文／羅瑞霞 國小本土語言客語教師、竹北客人，這下戴竹北
腔調：海陸腔
聽潘大姐講，春分過忒一禮拜，還有四門風水愛掛紙，拜六下晝佢兜在文化館裡肚愛做「雕牲」，還有所有掛紙个祭品全部會準備好，拜六下晝䟓工下來，愛看仰般做「雕牲」。吂知去到佢兜講全做好咧，在該文化館裡背桌頂擺好，斯請佢兜開門分𠊎落去看。哇！一間屋，桌頂擺淰淰。
𠊎看一下：桌頂有牌仔寫等：永順公本穴，永順公后土本穴、永順婆本穴、永順婆后土本穴，文進公本穴、文進公后土本穴，文進婆本穴、文進婆后土本穴。因為係第三代文進公事業開始發達，所以有做「雕牲」，其它个斯準備「大五牲」。
看這劉屋个掛紙个祭品，全台灣可能尋毋著恁多樣合豐沛个咧！劉祥三先生落來摎𠊎紹介祭品个來由，佢講︰
第一代(十三世祖)來台祖︰安到『滿漢全席』；有雕牲(唐三藏師徒取經、姜太公釣魚、孟宗哭竹、大象、鶴)，五大牲(雙雞、雙鴨、豬肝、活魚，以梅花盤个方式向外伸展，灶下兜出來个東西，全部都有辦法擺上去。
第二代(十五世祖)安到『五湖四海』；有雕牲︰唐三藏師徒取經、姜太公釣魚、孟宗哭竹、大象、鶴，五個大碗四個大盤)。
第三代(十四世祖)︰大五牲及其它粄果供品。
劉祥三先生在文化館介紹祭品个來由以後，又渡𠊎到劉屋公廳，到公聽裡肚，劉先生講：祭祖个時節，愛摎祖先報告這擺有準備麼个東西，哪日、哪時，還有輪值个人，頭下有看著，宏字輩、開字輩、天字輩，都會寫到祝文面頂，還有幾多大房來拜。準備哪兜東西。
敬祖這個儀式係用三獻大禮來進行，摎祖公祖婆請神、祭祀，講話个用字愛非常个文雅，比論豬、羊，做毋得講豬羊，昶粗俗咧，愛講剛鬣、柔毛︰剛鬣係豬，柔毛係羊，還有五牲、酒禮、粄品、金銀財寶等，該兜祭品，因為係大禮，毋係儘採擺擺斯做得，一定愛做到靚靚，就係愛摎菜色做到靚，分祖公祖婆享用。
𫣆俚客人因為有排字輩，所以當清楚，像𠊎兜儕斯當完整，在中原南遷徙，來到廣東，就係九世祖，該阿公婆牌最面頂該係九世祖，就係廣東个開基祖。來到臺灣上禮拜掛紙該就元龍公係十三世祖，也係臺灣个開基祖。所以𠊎兜會用三獻禮，三跪九叩个禮來拜。這就是客家人个祭祀。〈待續〉
華語：
客家人祭祀的最高敬意-滿漢全席
聽潘大姐說，春分過一星期，還有四座墳要掃墓，星期六下午她們會在文化館裡面要做「雕牲」，還有所有掃墓的祭品全部會準備好，星期六下午專程下來，看看怎麼做「雕牲」。沒想到去到她們說已經全部兜做好了，在文化館裡裡的桌上擺好，只好請她們開門讓我進去看。哇！整個房間，桌上擺滿。
我看了一下：桌上有牌仔寫著：永順公本穴，永順公后土本穴、永順婆本穴、永順婆后土本穴，永進公本穴、永進公后土本穴，永進婆本穴、永進婆后土本穴。因為永順公是第二代最大，所以有做「雕牲」，其它的就準備「大五牲」。
看這劉家的掃墓祭品，全台灣可能找不到這麼多樣又豐盛的了！劉祥三先生進來幫我介紹祭品的由來，他說︰
第一代(十三世祖)來台祖叫做『滿漢全席』；有雕牲(唐三藏師徒取經、姜太公釣魚、孟宗哭竹、大象、鶴)，五大牲(雙雞、雙鴨、豬肝、活魚，以梅花盤的方式向外伸展，只要廚房端得出來的東西，全部都有辦法擺上去。
第二代(十四世祖)叫做『五湖四海』；有雕牲︰唐三藏師徒取經、姜太公釣魚、孟宗哭竹、大象、鶴，五個大碗四個大盤)。
第三代(十五世祖)︰五牲及其它粄果供品。
劉祥三先生在文化館介紹祭品的原由以後，又帶我到劉氏公廳，到公聽裡，劉先生說：祭祖的時候，要跟祖先報告這次有準備什麼供品，哪天、哪時候，還有輪值的人，剛剛有看到，宏字輩、開字輩、天字輩，都會寫到祝文上面，還有幾大房來拜。準備哪些供品。
敬祖這個儀式是用三獻大禮來進行，和祖先請神、祭拜，講話的用字要非常的文雅，譬如說︰豬、羊，不可以說豬、羊，太粗俗了，要說剛鬣、柔毛︰剛鬣是豬，柔毛是羊，還有五牲、酒禮、粄品、金銀財寶等，那些祭品，因為是大禮，不能夠隨便擺放的，一定要做得漂漂亮亮，就是要把菜色做到最漂亮，給祖先們享用。
我們客家人因為有排字輩，所以很清楚，像我們的就很完整，在中原往南遷移，來到廣東，就是九世祖，那祖先牌最上面那就是九世祖，就是廣東的開基祖。來到臺灣上星期掃墓的就是元龍公，是十三世祖，也是臺灣的開基祖。所以我們會用三獻禮，三跪九叩的大禮來拜，這就是客家人的祭祀。〈待續〉
延伸閱讀：
