文／葉金華，國小低年級導師，新竹客家人，這下戴台北市（四縣腔）
「蘭花草」歌詞裡背講个植物就係「綬草」。
「綬草」又安做「清明草」，大約清明節前後係厥花期，係一款體型最細个臺灣原生種个蘭花，平常時生在草坪項像普通个野草共樣毋打眼，等春季正會暴出花芯，開出細細蕊、白色還過略略仔帶等粉紫色、水紅色个花，花蕊像廟前个盤龍柱排做一串，地下个根像參仔，故所又分人喊做「盤龍參」。厥花語係「銘記在心、珍惜現下」，花期毋係盡長，想愛欣賞厥風采愛把握時機，若係錯過就愛等明年哩喲！
舊年四月𠊎在學校角頭脣个草坪看著異多頭開花个綬草，遽遽摎同事分享這隻消息，學校有幾隻熱心个先生摎教務處合作，自動自發帶頭設計課程。今年開春學校摎草坪圍起來、插咧告示牌仔摎學生仔宣導保育觀念；升旗時校長摎全校宣傳「希望大家共下來愛護花草，莫儘採在草坪頂搞遊戲、走相逐」；逐隻學年有適用个學習單，學生仔做得畫圖、寫短詩；教務處還舉辦攝影比賽，鼓勵大人細子翕下綬草个相片，再過請專家做評判，獎品盡餳人。恁好運！𠊎翕个相片有得獎，拿轉一盆綬草哦！
吾同事美齡先生教厥班項个中年級學生唱「蘭花草」，鼓勵學生仔重新改歌詞，在音樂課唱出自家个版本；用組織栽培个方式復育，再帶等小朋友摎綬草種在校園，公共電視台還特別來學校採訪呢！
放學時間𠊎跍在校園，想愛摎綬草翕相，堵好看著佢拿等細告示牌在草坪巡等，摎佢相借問，佢講：「學校有幾下隻地方盡適合綬草生長，像這位朝晨晒得著日頭，下晝有遮蔭，落水天毋會積水，就嶄然符合這兜條件。打幫你舊年同𠊎講這隻訊息哦！」佢又笑等講：「吾班項个學生仔毋單淨一日來看三輪，佢兜下課時節一有閒就走過來看，有人還一日𫟧八輪呢！」。佢分享講原來這兜課程係學校高年級个賴先生帶等佢做个，佢兜還設計結合數學計算面積同植物密度个活動，分學生仔親身去體驗學習。
美齡先生佢兜提供恁多元个想法，還歡迎大家使用這兜資源，正經試著還感謝！學校有恁好个同事，實在係一件盡幸運个事情！
華語
「蘭花草」歌詞裡面講的植物就是「綬草」。
「綬草」又稱做「清明草」，大約清明節前後是它的花季，是一種體型最小的臺灣原生種蘭花，平常長在草坪像普通的野草一樣不起眼，等春季才會冒出花芯，開出小小朵、白色略帶粉紫色、粉紅色的花，花蕊像廟前的盤龍柱排做一串，地下的根像人參，所以又叫做「盤龍參」。它的花語是「銘記在心、珍惜當下」，花季不是很長，想愛欣賞它的風采要把握時機，如果錯過就要等明年囉！
去年四月我在學校角落邊的草坪看到很多棵開花的綬草，趕忙和同事分享這個消息，學校有幾個熱心的老師跟教務處合作，自動自發帶頭設計課程。今年開春學校把草坪圍起來、插了告示牌跟學生宣導保育觀念；升旗時校長跟全校宣傳「希望大家一起來愛護花草，不要隨意在草坪上玩遊戲、奔跑」；每個學年有適用的學習單，學生可以畫圖、寫短詩；教務處還舉辦攝影比賽，鼓勵大人小孩拍下綬草的照片，再請專家做評判，獎品很吸引人。這麼幸運！我拍的照片有得獎，拿回一盆綬草哦！
我的同事美齡老師教她的班上的中年級學生唱「蘭花草」，鼓勵學生重新改歌詞，在音樂課唱出自己的版本；用組織栽培的方式復育，再帶著小朋友把綬草種在校園，公共電視台還特別來學校採訪呢！
放學時間我蹲在校園，想要幫綬草拍照，剛好看到她拿著小告示牌在草坪巡視，跟她打招呼，她說：「學校有幾個地方很適合綬草生長，像這裡早上晒得到太陽，下午有遮蔭，下雨天不會積水，就非常符合這些條件。謝謝你去年跟我講這個訊息哦！」她又笑著說：「我班上的學生不止一日來看三回，他們下課時一有空就跑過來看，有人還一天來八趟呢！」。她分享說原來這些課程是學校高年級的賴老師帶著她做的，他們還設計結合數學計算面積和植物密度的活動，讓學生親身去體驗學習。
美齡老師他們提供這麼多元的想法，還歡迎大家使用這些資源，真的覺得好感謝！學校有這麼好的同事，實在是一件很幸運的事情！
