文／邱鴻春，客語文薪傳師，桃園楊梅 伯公岡客家人（海陸腔）
雖然毋係共根生
互相偎凴無相爭
苦楝空心榕補強
向天開洋長年青
相傳三國个魏文帝曹丕，因為毋甘願老弟曹植个文學才華比佢慶，就下令要求佢，在七步之內愛做一首詩，係無就愛摎佢處死。曹植用煮豆仔來做題材，寫出《七步詩》：「煮豆燃豆萁，豆在釜中泣，本是同根生，相煎何太急！」
現今社會亂象當多，輒常會看著新聞，講哪位有兄弟仔冤家、相㓾鬥打个情形，做爺哀儕實在就痛斷腸！今餔日來到民生陂陂塘䃗行行運動一下，看著這叢苦楝樹个肚膁仔這位，生等一叢嶄蠻靚个榕樹，本來想講壞淨淨咧，這苦楝樹係毋係會分榕樹尖死忒去，行兼去摎佢認真看一下，發現著苦楝樹樹心，已經係臭心空殼忒，好得有榕樹在這生根落去，根已經直直透到地泥下去，也變到像樹身樣咧，兩儕互相偎凴扶持，經過幾下擺个風搓，還係完全無受影響，本本企到在在正正，無斯早就斷忒、橫忒，甚至死忒咧！
人愛煞猛並多結善緣，冥冥之中自然會有貴人相助，「莫因為善小而不為，莫因為惡小而為之」，戇戇仔做著个事情就著咧。相信這叢苦楝樹就有發揮佢个能力，正有機會結善緣，明明知自家已經係空殼咧，可能做得生存下去个時間無當多咧，還係煞猛認真，刻耐仔做好自家本分，吸收養分食飽來，正做得開花結子傳代下去，無想著嗄餳著鳥仔來食苦楝子，無意中帶來榕樹子，又堵堵好跌到樹空个泥粉裡肚去，加上露水、雨水个滋潤，就恁樣慢慢仔生芽長大，正會有這下看著个「公不離婆，秤不離砣」个情景，仰般个和挼呀。
由此可見，做一件著个事情，當有可能還有附帶無想著个正面效果，像苦楝樹樣，哪知會有鳥仔，來到這瘦弱个身項屙屎種榕樹，正有機會返生起來。顛倒過來，若係做了一件壞个事情，為了驚分人知著，往往就會做還較多壞个事情來掩磡，就會有連連續續無好个事情發生，平平係過日仔，相信儕儕都希望有好个事情發生，就算無好个事情，乜毋好有壞个事情發生，該就愛看自家仰般來做咧唷！
華語
雖然不是同根生
互相依靠不相爭
苦楝空心榕補強
向天開展長年青
相傳三國的魏文帝曹丕，因為不甘心弟弟曹植的文學才華比他好，就下令要求他，在七步之內要做一首詩，若做不到就要處死。曹植用煮豆子來做題材，寫出《七步詩》：「煮豆燃豆萁，豆在釜中泣，本是同根生，相煎何太急！」
現今社會亂象很多，時常會看到新聞，報導哪裡有兄弟吵架、打架鬥毆的情形，做父母的實在是肝腸寸斷！今天來到民生陂陂塘岸上走走運動一下，看到這棵苦楝樹的樹身中間這裡，長了一棵很漂亮的榕樹，本來以為完蛋了，這苦楝樹是不是會給榕樹擠到死掉了，走靠近仔細看了一下，發現這苦楝樹樹心，已經是壞死空心了，還好有榕樹在這長根進去，根已經一直長到地下去了，也變成像樹幹一樣了，兩者互相依靠扶持，經過好幾次的颱風，還是完全沒受影響，依然的挺立站著，不然早就斷掉、倒掉，甚至死掉了！
人要認真並多結善緣，冥冥之中自然會有貴人相助，莫因為善小而不為，莫因為惡小而為之，按部就班做對的事情就對了。相信這棵苦楝樹就有發揮它的能力，才有機會結善緣，明明知道自己已經是空殼了，可能可以生存下去的時間不是很多了，還是勤奮認真，忍耐著做好自己本分，吸收養分吃飽來，才可以開花結果傳承下去，沒想到卻吸引鳥來吃苦楝樹果子，無意中帶來榕樹種子，又剛剛好掉到樹洞的粉塵裡面去，加上露水、雨水的滋潤，就這樣慢慢的發芽長大，才會有現在看到的孟不離焦，焦不離孟的情景，那麼的和樂呀。
由此可見，做一件對的事情，很有可能還有意想不到的其他正面效果，像苦楝樹這樣，哪裡知道會有鳥，來到這瘦弱的身上排便種榕樹，才有機會起死回生。相反的，如若做了一件壞的事情，為了怕給人知道，往往就會做更多壞的事情來掩蓋，就會有連續不好的事情發生，同樣是過日子，相信每個人都希望有好的事情發生，就算沒有好的事情，也不要有壞的事情發生，那就要看自己如何來做了喔！
