大年初六國道持續塞車　公路總局：建議早上北上、下午南下

2023年01月27日

00:00

正月初六這兜高速公路个路線可能會塞車

【苗栗西湖海陸腔／蘇佑昇】高速公路總局表示，今晡日係正月初六，按算國道1號下南个方向楊梅到新竹還有彰化系統、埔鹽系統、國道5號下南个南港系統到頭城，上北个方向宜蘭到坪林這兜路段會塞車，建議下南个人盡量在下晝正來駛車仔上國道，上北个人盡量在朝晨駛車仔上國道，避免塞車。

高速公路總局也表示，今晡日係連續假期第8日，經過統計，昨晡日歸日个交通量係1億2千8百4千萬車公里，係一年个年平均平常時个8千8百萬車公里个1.5倍，國道5號个交通量係3百50萬車公里，係一年平均平常時个2百60萬車公里个1.3倍。

高速公路總局講，請鄉親出門駛車仔進前愛睡飽，有精神正來駛車仔，還有出門進前做得利用高速公路1968App掌扼最新个路況，駛車仔該時也愛注意車前个狀況，保持安全个距離；最尾係替代道路部分，假使鄉親愛駛長途个旅程，建議鄉親做得多加利用台61替代國1還有國3高速公路；台9線替代國道5號；台63線替代國道6號；台74線接國道4號做得改駛國1還有國3个台中路段；另外，短途旅程个話，建議鄉親盡量利用駛省道還有縣道，毋好駛國道。

印度研發出來噴鼻空个covid19預防射

印度一間生技公司研發出來係講全球第一隻噴鼻空个COVID-19預防射，今晡日正式發表，這支噴鼻空个covid19預防射係分有注過2門預防射个鄉親過注个加強劑。

這款噴鼻空个COVID-19預防射係印度政府購買个醫療產品，每一門係325盧比，差毋多係新台票120箍，雖然係噴鼻空恁簡單方便个方式，毋過印度政府目前還係在最開始个階段，所以還毋會開放民間來購買，淨做得從印度官方个預防射注射網站來注文，還愛請專業个醫療人員來噴鼻空執行醫療个行為。

印度衛生部部長曼達維亞（Mansukh Mandaviya）講，全球百分之65个預防射係印度供應製作，所以這擺印度成功研發出來个全球第一款个噴鼻空COVID-19預防射，也係印度醫療研發力量个展現。

林書豪確定2月最遽會來台灣打球

台灣職業籃球PLG聯盟高雄鋼鐵人隊，在正月26正式宣布，前NBA球星林書豪確定會加盟台灣鋼鐵人隊，林書豪也在自家个instagram摎台灣个球迷講：「高雄，𠊎來了」。34歲个林書豪舊年12月29摎中國个職業籃球CBA廣州龍獅提前解除合約，所以這擺林書豪來台灣打球加入台灣个球隊也完全个合法，目前就等官方个宣布。