文／吳美成，苗栗市客家人，戴新北。台北客家文化基金會客家書院講師，新北市多所學校客語教師（四縣腔）
九十大零歲个魏先生係𠊎高中个班導師，因爭佢也係一個細妹教官，做事嚴條，大家都多少仔驚佢。畢業恁久，聽講佢坐等啄目睡（註1）嗄跌倒，幾隻老同學約好去看佢，好得無傷重（註2），佢還誚㸐（註3）自家，想試看啊骨頭有罅（註4）硬程（註5）無？大家正發現先生仰恁親切又古琢？！𠊎黏時發現先生係一隻得人惜个寶！故所𠊎還會想輒輒來聽佢分享人生个智慧。
第二擺，𠊎一儕人帶等豬腳炆竹筍，還有兩條萋萋个菜瓜來尋先生打嘴鼓。一看著菜瓜，魏先生黏時愐著頭擺屋下請个歐巴桑（註6）。佢講：「歐巴桑盡好煮菜瓜，因為菜瓜味緒特殊，毋使味素都做得煮出好料理，摎別个食材攞合（註7）乜共樣好食」，先生笑等講：「𫣆俚做人就愛像菜瓜，有特色又𢯭眾（註8），生活正會自信又自在！」
菜瓜講煞，牽出另外一隻古。學生仔同先生報告—有一個同學逐擺都毋拿飯包出來蒸，先生問出原因， 原來係佢淨裝一半白飯，正會敗勢拿出來。教官揬（註9）學生講：「以後上學先到先生宿舍來，拿飯篼仔分歐巴桑裝菜，保證逐日盡少會有一粒卵好張（裝）」。初下碼，學生一知歐巴桑摎厥姆係共莊人，就踩踩踏踏（註10）毋敢去，驚怕厥姆會罵。先生教佢：「就係因爭熟事，還較毋使細義，歐巴桑定著會像自家人樣仔對你相惜！」
有一擺，學校辦家長會，這隻學生想著厥姆著等爛衫爛褲來， 試著當慍悴（註11），無愛分厥姆來。先生話（註12）佢：「有錢人分子女讀書當正常，若姆恁艱苦，做泥水工還煞猛繳你讀書，表示佢希望你好好讀書改變命運，若姆正係盡了不起个，你還較愛賢孝阿姆正著啊！」
學生聽了後，遽遽轉屋同阿姆揇緪緪，緊噭緊會失禮。提供飯菜个情形就恁樣直直到佢高中畢業。下後聽講佢還出國去讀了碩士， 轉來也做了一個先生。
先生講：「這隻古只有屋下子女知得，共下打飯包个時節都會自動多留一份額分佢，外人無半儕知，斯今晡日一看著菜瓜，正愐著頭過个事情。」𠊎聽著以後，深深體會教育界名言——「教育就係愛同榜樣」个道理。
原來吾面前个老人家係恁偉大个教育家，毋單淨盡量照顧窮苦學生，還會顧著學生个自尊， 也用身教摎子女教好品格。這擺拜訪先生收穫盡多，也記得提醒自家–客語教學當中，愛對學生用心付出，無定自家也會變成佢兜一生命運轉斡个貴人。
註釋
（註1）啄目睡：dugˋmugˋsoi； 打瞌睡。
（註2）傷重：songˊdong；受傷得很嚴重。
（註3）誚㸐：seuˊnadˋ；調侃自己， 自嘲。
（註4）罅：la； 足夠。
（註5）硬程：ngang cangˇ；指骨骼硬朗，身體結實強壯。
（註6）歐巴桑：oˇba sangˋ（日語外來語）；一般是尊稱長者為伯母， 這裡指老管家。
（註7）攞合：loˊgabˋ；融合， 指跟別的菜混煮一起。
（註8）𢯭眾：ten zung；隨和而合群。
（註9）揬：dudˋ；用手肘暗示， 提醒。
（註10）踩踩踏踏：caiˇcaiˇtab tab；猶豫不決，坐立不安。
（註11）慍悴：vudˋzudˋ；鬱卒，悶悶不樂。
（註12）話：va；勸誡。
華語
九十多歲的魏老師是我高一時的班導師，因為她當時也是一位女教官身分，做事嚴謹，大家都難免有點怕她。畢業好久以後，有一次聽說她因為坐著打瞌睡竟然跌倒，幾個老同學就約好去看望她，幸好受傷不礙事，她老人家還自嘲自己想試試看骨頭多硬朗？！大家才發現老師竟然是這般親切又幽默？！我也發現到老師真是可愛的寶貝！所以我還會想常常來聽她老人家分享人生的智慧。
第二次拜訪，我一個人帶著豬腳燉竹筍，還有兩條新鮮絲瓜來聊天。一看到絲瓜，老師立刻記起從前家裡請的老管家。她說：老管家最愛煮絲瓜，因為覺得絲瓜味道特殊，不須味素都可以做得出好料理，跟別的食材融合地也一 樣好食，老師笑著說：我們做人就要像絲瓜，不光要有特色更要能合群而隨和，生活才會自信又自在！
絲瓜的故事講完，另外引出一個跟老管家有關的故事。班上學生跑來跟老師報告—有一個同學每次都不拿便當出來蒸飯，老師就私下找來學生問出原因， 原來該生的便當通常只裝了一半白飯，感覺難為情才會不敢拿出來蒸飯。教官就提醒學生說：「以後上學先到教師宿舍來，拿便當給老管家幫妳裝菜，保證每天最少會有一顆蛋可以裝。」剛開始，學生乍聞老管家與其母是同鄉，就猶豫不決不敢前往，深怕被母親責備。
老師教誨她：「正因為大家熟識，更不用客氣，老管家絕對會像對自己人一樣疼惜妳的！」有一次，學校辦家長會，這名學生想到母親身上衣著襤褸，若到學校被人看見，便覺難堪，不要母親到校。老師就勸告她：「有錢人讓子女讀書很正常，妳母親那麼辛苦，做泥水工來供妳上學，表示她多希望妳好好讀書才能改變命運，妳母親才是真正偉大的母親，妳還更要孝順母親才是！」
學生聽了後，趕緊回家跟媽媽緊緊擁抱，邊哭還一邊跟母親道歉。供飯的情形就這樣一直持續到她高中畢業。後來聽說她還出國去讀了碩士， 回來也當了一名教師。
老師補充說明：「這個故事僅家裡的孩子們知道，在為大家裝便當的當兒都會自動多留一份給她。 此事沒有任何一個外人知曉，只因今天一看到絲瓜，才回憶起當年的故事。」我聽完以後，深深體會教育界名言——「教育就是愛與榜樣」的道理。
原來在我面前的這位老人家是多麼偉大的教育家，盡量照顧窮學生的同時，還會顧到學生的自尊；也透過身教教好自己孩子們的品格。這次拜訪老師收穫很大，也從而提醒自己——在我的客語教學過程中，要對學生用心付出，說不定自己也會變成他們一生命運轉變的貴人。
