台中市發生重大建築施工工安意外
【蘇佑昇／西湖海陸腔】台中市消防局表示，昨晡日朝晨10點44分，接著通報，台中市中區台灣大道一段299巷个一間兩層樓个老屋橫忒，消防局趕到現場，發現橫忒个老屋係因為隔壁个建築還在施工，造成這棟兩層樓个老屋嗄橫忒，也因為這棟老屋橫忒，連帶在隔壁个工地施工个3儕工人也分橫忒个老屋矺在磚瓦下背。
雖然昨晡日朝晨第一時間有先救出來1儕姓蔡个51歲个細倈仔工人送醫院搶救，毋過最尾這儕第一時間分消防隊救出來个工人還係搶救無效，過身了，另外，兩儕還矺在磚瓦下背个工人，也因為身體完全塞在磚瓦堆下背忒深了，所以到了昨晡日下晝還無法度分消防人員救出來，毋過到了昨晡日下晝3點30分上下，有發現這兩儕工人个頭那毛，到了下晝5點零，過做得看著這兩儕工人个頭還有手。
台中市消防局講，搜救人員判斷，這兩儕工人第一時間可能就已經無生命跡象了，毋過消防局表示，從通報起勢就持續全力挖磚瓦搶救，也派出搜救狗，也希望遽遽救出來這兩儕工人。
毋過也因為老屋橫忒之後，地基當鬆軟，假使請出來大型个機具來挖磚瓦，驚會造成泥土還有石頭越挖越深，所以現場淨做得用電動个鋸仔這兜器材，先來摎建築个鐵皮屋頂還有梁柱切開來，還有徙走正做得加速搶救。
台中市市長盧秀燕昨晡日朝晨在台北開行政院个院會該時，知講發生這隻重大工安意外，就第一時間指派副市長王育敏到場督導救災，盧秀燕自家也在昨晡日臨暗到現場關心搶救个進度也慰問家屬。盧秀燕強調，台中市政府一定會搶救到最後一秒，絕對毋會放棄。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎大家下載講客廣播電臺APP，共下講客Let’s fly
