文／張秀娥
桃園市中壢區人，社區關懷據點、國中小客語支援教師，感謝邱鴻春先生指導客語寫作（四縣腔）
一通電話打來，恁熟事个聲音，原來係搬走歸十年，久無見面个老鄰舍，愛湊𠊎參加部桃病院，舉辦个糖尿病病友會一日个遊尞。
時間來到這日，一大早拚大水，去病院集合有一段路程，就煞煞喊敬老計程車，電話該頭總係回講「忙線中」，壞咧！無就儘採喊一台，乜係共樣个情形，看等時間一分一秒過去，就強強會赴毋掣，高不將著起水衣趕去坐巴士，恁孤盲一台一台咻過去無停，原來係上班、上課時間，看著無像勢，就遽遽自家騎車仔，一路飆等去，鄰舍朋友遠遠看著𠊎手擛哩又擛，總算安心上車了！
車頂坐等淰淰个人，還有醫護人員，在行政人員个紹介，正知辦這活動，尤其係病友性質个活動，來來去去愛花加倍个時間、精神，經過幾下隻月个準備，最尾正確定今晡日个日仔。
坐在車頂，看等大水潑在窗門項，窗外个景色變到花剌必駁，帶團後生人個個生著得人惜，可能看著大家恬恬，就開始講笑話、揣令仔、弄把戲，歸車人笑到大嫲聲，試著異生趣好搞。
搞啊搞，毋多知車仔駛到第一隻景點，這係新北市五股區，最早開發个休閒生態農場，經過導覽先生解說，正知這頭家為著感念阿姆，在二十年前開始規劃，將五股有名个垃圾山，打造變到非常靚个花園，帶來地方个繁榮。
園裡肚有一口當淨个陂塘，係有年代个自然生態陂塘，聽講還係人工做个，這頭家實在有眼光乜異用心。園肚還有畜頭牲，乜有蟲蚩、大蛇哥、狗嫲蛇，大大細細个動物照顧到盡好，讚嘆上天創造个神奇生命，分人帶來無限个歡樂摎趣味。
哇！鼻著恁香个味緒，原來毋多知仔愛準備食晝哩！食飯前愛先驗血糖，大家乖乖伸出手指，可能平常驗慣哩，目珠全無眨一下，驗好就開始食飯，係用自助个方式，經過特別个營養調配，儕儕兜等歸大盤食淨淨，這滿正知，原來這症頭，乜做得食到飽肚又歡喜，食飽飯大家坐等打嘴鼓分享、交流，半點鐘過又再驗加一擺血糖，了後又帶去大草坪搞「歕茶箍波」，企到脣項看這群大細人仔，搞起來乜像三歲子，異生趣有意思。
下晝愛轉以前，還有去一間賣糕餅个店仔，人講有捨就有得，盼得分人食，人客就敢放勢買，擐轉屋下做等路，大人細子暢到歡喜靂天！
短短一日个遊尞，帶分大家難忘个歡笑，期待明年大家再過來相會結善緣，感謝醫護人員歸路个關心同照顧，還過辛苦同𠊎兜做伴个所有人員，感謝！承蒙！
華語
一通電話打來，好熟悉的聲音，原來是搬走幾十年，久沒見面的老鄰居，想邀我參加部桃醫院，舉辦的糖尿病病友會一日遊。
時間來到這天，一大早傾盆大雨的天氣，去病院集合有一段路程，就趕忙撥叫敬老計程車，電話那端總是回說「忙線中」，糟了，要不就隨便叫一台，也是一樣的情形，眼看著時間一分一秒過去，真的就要來不及了，不如穿上雨衣趕去坐巴士，結果一台一台的咻過去都沒停，原來是上班、上課時間，看著不對勁，就狂奔騎上車，一路飆著去，鄰居朋友遠遠看到我，手揮了又揮，總算安心上車了！
車上坐著滿滿的人，還有醫護人員，在行政人員的介紹，才知辦這活動，尤其是病友性質的活動，來來去去要花加倍的時間、精神，經過幾個月的準備，最後敲定了今天的日子。
坐在車上，看著雨水潑在窗門上，窗外的景色變得花花綠綠，帶團年輕人個個長得可愛，可能看到大家靜悄悄，就開始講笑話、猜謎語、耍把戲，全車人笑個不停，覺得蠻有趣好玩。
玩呀玩，不知不覺車子來到第一個景點，這是新北市五股區，最早開發的休閒生態農場，經過導覽先生解說，才知這園主為了感念母親，在二十年前開始規劃，將五股有名的垃圾山，打造變成非常漂亮的花園，帶來地方繁榮。
園內有一口非常乾淨的水池，是有年代的自然生態埤塘，聽說還是人工做的，這園主實在有眼光也很用心。園內還有飼養牲畜，也有昆蟲、大蟒蛇、蜥蜴，大大小小的動物照顧得很好，讚嘆上天創造的神奇生命，給人帶來無限的歡樂趣味。
哇！嗅到好香好香的味道，原來不自覺地到準備用午餐的時間了！用餐前要先測血糖，大家乖乖伸出手指，可能平常測習慣了，眼睛全沒眨一下，測好就開始用餐，是採用自助方式，經過特別的營養調配，個個端著整大盤吃得乾乾淨淨，這才了解，原來這病症，也可以吃的飽足又歡喜，飯後大家坐著聊天彼此分享、交流，半個鐘頭過去又再測一次血糖，之後又帶去大草坪玩「吹泡泡」，站在一旁看著這群大小孩，玩起來也像三歲孩子，真有趣有意思。
下午要回家之前，還有去一家賣糕餅的店舖，人說有捨就有得，捨得給人吃，客人就敢拼命買，提回家做伴手禮，大人小孩再高興不過了！
短短一日的遊玩，帶給大家難忘的歡笑，期待明年大家再來相會結善緣，感謝醫護人員全程的關照，還有辛苦陪伴的所有人員，感謝！
