文／李文煥，苗栗縣客家人，國中特教教師，現下戴苗栗（四縣腔）
行過二十年个教書路程，有幾隻學生仔分𠊎印象當深。佢兜分人喊做「白子」，也就係白化症（註）。犖花个日頭花對佢兜來講，就像𥍉爧恁晟眼，燒暖个日頭對佢兜來講，就像㸐人个煙桁。其實正經分佢兜感覺困難个，毋係這兜生成个限制，係外背射來个異樣目光。
若係巡迴教學个新名單有白子个學生仔出現，𠊎定著會安排去入班特教宣導，還過對全校進行一道公開个說明，盼望做得為這兜細人仔，在校園裡肚紡一張更加友善、更加包容个網。。在宣導个時節，𠊎會準備一盒淰黃个雞卵，裡背䟓䟓放一粒雪白个雞卵。
「各位同學，先生手項這盒雞卵，有看著麼个特別个無？」𠊎大聲个問。學生仔會講：「該一粒白雞卵當明顯！」𠊎續下來問：「好，恁樣請問大家，這兜黃殼个係雞卵，該粒白殼个係麼个呢？」學生仔會應：「當然也係雞卵啊！」𠊎笑笑仔講：「係啊，毋管厥殼係黃色，抑係白色，敲開來全全係雞卵。白雞卵這下看起來特別，係佢在一堆黃雞卵裡肚顯出來，反轉來，係講放一粒黃雞卵在白雞卵裡肚，黃雞卵共樣乜會分人看現現。」
前一駁仔，一個當久無聯絡个白化症學生打電話來，佢用會噭會噭个聲講：「先生，吾細人仔……吾細人仔，乜係白化症仰結煞？」𠊎恬恬仔聽等，電話筒肚傳來个，毋單淨係做阿爸个愁慮，還有一種怨怪自家个艱苦。佢在讀大學个時節，堵著共樣係白化症个學妹，兩粒相像个靈魂像兩粒互相餳著對方个星仔，在共下个世界肚尋著溫暖。𠊎還記得，佢兜識帶等幸福个笑容對𠊎講：「先生，𠊎兩儕係「小白兔（two）喔！」該央時，日頭照在佢兜白白个頭那毛，像鑲一層金那那仔个光。
回憶像浮雲掠過，𠊎黏時對等電話講：「大戇牯仔，老古人言：『白雞嫲生烏雞卵——無道理。』若細人仔摎你共樣有白色个頭那毛同膚身，正係正常个啊！係講若細人仔無像你兩公婆，係毋係還較奇怪呢？細人仔傳承著你兜个樣仔，也定著會傳承著你兜个堅韌同善良。將來，佢定著會因為有你這隻勇敢个阿爸，感覺十分个驕傲。」電話該片恬肅肅仔，像時間也停忒共樣，包尾聽著佢笑笑仔講：「先生，𠊎知了！」
這兜像白雞卵个細人仔，佢兜个純真摎堅強，總係深深撼動著𠊎个心。雖然佢兜外表有一息仔特殊，但係心肝比水晶還較通透。盼望這世界做得用更加軟个心來對待佢兜，好分佢兜个笑容，像春天个花恁樣，自由自在个開花。」
（註）：一種遺傳性疾病，因身體無法正常製造或分佈黑色素而引起。患者通常皮膚、頭髮、眼睛顏色淺，對陽光敏感。最主要影響是視力問題，如畏光、眼球震顫和視力低下。它不影響智力，但患者需應對外觀和視力帶來的挑戰。
華語
走過二十年个教書生涯，有幾個學生仔讓我印象很深。他們被人叫做「白子」，也就是白化症。稀疏的陽光對他們而言，就像閃電那樣刺眼，和煦的太陽對他們而言，就像燙人的排氣管。其實真正讓他們感覺困難的，不是這些天生的限制，是外在射來的異樣目光。
如果巡迴教學的新名單有白化症的學生出現，我一定會安排去入班特教宣導，還有對全校進行一次公開的說明，盼望能夠為這些小朋友，在校園裡織一張更加友善、更加包容的網。在宣導的時節，我會準備一盒鮮黃的雞蛋，裡頭特地放一粒雪白的雞蛋。
「各位同學，老師手上這盒雞蛋，有看到什麼特別的嗎？」我大聲的問。學生們會說：「那一粒白雞蛋很明顯！」我接著問：「好，那樣請問大家，這些黃殼的是雞蛋，該粒白殼的是什麼呢？」學生們會回應：「當然也是雞蛋啊！」我笑笑仔講：「是啊，不管他的殼是黃色，或是白色，敲開來通通是雞蛋。白雞蛋現在看起來特別，是他在一堆黃雞蛋裡頭顯出來的，反轉來，若是放一粒黃雞蛋在白雞蛋裡面，黃雞蛋一樣也會讓人感到顯眼。」
前一陣子，一個很久沒有聯絡的白化症學生打電話來，他用快哭快哭的語氣講：「老師，我的小孩……我的小孩，也是白化症無怎麼辦？」我靜靜的聽著，電話筒裡傳來的，不只是做阿爸的愁慮，還有一種怨怪自己的難過。他在讀大學的時候，遇到同樣是白化症的學妹，顆粒相像的靈魂像兩顆互相吸引的星仔，在共同的世界裡尋著溫暖。我還記得，他們曾經帶著幸福的笑容對我講：「老師，我們倆是「小白兔（two）喔！」那時候，陽光照在他們白白的頭髮，像鑲一層金黃的光。
回憶像浮雲掠過，我立既對著電話講：「大傻瓜，老古人說：『白母雞生黑雞蛋——沒道理。』你的小孩和你一樣有白色的頭髮和皮膚，才是正常的啊！如果你的小孩不像你兩夫妻，是不是更加奇怪呢？小孩傳承到你們的樣貌，也一定會傳承到你們的堅韌與善良。將來，他一定會因為有你這個勇敢的阿爸，感覺十分的驕傲。」電話那邊肅靜無聲，像時間也停止一樣，最後聽到佢笑笑仔講：「先生，我知了！」
這些像白雞蛋的小朋友，他們的純真和堅強，總是深深撼動著我的心。雖然他們外表有一點點特殊，但是心靈比水晶還要通透。盼望這世界能夠用更加柔軟的心來對待他們，好讓他們的笑容，像春天的花恁樣，自由自在的綻放。」
