文／李文煥，苗栗縣客人，國中特教教師，客語薪傳師（文學類、語言類），現下戴苗栗（四縣腔）
上隻月，𠊎在苗栗國中个舞蝶館，負責講一場特殊教育研習。下晝一點過後，對各鄉鎮來个先生陸陸續續行入教室。課程起勢，𠊎講：「歡迎各位先生抽間來上課。大家敢知清朝時節講个『苗栗八景』，在外背運動坪就係看第一景盡好个地點？」有先生應：「第一景係麼个？」𠊎笑等講：「三台疊翠。」
𠊎在這讀國中个時節，逐日盡好看个就係「三台疊翠」。天時好个時節，目珠向東片望出去，遠遠个山一層接等一層，山光隨等日頭个高度緩緩仔變化：朝晨頭係淡淡个青，當晝頭係深深个綠，臨暗仔又係另一種光景。清朝个《苗栗縣志》卷一，有畫「三台疊翠」个圖，志書裡肚乜有當時个文人為這景色寫下个詩。
謝錫光寫：「層巒突兀列三台，深翠鮮明萬疊堆；最愛山光新雨後，嫣然如畫笑顏開。」𠊎十分中意「萬疊堆」這三隻字。苗栗个山從來毋係一座一座分開个，遠遠看啊過，山連等山十分个靚。係講落雨過後，雲氣在山个囊腰仔浮來浮去，山色時明時暗，確實有「嫣然如畫」个意境。
謝維岳寫：「遙望三台勢不齊，重重疊疊翠雲迷。北連五指探驪手，南掛雙峰步月梯。」山勢高高低低，若係雲霧起來，確實有一種「翠雲迷」个景致。詩中又註明筆架山、墨硯山在三台山下。對頭擺个讀書人來講，山勢、讀書、文章，在佢兜心肚項係分毋開个。
劉少拔个〈三台疊翠〉寫到當有氣勢：「天遣名山來作鎮，地開荒島此維翰。」曾肇楨乜寫：「萬道嵐光通北極，三台精氣毓東山。」對先前个人來講，山係苗栗个屏障，掌等地方个氣勢；對後來个人來講，山係生活个背景。城市變來變去，路變了，屋變了，人乜變了；毋過斡頭向東片看，山還係恬恬在該位。
對遠山，看著家鄉；對古詩，看著前人；對記得个山光，乜看著一座城市一路行來个變化。謝錫光講「最愛山光新雨後」，山光逐擺看都會有一息仔無共樣。毋過有一項係共樣个——山還在，三台疊翠乜還在。頭擺人看著个山，經過一代又一代，還恬恬仔企在苗栗東片，等後來个人臥頭看這片山色，等𫣆俚寫下山光雲影个詩句。
三台疊翠
上個月，我在苗栗國中的舞蝶館，負責主講一場特殊教育研習。下午一點過後，來自各鄉鎮的老師陸陸續續走進教室。課程開始，我說：「歡迎各位老師抽空前來上課。大家知不知道清朝時期所說的『苗栗八景』，外面的運動場就是觀賞第一景最好的地點？」有老師回應：「第一景是什麼？」我笑著說：「三台疊翠。」
我在這裡讀國中的時候，每天最喜歡看的景象就是「三台疊翠」。天氣好的時候，眼睛向東邊望過去，遠處的山一座接著一座，山色隨著太陽的高度緩緩變化：清晨是淡淡的青，中午是濃濃的綠，到了榜晚又是另一種光景。清朝的《苗栗縣志》卷一裡，畫有「三台疊翠」的圖，志書中也有當時的文人為這片景色所寫下的詩句。
謝錫光寫道：「層巒突兀列三台，深翠鮮明萬疊堆；最愛山光新雨後，嫣然如畫笑顏開。」我非常喜歡「萬疊堆」這三個字。苗栗的山從來都不是一座一座孤立分開的，遠遠看過去，山連著山，非常美麗。若是下過雨後，雲霧在山腰間飄來盪去，山色忽明忽暗，確實很有「嫣然如畫」的意境。
謝維岳寫道：「遙望三台勢不齊，重重疊疊翠雲迷。北連五指探驪手，南掛雙峰步月梯。」山勢高低起伏，如果雲霧竄起，確實有一種「翠雲迷」的景致。詩中還特別註明筆架山、墨硯山就在三台山下。對以前的讀書人來說，山勢、讀書與文章，在他們心中是密不可分的。
劉少拔的〈三台疊翠〉寫得非常有氣勢：「天遣名山來作鎮，地開荒島此維翰。」曾肇楨也寫道：「萬道嵐光通北極，三台精氣毓東山。」對以前的人來說，山是苗栗的屏障，守護著地方的氣勢；對後來的人來說，山則是生活的背景。城市不斷變遷，路變了，房子變了，人也變了；然而轉過頭向東邊看去，山依然靜靜地立在那裡。
從遠山，看見了家鄉；從古詩，看見了前人；從記憶中的山光，也看見了一座城市一路走來的變化。謝錫光說「最愛山光新雨後」，山光每次看都會有一點點不一樣。不過有一點是一樣的——山還在，三台疊翠也還在。以前的人所看到的山，經過了一代又一代，依然靜靜地矗立在苗栗東邊，等待著後人抬頭看這片山色，等待著我們寫下山光雲影的詩句。
