文／黃美貞，苗栗客家人，臺北市 光復國小个先生， 這下戴臺北市（四縣腔）
苗栗人講个水餃仔同一般人食个全無共樣，南苗天雲廟面前，賣水餃仔該條街無幾長，毋過有幾下間店仔，雖然賣个東西都差毋多，但係各有各个特色，逐間都有厥个老主顧。朝晨六點半開店到下晝一點收揫，對客家人來講食朝愛有油氣，正有氣力。
行入水餃仔店，定著會先看著錐錐个炒麵、炒米粉，面頂有𤍒好个豆芽，脣項係一大鑊滾滾个四柱骨湯，麵同米粉係炒好个豆油色，鬆爽鬆爽，愛單食麵抑係米粉，還係麵同米粉都愛，看各人个口味。水餃仔个皮係用片栗粉，有賁有薄，有大有細，有月光型還有三角型，中央係簡單个豬肉，做得煮湯加魚丸，乜做得用𤍒个，頭家會放特別做个油蔥，其他个快菜豆油、辣醬就係人客自家來，愛加幾多就放幾多，頭家從來毋會計較。
有一擺，𠊎去食火鑊，點菜个時節，看著有一項係老店个水餃，出門在外，靚毋靚故鄉水，親毋親故鄕人。看著店名就像係轉到老屋，無點兩份來食仰做得。頭家當用心，還有合幾皮仔七層塔，放在脣項。水餃煮到浮起來，歸隻仔胖胖，愛煞煞舀起來，加半碗湯再放七層塔，該種親切感自然從心肚浡出來。後來頭家娘出來打招呼，特別紹介客家水餃，佢講這係從細食到大个好料仔，現下開店乜愛分人客知，韌韌个口感，人客食過就會尋味。
有幾個對苗栗來个後生人，在音樂方面特別有才情，幾儕人鬥一個樂團，用水餃仔个店名寫一首流行歌仔，湊大家去食炒麵、豬頭肉，還愛加特別个醬，正做得鬆爽又自然。用無共樣个表現方式，唱出來分大家聽，尤其，在網路時代，傳播个速度當遽，聽過个人，就會想尋機會去食看啊，人情好食水甜，簡單个食物，有淰淰个感情在裡肚，這就係感動。
一直到今，講著苗栗特產，𠊎定著會推薦水餃一條街，行一轉，食兩碗，愛細義哦！連舌嫲就會吞落去哦！
註釋
（註1）錐錐：音zuiˊ zuiˊ；尖尖的，形容東西堆成錐狀。
（註2）𤍒：音sauˇ；汆燙，將食物以滾水稍微燙過。
（註3）煞煞：音sadˋ sadˋ；趕快、果決。
（註4）好料仔：音hoˋ liau eˋ；好吃、美味的東西。
華語
苗栗人說的水餃和一般人吃得完全不一樣，南苗天雲廟前面，賣水晶餃的那條街雖然不長，有幾間小吃店，雖然賣的東西都差不多，但是各有各的特色，每間都有他的忠實老主顧。早上六點半開店到下午一點休息，對客家人來說吃早餐要有油，才有力氣。
走進水晶餃店，一定著會先看到滿鍋的炒麵、炒米粉，上面有燙好的豆芽菜，旁邊是一大鍋滾燙的大骨湯，麵和米粉是炒好的醬油色，鬆爽鬆爽，要單吃麵或是米粉，還是麵和米粉都要，看各人的口味。水餃的皮主要是用太白粉，有厚有薄，有大有小，有月光型還有三角型，中央是簡單的豬肉，可以煮湯加魚丸，也可以用燙的，老闆會放特製的油蔥，其他的韭菜醬油、辣醬就是客人自己來，要加多少隨客人喜歡，老闆從來不會計較。
有一次，我去吃火鍋，點菜的時候，看到有一道食材是老店的水餃，出門在外，人親土親。看著店名就像是回到老家，沒點上兩份來吃怎麼可以。老闆很用心，旁邊還放了幾片九層塔。水晶餃煮到浮起來，整個會變得胖胖的，要趕快舀起來，加半碗湯再放九層塔，那種親切感自然從心裡浡出來。後來老闆娘出來打招呼，特別介紹客家水餃，他說這是從小吃到大的好料，現在開店了要讓客人知道，Q彈的口感，客人吃過就會尋找這一味。
有幾個從苗栗來的年輕人，在音樂方面特別有才華，幾個人共組一個樂團，用水晶餃的店名寫一首客家流行歌，邀大家去吃炒麵、豬頭肉，還要加特別的醬，才可以舒爽又放鬆。用不一樣的表現方式，唱出來讓大家聽，尤其，在網路時代，傳播的速度很快，聽過的人，就會想找機會去品嚐，人情好食水甜，簡單的食物，有滿滿的感情在裡面，這就是感動。
一直到現在，說到苗栗特產，我一定會推薦水晶餃一條街，走一趟，吃兩碗，一不小心連舌頭都會吞下去哦！
