文／廖佳仁（海陸豐野客）
中壢客人，楊梅富岡（伯公岡）出生、於桃園市中壢區新街國民小學任教36年退休，目前任桃園市新楊平社區大學地方知識學發展中心研究員兼主任（海陸腔）
來到臺灣尾，臺灣最南片个屏東縣麟洛鄉客家莊，看著有一間伯公廟安做「生鬚伯公」，試著已生趣，就落去遶看啊，看係生麼个鬚？無看就算咧，一看不得了，廟裡肚有各路神佛共下來打鬥四，神桌頂項擠著淰淰淰，連中壢新街个仁海宮媽祖婆乜來𢯭鬧熱。
生鬚伯公，根據廟肚壁頂个沿革誌記載，佢係在明朝末年个時節，有一個跈等國姓爺鄭成功來臺灣，擔任明鄭軍隊運糧官个廣東嘉應州（註1）鎮平人徐俊良，來到麟洛這位，發現這位个水草豐美，非常適合耕作。故所，轉去故鄉（註2）之後，在1698年（清康熙37年）正過摎自家房頭內个子侄徐蘭桂、徐吳福這兜渡來麟洛開莊作圳，透水耕作。
後來，在地居民為著感念徐蘭桂、徐吳福等帶等佢兜開墾本地个功勞，就在水圳旁脣个榕樹下，立石為碑，將徐蘭桂奉為伯公，設立伯公廟來祭拜，過因為伯公廟後个榕樹有當多幼幼个細根，看起來當像生鬚樣，就摎佢喊做生鬚伯公；另外在六雅街該片析，也共樣立碑為祠，奉徐吳福做伯公。
到1968年該下，因為愛起市場分在地居民買賣農產品摎生活用品，生鬚伯公廟分人改建做兩棧樓个建築，改安做「三角坪伯公」。下後，一樓變做農會辦公室，二樓正係伯公廟，民眾愛拜伯公，還愛擐等牲儀、金香，蹶上二樓頂高去正做得拜得著伯公。恁樣，對老人家摎行動無幾方便个人來講，就盡毋利便了。
後來，因爭六雅街該片个道路愛開闊，就又摎徐吳福伯公徙過生鬚伯公這位來摎徐蘭桂伯公相聚共下。到了1985年，又過因為麟洛這搭仔無幾安寧，像有麼个無形个在該作怪？經過在地耆老祭拜請示後，再過增加一隻伯婆共下來服祀，就變成一隻伯公廟裡肚有兩個伯公、一個伯婆，三神共祀个奇景。
到了2019年再過改建个時節，就摎伯公廟徙到一樓來，偎兼在地鄉親，也分居民做得方便拜伯公，這擺正正式摎佢安名做「生鬚福德廟」。
講乜奇怪，作者本人自做學校先生開始，就在桃園中壢新街个新街廟（仁海宮）旁脣个新街國小服務到今有36年了，從來就毋識來到屏東麟洛這位，今年第一擺來到這位，恁多伯公廟就無落去，就看著這隻生鬚伯公已有緣，無想著，佢乜同建廟200週年个新街廟（仁海宮）恁有緣，獨獨千里來相會，分行遍臺灣各地滿哪尞个𠊎最先看著佢。
感謝麟洛「生鬚福德廟」主任委員華珮辰个熱心協助說明，摎中壢「仁海宮」董事長王介禧等團隊个用心經營，分𫣆俚兜看著客家先民在臺灣各地个虔誠信仰，滿哪仔做得發光發熱，分大家做得感受深深个客莊人情味。
註釋
（註1）明朝末年至清朝初年，鎮平縣尚屬廣東潮州府管轄，嘉應州是在清朝雍正11年（1733年）才正式設立的。
（註2）清康熙23年（1684）納入清朝版圖，明鄭時期來臺灣的漢人全數被遷回中國大陸。
華語
來到臺灣尾，臺灣最南邊的屏東縣麟洛鄉客家庄，看見有一座土地公廟叫做「生鬚伯公」，感覺挺有趣，就進去走走看，看是長什麼鬚？不看不打緊，一看不得了，廟裡面有各路神佛一起來聚會湊熱鬧，神桌上面擠得滿滿滿，連中壢新街的仁海宮媽祖娘娘也來湘。
生鬚伯公，根據廟裡牆壁上的沿革誌記載，祂是在明朝末年的時候，有一個跟著國姓爺鄭成功來臺灣，擔任明鄭軍隊運糧官的廣東嘉應州鎮平人徐俊良，來到麟洛這裡，發現這裡的水草豐美，非常適合耕作。因此，在回去故鄉之後，於1698年（清康熙37年）再將自己親族子侄徐蘭桂、徐吳福等帶來麟洛開庄挖圳，引水耕作。
後來，在地居民為了感念徐蘭桂、徐吳福等帶領他們開墾本地的功勞，就在水圳旁邊的榕樹下，立石為碑，將徐蘭桂奉為伯公，設立伯公廟來祭拜，又因為伯公廟後的榕樹有很多細細的氣生根，看起來很像長了鬍鬚一樣，就將祂叫做生鬚伯公；另外在六雅街那邊，也一樣立碑為祠，奉徐吳福為伯公。
到1968年時，因為要建市場給在地居民買賣農產與生活用品使用，生鬚伯公廟被人改建變成兩層樓的建築，改叫做「三角坪伯公」。從此，一樓變成農會辦公室，二樓才是伯公廟，居民要拜伯公時，還得提著牲儀、金香，爬上二樓上面去才能夠拜得到伯公。這樣，對老人家與行動不大方便的人來說，就很不方便了。
後來，因為六雅街那邊的道路要拓寬，就又將徐吳福伯公移到生鬚伯公這裡來與徐蘭桂伯公相聚在一起。到了1985年，又因為麟洛這一帶地方不太安寧，像有什麼看不見的在那裡作祟？經過在地耆老祭拜請示後，又再增加一個土地婆婆一起來奉祀，就變成一個伯公廟裡面有兩個土地公、一個土地婆，三神共祀的奇景。
到了2019年再次改建時，就將伯公廟遷到一樓來，親近在地鄉親，也給居民可以方便祭拜土地公，這次才正式將祂命名做「生鬚福德廟」。
說也奇怪，作者本人自當學校教師開始，就在桃園中壢新街的新街廟（仁海宮）旁邊的新街國小服務到今有36年了，從來就不曾來到屏東麟洛這裡，今年第一次來到這裡，這麼多土地公廟都沒進去，就看見這個生鬚伯公很投緣，沒想著，祂也與建廟200週年的新街廟（仁海宮）如此有緣，獨獨千里來相會，讓走尋臺灣各地到處遊賞的我首先看到祂。
感謝麟洛「生鬚福德廟」主任委員華珮辰的熱心協助解說與中壢「仁海宮」董事長王介禧等團隊的用心經營，讓我們看見客家先民在臺灣各地的虔誠信仰，到處都能夠發光發熱，讓大家能夠感受深深的客庄人情味。
