文／吳佩瑩，屏東客家人，客委會與屏東客家中心說故事老師（四縣腔）

逐擺到放尞日，就係𠊎做先生最樂暢个時節。毋係去哪個風景區遶尞，乜毋係去哪位食好料仔。顛倒，係坐在書桌仔頭前，頭犁犁仔用毛枝拗等這兜細人仔嘴項緊講个「皮克敏」人公仔。看等這手項个細精靈，心肝肚𢫦𢫦風又生出一個感想來。

平常時𠊎教書个時節，為著提高細人仔个學習動機，收集、準備各式各樣个獎勵品，變成逐日上課進前定著愛愁慮个事頭仔。毋過，今這下細人仔時行个東西轉變到嶄然遽。正前一站仔看等佢兜開嘴、合嘴還係「數碼寶貝」卡片定定，一眨目，嗄又變做這群星球探險个「皮克敏」吔。𠊎愐，假使先生个百寶箱裡背，總係淨裝等過時个貼紙抑係過時个舊文具，對現下新世代个細人仔來講，先生送个獎勵品係講無不時「Update！」跈著時代，就隨時準備分學生仔淘汰忒，還過會畀嫌係老古董先生吔。

毋過，話又講倒轉來，假使獎品淨放在「物質个滿足」抑係單純个「跈流行」，恁樣就又「用飯撈戽水——無採工」吔。𠊎教書个同時，最重要个任務就係摎這兜有名个卡通人物，轉變做滋養心靈个教材。

拿皮克敏這款得人惜个遊戲來講，裡背就有當多个教育意義：一群矮㑁㑁个細生物，在毋熟識个環境當中勇敢冒險。像紅色皮克敏毋驚火个「勇氣」、藍色黃色皮克敏知水性摎突破能力个「人格特色」，過有大家合作克服恁多難關、同心協力个「團隊精神」，這兜都係當好个教材。

頭擺个數碼寶貝教會佢等朋友之間个友誼摎進化，這下个皮克敏乜係渡等大家學習面對未來變化个探索摎包容。故所，在細人仔從先生手項接過皮克敏人公仔該央時，𠊎望佢等毋單淨係看著一個「流行个玩具」定定，過較希望係打幫這隻人公仔，傳達後背正面、善良个價值。

獎勵品，確實係一項當餳人个東西，毋過裡背乜包含著一擺擺無形个素養教育。摸等這兜親手做好个毛枝皮克敏，𠊎知得了，這群彩色个細精靈將會帶等先生个萬望，在教室裡背掀起另外一場有關勇氣同團結个探險旅程。

華語

每到例假日，就是我當老師最快樂的時光。不是去哪個風景區遊玩，也不是去哪裡吃好料的。相反地，是坐在書桌前，低著頭用毛根扭著這些孩子們嘴裡不停唸叨的「皮克敏」玩偶。看著手裡的這些小精靈，心裡頓時又生出了一番感慨。

在日常的教學中，為了提高孩子的學習動機，收集、準備各式各樣的獎勵品，變成了每天上課前必須操心的日常瑣事。然而，現在孩子們流行的東西轉變得很迅速。前陣子看他們張口閉口還只是「數碼寶貝」的卡片，一眨眼，竟然又變成了這群在星球探險的「皮克敏」。我想，如果老師的百寶箱裡，總是只裝著過時的貼紙或是過時的舊文具，對現在新世代的孩子來說，老師送的獎勵品要是沒有隨時「Update！」跟上時代，隨時就準備被學生淘汰，而且還會被嫌棄是老古董老師呢。

不過，話又說回來，如果獎品僅僅停留在「物質的滿足」或是單純的「盲目跟風」，那就又是「用有洞的勺子去舀水潑灑——白做工」了。我在教書的同時，最核心的任務就是將這些知名的卡通人物，轉變成滋養心靈的教材。

拿皮克敏這款討人喜歡的遊戲來說，裡面就富含教育意義：一群矮矮小小的細小生物，在不熟悉的環境中勇敢冒險。像是紅皮克敏不怕火的「勇氣」、藍皮克敏和黃皮克敏適應水性與突破能力的「人格特質」，還有大家合作克服重重難關、同心協力的「團隊精神」，這些都是很好的教材。

從前的數碼寶貝教會他們朋友之間的友誼與進化，現在的皮克敏也是引領著大家學習面對未來變化的探索與包容。因此，當孩子從老師手中接過皮克敏玩偶的那一刻，我希望他們不單單只是看到一個「流行的玩具」，更希望是藉由這隻玩偶，傳達背後正面、善良的價值。

獎勵品，確實是一項很吸引人的東西，不過裡面也包含著一次次無形的素養教育。摸著這些親手做好的毛根皮克敏，我知道，這群彩色的小精靈將會帶著老師的期望，在教室裡掀起另一場關於勇氣與團結的探險旅程。