長面猴（東非狒狒）走出來出現在桃園平鎮 六福村遊樂園講毋係佢个動物
【蘇佑昇／西湖海陸腔】桃園市平鎮還有新屋陸續有人看著有長面猴出現在路項，平鎮區鎮興里个里長黃志杰今晡日講，這隻長面猴（東非狒狒）已經在平鎮12日了，進前3月初10就有鄉親在桃園平鎮个工廠脣頭發現長面猴，之後在3月18收著鄉親通報，正聯絡六福村動物醫生去捉這隻長面猴。
過了12日恁多日，這隻長面猴淨有食青菜還有水果定定，無傷害著任何鄉親，毋過動物醫生還有六福村个人員共下圍捕這隻長面猴嗄失敗了。
目前這隻長面猴可能走到新屋區當中。根據六福村檢查佢自家遊樂園裡背个動物，無動物減少，所以這隻長面猴到底係麼人个，還愛持續調查當中。
桃園市政府動物保護處也講，目前已經派出人員去到現場，會準備籠仔，看現場个狀況由動物醫生吹箭方式麻醉長面猴。
根據動物保護處調查，這隻長面猴無登記在桃園市个名單裡背，可能係由其他邊界縣市無愛儘採丟忒還係越界走出來个情形。
目前這隻長面猴毋會驚人，毋過一看著六福村个動物醫生就會馬上走忒。
另外，這隻長面猴企起來差毋多110公分恁高，身體重量差毋多20公斤，請鄉親看著這隻長面猴毋好接近，避免發生危險。
台灣從泰國進口个雞卵第一批32萬5千粒會在3月到台灣
泰國農業部畜牧廳官員昨晡日表示，做得在這隻月摎台灣出口新鮮个雞卵，第一批就賣分台灣32萬5000粒，按算今年做得摎台灣出口5千萬粒雞卵，來解決台灣目前本土雞卵毋罅个情形。
目前台灣个農業委員會動植物防疫檢疫局，前幾日也已經派人去到泰國談雞卵檢疫个條件了，所以泰國農業部畜牧廳，也在3月14在臉書講，這隻第一批愛出口到台灣个雞卵差毋多係32萬5千粒，價值新台票132萬箍。
今年也做得摎台灣出口5000萬粒雞卵，價值2億空2百40萬個銀，也會摎泰國個畜雞仔業者帶來一隻新个市場。
因為泰國有當嚴格个禽流感防疫措施，所以目前泰國个雞卵淨有出口到新加坡還有香港定定，去年歸年泰國雞卵出口價值新台票10億9980萬個銀，假使，今年成功出口到台灣，泰國相信做得打開泰國雞卵過較大个國際市場。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎大家下載講客廣播電臺APP，共下講客Let’s fly
