文／彭賢祥，大湖客家人，這下戴大溪（四縣腔）
巴士，相信係大家个好朋友，會載大家去街項，也做得載你去山頂，係無佢會變到盡毋利便，尤其係戴莊下个老人家，在日常生活中，特別需要巴士个𢯭手，乜係桃竹苗交通工具个代表，看著巴士車廂項个新竹客運，就表示係在這桃竹苗个客家莊，相信佢係跈等大家到這下个童年回憶。
這恁久輒輒在手機仔項看著，新竹客運个巴士愛停駛哩！想著這巴士愛停忒就盡毋盼得，該青色、白色同柑仔色車箱，在莊下个路項趖來趖去，看著佢个色目就有一種安全感，乜係一種保護色，毋過這保護色个車廂愛走了！愛仰結煞正好？因為這巴士對𠊎來講，係當有紀念價值个，跈等𠊎從國中到高中个車仔，國中時節愛坐巴士，對大南勢坐到大湖，就愛用到佢，係無這巴士載𠊎，就無法度去讀書，係堵著發風搓、落雨、崩山个時節，巴士就會停駛。
國中畢業後，考著國立苗栗農工，學校在苗栗市，故所愛在大湖車頭盤車一擺，正做得去到學校，盡重要个係車枋時間愛接得著，恁樣正做得順利去到學校上課，係無就愛對山頂屋下，騎奧多擺騎到大湖車頭放，然後正坐大湖到苗栗个巴士，無就赴毋著學校个升旗哦！故所𠊎高中做得順利畢業，愛感謝這新竹客運巴士，乜愛感謝大湖到中興，大湖到苗栗个運轉手，逐日載𠊎去讀書。
時代社會在該改變，環境也跈等轉變，客運公司个經營共樣受著影響，尤其在人口少个莊下，還較困難去絡食，都市項人口多，相對个巴士个運轉手乜愛增加，毋過這下客運个運轉手難尋，還有新聞網路報導，客運个運轉手輒輒分人投，這兜關係就會直接影響客運公司个生存。毋過好在，這下苗栗區个新竹客運路線，有新个科技公司接手經營，算係一種幸福个延續，乜做得推廣地方个觀光產業，像這台六線苗栗到大湖，逐年草莓季个時節，做得帶外縣市个人客，入來大湖摘草莓洗溫泉，正經係多功能个巴士，定著愛好好珍惜，有淰淰回憶又幸福个巴士！
華語
巴士，相信是大家的好朋友，會載大家去街上，也可以載你去山上，如果是沒有它會變得很不方便，尤其是住鄉下的老人家，在日常生活中，特別須要巴士的幫忙，也是桃竹苗交通工具的代表，看到巴士車廂上的新竹客運，就表示是在這桃竹苗的客家莊，相信它是跟著大家到現在的童年回憶。
最近常常在手機裏看到，新竹客運的巴士要停駛了！想到這巴士要停掉最捨不得，那藍色白色橘色車箱，在鄉下的路上走來走去，看到它的顏色就有一種安全感，也是一種保護色，不過這保護色的車廂要離開了！要怎麼辦才好呢？因為這巴士對我來說，是很有紀念價值的，跟著我從國中到高中的車子，國中時期要坐巴士，從大南勢坐到大湖，就要用到它，要是沒有這巴士載我，就沒有辦法去讀書，是遇到颱風下雨崩山的時候，巴士就會停駛。
國中畢業後，考到國立苗栗農工，學校在苗栗市，所以要在大湖車站轉車一次，才可以去到學校，最重要的是班車時間要接得上，這樣才可以順利去到學校上課，是沒有就要從山上家裡，騎機車騎到大湖車站放，然後再坐大湖到苗栗的巴士，不然就會趕不上學校的升旗哦！所以我高中可以順利畢業，要感謝這新竹客運巴士，也要感謝大湖到中興，大湖到苗栗的司機，每天載我去讀書。
時代社會在改變，環境也跟著轉變，客運公司的經營一樣受著影響，尤其在人口少的鄉下，更困難去謀生，都市裏人口多，相對的巴士的司機也要增加，不過現在客運的司機難找，還有新聞網路報導，客運的司機常常被人投訴，這些關係就會直接影響客運公司的生存。不過好在，現在苗栗區的新竹客運路線，有新的科技公司接手經營，算是一種幸福的延續，也可以推廣地方的觀光產業，像這台六線苗栗到大湖，每年採草莓季的時節，可以帶外縣市的客人，進來大湖採草莓洗溫泉，真的是多功能巴士，一定要好好珍惜，有滿滿回憶又幸福的巴士！
