文／鍾鳳珠，客語薪傳師，現居桃園楊梅（四縣腔）
渡孫仔、孫女出門遶尞抑係公園散步時，有人係聽著𠊎兜祖孫用客話打嘴鼓，輒常有人問𠊎仰般教細人仔講客話？𠊎來分享渡孫仔、孫女係仰仔，在生活肚同佢兜講客話个。
𠊎歸屋下人，在屋下个對話95%都係用客家話。孫女對歲學講話時，就在高雄上來桃園分𠊎兩公婆渡，孫仔在高雄，親家、且姆學老人渡到4歲正上桃園來戴，就該央時開始講客話。
一開始孫仔講華語，𠊎就同佢翻做客家話，正拐佢共下用客話講一遍，生活中不管喊洗身、食飯總下係客語，成時佢兜疑狐時，就加上動作，分佢兜知這下係愛做麼个？抑係當時係麼个意思？用客話講繪本、講古分佢兜聽，成時乜會寫兜順口又有押韻个唸謠，同孫仔、孫女共下唸，意思係無了解个，孫仔乜盡肯問，老古个唸謠乜唸，𠊎自家還細時節唱个細人歌乜翻客語教唱，像有：細毛驢、螔螺仔同黃鸝鳥……等等盡多，總下改用客語來同佢兜共下唱跳，逐餐食个東西，一項項仔，自自然然就用客話講，乜長透渡等佢兜參加客家相關个活動，就恁樣過咧兩隻零月，孫仔个客話就盡流掠咧！
會講客過後，就同孫仔、孫女講兜客家文化相關个俗，比論講：正月半時，共下搞揣令仔，舊曆二月二講伯公生、食伯公福个由來，掛紙講客家人有麼个風俗？同佢高雄學老个風俗有共樣無？五月節前，渡等佢兜䌈粽仔，順續知客家人包个粽仔料有香菇、蝦仁、番豆、豬肉還有菜脯，七月半普渡時，放祭品个桌仔愛放在外背，七月二十義民祭客家庄有輪庄拜義民爺，八月半前後有平安戲，十月半有收冬戲，冬節愛挼粄圓，食忒冬節粄圓就加一歲，冬節乜係頭擺个耕種人，分牛仔放尞一日，準牛仔過生日个日仔、過年敬天公放祭品个桌仔愛放屋仔肚……等等過節相關个文化。
同孫仔、孫女講，在外背、學校上課、讀書，係有堵著會講客个同學、抑係朋友，做得用客話同佢兜打嘴鼓，轉到屋下逐儕人定著愛講客話，除忒較少个專有名詞，抑係外來語較無法度翻客語講个正會用華語。
故所，𠊎試著在屋下起勢講客，係當重要个，只愛堅持、肯講，毋會忒難，就像大部分个人，在屋下講華語恁自然共樣，就係同講華語个生活方式，改用客語講定定啊！
華語
帶孫子、孫女出門遊玩或是到公園散步時，若有人聽到我們祖孫用客話聊天，常常有人問我如何教小孩講客家話？我來分享帶孫子、孫女是如何在生活中和他們講客家話的。
我們一家人，在家裡的對話95%都是用客家話。孫女在周歲學講話時，就在高雄上來桃園讓我兩夫妻帶，孫子在高雄，親家、和親家母閩南人帶到4歲才上桃園來住，就在那個時候開始講客家話。
一開始孫子講華語，我就翻譯成客家話，在誘導他一起用客話說一遍，生活中無論喊洗澡、吃飯全部是用客語，有時候他們懷疑時，就家上肢體動作，讓他們知道現在是要做什麼?還是當下那是什麼意思？用客語講繪本、講故事給他們聽，有時候也會寫一些順口又有押韻的唸謠，和孫子、孫女一起唸，意思有不了解的，孫子也很肯問，古時候流傳的唸謠也唸，我自己小時候唱的兒歌，也翻成客語教唱，像有：小毛驢、蝸牛與黃鸝鳥……等等許多，全部改成客語來與他們一起唱跳，每餐吃的東西，一項項的，自自然然就用客語講，也常常帶著他們參加客家相關的活動，就這樣過了兩個多月，孫子的客語就很流利了！
會講客語後，就和孫子、孫女講一些客家文化相關的習俗，例如：元宵節時，一起玩猜燈謎，農曆二月初二講土地公生日、食伯公福的由來，清明節客家人有什麼風俗？和高雄閩南的風俗有一樣嗎？五月節前，帶著他們包粽仔，順便知道客家人包的粽子料有香菇、蝦仁、番豆、豬肉還有蘿蔔干，七月半普渡時，放祭品的桌子要放在外面，七月二十義民祭客家庄有輪庄拜拜，中秋節前後有平安戲，十月半有收冬戲，冬至要搓湯圓，吃完冬至湯圓就加一歲，冬至也是以前的農人，讓牛放假一天，當作是牛過生日的日仔、過年敬拜天公放祭品的桌子要放在屋內……等等過節相關的文化。
和孫子、孫女說，在外面、學校上課、讀書，若有遇到會說客語的同學、或是朋友，可以用客家話和他們聊天，回到家裡每個人一定要講客家話，除了較少的專有名詞，或是外來語比較沒辦法翻譯成客語的才會用華語。
所以，我覺得在家裡開始講客語，是很重要的，只要堅持、肯講，不會太難，就像大部分的人，在家裡講華語這麼自然一樣，就是把講華語的生活方式，改用客語講而已啊！
