人可以增加跟世界接觸的工具，也讓他們無須事事都依賴他人。那為什麼要募集iPhone而不是安卓手機呢？這是因為iPhone裡面有「旁白」功能，可以將螢幕上的文字朗讀出來，還有，用不一樣的手勢點擊螢幕，就會有不一樣的功能，例如：盲人用兩隻手指頭點兩下螢幕，馬上就可以接電話、掛電話及聽音樂。雖然ANDROID系統也有語音的功能，不過每款手機的情況不一樣，在處理事情的時候，有時候還是需要仰賴他人的幫忙。

同時，用iPhone安裝一些APP，對盲友來說也是相當實用的，例如「台灣等公車」這個APP，可以解決盲人在外行走和搭車的問題，還有些APP可以協助辨識紙鈔的面額、周遭的物品是什麼等等，所以目前市面上賣的手機中，還是iPhone系統的設計對盲人在使用上較為方便、友善，也比較有幫助。

不過iPhone手機並不是每個盲人朋友都買得起的，才會有這項募集二手機的計畫出現，這個計畫是希望可以讓更多人來發揮愛心，捐出自己家中不會再用到的舊手機，一起來幫助生活在黑暗中的盲人朋友，我們一起為盲友點一盞生命中的明燈，讓他們更有信心、更有勇氣，可以更堅強的來面對未來的生活及挑戰，也補足他們在生活中許多的遺憾，一支在家裡用不到的手機，卻可能會改變一個盲友的世界。

我非常感謝台灣應用材料科技公司在前年響應這個計畫，全公司的工程師總共捐出了60支二手iPhone7，今年又再捐出45支二手iPhone8 Plus送給全台的視障朋友跟視障學生們，還有許多捐出手機的好朋友，他們的愛心，真的讓人很感動。

未來我們還會繼續跟企業合作，也鼓勵大家發揮愛心，捐贈二手手機。目前手機的版本是6S以後的都可以用哦！現在「募集二手iPhone助盲計畫」還在持續進行，還需要大家一起來支持。如果大家有意願要捐贈二手iPhone手機，歡迎跟中華視障教育學會聯絡。