文／吳佩瑩，屏東市田寮客家人，客語說故事老師（四縣腔）

雖然講𠊎係客家妹仔，毋過有一站仔時間，𠊎對母語摎家鄉文化，就像生份人樣仔強強會毋曉得講吔。好得還細个時節有摎世大人輒常緊講客話，故所這份母語个記憶，就像跌在泥肉肚个菜仁，分佢一息仔露水，就會過暴芽成長。

去年十月，好彩有報著「先鋒堆」个盤花果雕課程，課程結束後就會有一個成果比賽，在比賽个過程肚，正分𠊎正式深入了解客家文化个精神同內涵。盤花，講究係用「客家九花」來疊出一個圓滿同層次，故所，𠊎在莊項大細條巷仔鑽來鑽去尋「九花」影跡个時節，分𠊎愐起老屋禾埕前該兜仔桂花、樹蘭、玉蘭花摎新丁花，佢等展現个生命力充滿客家精神係阿婆拿來敬拜阿公婆摎伯公个寶，就算你有錢乜買不著哩。

來到比賽該日，𠊎像螔螺行路樣仔定定仔駛車，盡量避開礫礫矻矻个路項，驚會同盤花果雕作品搖壞忒，好得最尾安全仔來到掖麻掖米个風雨球場，𠊎嶄蠻細義仔摎佢擺在展示桌頂項。看著十過位學員个作品平高、圓滿吔排列在桌頂共下比靚，就淨𠊎个疊著高高，像聖誕樹樣仔，花果頂高還有用紅、白蘿蔔雕刻个細馬仔、揚蝶仔同白鶴仔，一心淨愐：「愛仰般摎盤花果雕个藝術用創新个眼光展現出來分人看著。」

司儀宣布𠊎拿著冠軍个時節，𠊎著驚一下輕聲對自家講：「阿姆哀！敢有可能？有影無？係毋係發夢哩呦！」這乜就證明文化愛創新係著个，創新正會有人來注意摎欣賞。毋過，好戲毋曾煞棚哩！故事盡靚个部分，係在得獎過後个第二日。

𠊎想講這份盤花果雕个「靚」同「榮譽」無應該淨係自家个，就摎作品拆忒重新過設計兩盤新个。第一盤捧到路脣个將軍壇，承蒙將軍大方分𠊎摘佢壇前紅濟濟仔个雞髻花，𠊎細聲講一聲：「承蒙你」。

第二盤，𠊎送分指點𠊎尋著花材个長輩。看等佢笑弛弛仔接過去，隨後就摎花供奉路脣个伯公下。看等該個長輩敬拜伯公个背影，𠊎看識了作品个意義：佢毋單淨係分人看靚定定，還係客家人、神同土地之間盡溫柔个交流。

花果香雖然會散忒，毋過這份客家文化个內涵會圓圓滿滿，久久長長傳下去。

華語

雖然說我是客家女孩，但是有一段時間，我對母語與家鄉文化，就像陌生人一樣幾乎快要不會說了。幸好小時候常跟長輩們說客家話，所以這份母語的記憶，就像掉在泥土裡的種子，給它一點露水，就會重新發芽成長。

去年十月，很幸運地報名了「先鋒堆」的盤花果雕課程，課程結束後會有一個成果比賽，經由比賽的過程中，才讓我真正的深入了解客家文化的精神與內涵。盤花，講究的是用「客家九花」堆疊出一個圓滿與層次，因此，當我在村莊裡的巷弄間穿梭尋找「九花」蹤跡時，讓我想起祖厝曬穀場前的那些桂花、樹蘭、玉蘭花與新丁花，它們展現的生命力充滿客家精神是阿婆拿來敬拜祖先與土地公的寶貝，就算你有錢也買不到的。

到了比賽那天，我像蝸牛一樣慢慢地開車，盡量避開凹凸不平的路面，生怕在運送途中會把盤花果雕作品晃壞了，最後終於安全的來到人山人海的風雨球場，我極其小心地將它擺在展示桌上。看著十多位學員的作品平高、圓滿地排列在桌上競相爭艷，唯獨我的疊得高高的，像聖誕樹一樣，果花頂上還有用紅、白蘿蔔雕刻成的小馬、蝴蝶與白鶴，心裡只想著：「要如何將盤花果雕的藝術，用創新的眼光展現給眾人看見。」

當司儀宣布我獲得冠軍的那一刻，我驚訝地對自己說：「天啊！怎麼可能？是真的嗎？是不是在做夢啊！」這也證明了藝術要創新是對的，創新才能吸引人的關注與欣賞。然而，好戲還沒落幕哦，故事最美的部分，是在得獎後的第二天。

我想這份盤花果雕的「美」與「榮耀」不該只屬於自己，我將作品拆開來重新設計成兩盤新的。第一盤捧到路邊的將軍壇，感謝將軍大方的讓我採摘祂壇前那紅通通的雞冠花，我輕聲說了一句：「謝謝您」。

第二盤，我送給指引我找到花材的長輩。看著他笑盈盈地接過去，隨後將它供奉在路旁的土地公廟。看著那位長輩敬拜土地公的背影，我領悟了作品的意義：它不只是讓人看漂亮而已，更是客家人、神與土地之間最溫柔的交流。

花果香會消散，不過這份客家文化的內涵會圓圓滿滿，長長久久的傳下去。