文／王德兆，新竹縣竹東人，退休人士（海陸腔）

對𠊎這個年紀个人來講，講客係最平常不過个事情，斯像食糜樣仔恁該食，因為𠊎在屋下，世大人專門摎𠊎兜細人仔講客，因為佢兜全部毋曉得講國語。

毋過，在𠊎讀國小个時節，國民政府為著愛消除日本話个影響力，還過想愛減少因為各地不同方言發生个誤會，方便大家語言溝通个問題，推行講國語个政策。𠊎記得宋楚瑜先生係該當時台灣省政府个新聞局局長，後來佢代表政府頒布了禁止在公共場所摎集會場所中講方言个規定，客語乜係共樣，所以該當時𠊎兜學生仔在學校做毋得講客。

𠊎識聽人講係在學校講客會分學校罰掛「我說方言」个牌仔，佢兜笑講該安到「狗牌」，無斯會罰錢；𠊎在峨眉國小讀書个時節無聽講有恁樣个事情，乜毋識掛過狗牌抑係分學校罰過錢。

後來經過了幾下十年个國語教育，大家全部都會講國語，雖然增加語言溝通个方便性，減少了語言溝通个誤會，毋過國語講到久咧，屋下个世大人大體乜跈等細人仔開始講國語，𠊎个爺哀斯係恁樣，跈等孫仔孫女講國語，漸漸仔有兜細人仔雖然聽得識客語嗄毋曉得講客咧，有兜完全聽毋識也毋會講客，客語不知不覺中嗄像人跌忒了，乜包含客家个文化摎歷史。

背尾有兜讀書人意識著這隻問題个嚴重性，開始推動「還我母語」个活動，政府乜共同大力推動，在學校開始開課教學生仔講客，客家委員會推動各級客語認證，包含初級、中級、中高級摎高級客語認證，培養已多客語先生在逐隻學校教學生仔講客。

各縣市政府還過中央政府逐年還有辦理全國語文比賽，比賽項目包括客語作文、朗讀、演講、寫字、字音字形等各種比賽，雖然有已好个成果，乜培養已多个客語比賽選手，為個人摎學校爭取著當好个成績摎榮譽，毋過，大部分个學生仔還係毋慣乜無法度用客語來摎同學甚至摎屋下人溝通！

老古人言講：「寧賣祖宗田，莫忘祖宗言；寧賣祖宗坑，莫忘祖宗聲」，又有人講語言係文化个載體摎靈魂，客語若係跌忒，客家文化摎歷史乜會漸漸跌忒去，𫣆兜毋單淨愛自家講客，還愛對自家屋下做起，在屋下定著愛摎屋下人講客，尤其係摎細人仔講客，拈轉客語從「講客」開始，這係一種傳承，乜係一份責任。

華語

對我這個年紀的人來說，說客家話是再平常不過的事情了，就像喝稀飯一樣容易，因為我在家裡，長輩們都跟我們這些小孩子說客家話，因為他們都不會說國語。

不過，在我讀國小的時候，國民政府為了要消除日語的影響力，還有想要減少因為各地不同方言發生的誤會，方便大家語言溝通的問題，推行說國語的政策，我記得宋楚瑜先生是當時台灣省政府的新聞局局長，後來他代表政府頒布了禁止在公共場所和集會場所中說方言的規定，客語也是一樣，所以當時我們學生們在學校是不可以說客家話的。

我曾聽人說如果在學校說客家話會被學校罰掛「我說方言」的牌子，他們笑說那叫做「狗牌」，不然就會被罰錢；我在峨眉國小讀書的時候是沒聽說有這樣的事情，也不曾掛過狗牌或者被學校罰過錢。

後來經過了幾十年的國語教育，大家全部都會講國語了，雖然增加語言溝通的方便性，減少了語言溝通的誤會，不過國語講久了，家裡的長輩大概也跟著小孩子說國語，我的父母就是這樣，跟著孫子孫女說國語，漸漸地有些小孩子雖然聽得懂客家話卻不曉得怎麼說客家話了，有些完全聽不懂也不會說客家話，客語在不知不覺中好像就丟失了，也包含客家的文化和歷史。

後來有些讀書人意識到這個問題的嚴重性，開始推動「還我母語」的活動，政府也共同大力推動，在學校開始開課教學生們說客家話，客家委員會推行各級客語認證，包含初級、中級、中高級摎高級客語認證，培養很多客語老師在每一個學校教學生們說客家話。

各縣市政府還有中央政府每年還有辦理全國語文競賽，比賽項目包括客語作文、朗讀、演講、寫字、字音字形等各種比賽，雖然有很好的成果，也培養很多客語的比賽選手，為個人和學校爭取到很好的成績和榮譽，不過，大部分的學生們還是不習慣也沒辦法用客家話來跟同學甚至跟家人溝通！

客家諺語說：「寧賣祖宗田，不忘祖宗言；寧賣祖宗坑，不忘祖宗聲」，又有人說語言是文化的載體和靈魂，客家話如果丟失了，客家文化跟歷史也會逐漸跟著丟失了，我們不單單要自己說客家話，還要從自己家裡做起，在家裡一定要跟家人說客家話客，尤其是跟小孩子說客家話，找回客家話從「說客家話」開始，這是一種傳承，也是一份責任。