《客新聞》、《講客電臺》前進土耳其　外交部公布物資捐款帳號

《客新聞》團隊前進土耳其大地動災區　摎大家報導最新个消息

【苗栗西湖海陸腔／蘇佑昇】土耳其摎敘利亞脣頭在2月初6一大早發生規模7.8強烈大地動，造成嚴重个死亡人數，到今有超過7800儕土耳其个人過身了。所以台灣搜救隊赴時間在隔日2月初7飛過土耳其个伊斯坦堡，再來拉車過去災區土耳其南方个馬拉特雅省，目前《客新聞》知講除了台灣之外，歐洲還有米國這兜國家全部有派出專門个救災人員去到當地𢯭手救人。毋過土耳其當地係落雪个情形，氣溫當寒冷，所以當多災民無屋好底，還愛面對寒冬个低溫，所以駐台北土耳其貿易辦事處昨晡日表示，目前當需要大家个捐贈燒暖个衫褲還有民生用品。《客新聞》也整理出來做得分大家捐助个管道分鄉親參考。

捐款个帳戶分別係國內還有國外，首先提供分台灣鄉親捐款个帳號係270750「中央銀行國庫局」，戶名係「衛生福利部賑災專戶」，毋過這隻帳戶淨做得透過臨櫃匯款，做毋得透過網路匯款。

第二隻國內匯款个帳戶，係郵政撥錢个方式，撥錢帳號係50269506，戶名係「衛生福利部賑災專戶」。

另外也提供分國外鄉親做得捐款个帳戶：國外鄉親捐款个帳號係007-09-11868-0「兆豐國際商業銀行國外部」，戶名係「衛生福利部賑災專戶」，以上捐款个帳戶係外交部捐款專戶，戶名全部係「衛生福利部賑災專戶」假使鄉親想愛捐款，愛寫清楚係「土耳其震災專案」，也愛在空白个所在寫清楚捐款人个名仔、電話還有收據寄送地址，傳真到02-85906065，恁樣才會收著捐款人个收據。也提供捐款人聯絡電話係02-85906666。

｜講客廣播電臺－收聽頻率｜

▹宜蘭 FM102.9

▹北北基高屏 FM105.9

▹桃竹 FM105.7

▹苗中彰投 FM101.5

▹雲嘉南 FM104.3

▹花東 FM106.9

｜網路收聽｜

▹講客廣播電臺官網｜https://pse.is/R8RU8