文／劉興家
中壢老街溪脣舊明里水頭伯公下係𠊎兜兄弟姊妹个胞衣跡，三歲子就曉得講客家話四縣腔、華語摎學老話，這滿戴桃園學老庄。承蒙邱鴻春先生指導。
輒常聽別人講愛去中國毋使坐飛機，金廈小三通，在金門水頭碼頭坐船過去盡遽半點鐘仔就到廈門咧！毋單淨遽，機票錢摎坐船鬥起來毋會超過三千箍，一般來講台灣本島係坐飛機直接坐到廈門機場愛萬三箍，做得講加盡省錢，心肝肚恁樣想盡久咧。
該年个十月中仔風搓季節過忒咧，海面上也毋會起大波浪，兩公婆湊等桃園坐火車到台北。過坐捷運轉兩擺車到松山機場了後，等頭枋班機到金門。行李領著煞煞包計程車到水頭碼頭，這水頭碼頭係摎廈門五通碼頭對駛个碼頭。旅行嗬！就係愛體驗當地个風土人情，下計程車該央時有幾儕个手擐等高梁酒講代佢兜帶過廈門會得佣金。驚死人，𠊎正無愛，係毋堵好分人捉去關愛仰結煞呢？
來往金門摎廈門个交通船異大輛，也可能無麽个風浪个關係，坐起來真穩當舒適，恁大輛个船分人做兩棧，頂高棧係商務艙，價數較高，下背棧經濟艙較便宜，上下棧鬥起來做得坐三百儕，雖然係頭枋船，唷！毋成猴，坐會淰哩喲！
船仔行有成二十分鐘仔，有台商喊會到哩喲！台胞證愛準備好勢。𠊎在背包裡肚拿出兩公婆个台胞證摎護照共下放个皮包仔，想放在褲袋後背，當時緊搐搐仔無放落褲袋肚嗄跌落船艙个位仔頂，位仔摎位仔中央有隔枋隔開，企起來根本就看毋著𠊎坐過位仔頂个東西；𠊎轉身愛離開个時節看著地泥有一隻盡像吾餔娘戴過黃色个嘴落仔，𠊎想這干𠊎麼个事，黏時有一隻毋知哪位傳過來个聲「愛拈起來」𠊎愐著盡像神明个聲，𠊎跍落去拈个時節正看著跌落位仔頂个皮包仔裝等護照摎台胞證，驚一下膽核險爆忒去。感謝神明！
事後𠊎回想這件事，係無拈轉來，毋單淨過海關毋得，還愛摎共產黨官廳請過新个護照、台胞證，使兜仔錢小事情，現現就定動毋得乜哪也去毋成，連戴旅館也無證件分佢登記，當然四日个廈門行程也打水漂仔去淨淨咧！
經過這件事了後，𠊎見凳仔頂企起來定著會斡頭看一下位仔，不管有東西無東西定著愛較抽間兜仔，正經係一擺就「教精人」。
華語
常聽說需要往來中國不必只有飛機的選擇，可透過金廈小三通在金門水頭到廈門五通碼頭只要三十分鐘，不僅可省下一大筆，一般從台灣本島坐飛機到廈門需要一萬三千元之機票錢，金廈小三通卻只要不到3000元就可搞定，這個大膽嚐試已埋藏心中很久。
那年十月中旬颱風季節已遠離，正是秋高氣爽的旅遊的好日子，兩夫妻從桃園搭火車到台北轉兩次捷運到達松山機場坐第一班飛機前往金門，領完行李趕緊攔計程車前往水頭碼頭，蓋水頭碼頭正是對岸廈門五通碼頭對開的碼頭，遊遊嘛！就是要體驗當地風士人情，下了計程車立馬就有好幾組人馬圍上來要求幫忙帶高梁酒過廈門，還說到廈門就會有人接您並付出佣金，嚇死人！我才不幹，如果不小心被捉進監牢怎麼辦？
往來金廈交通船噸位大，可能也是風浪小的關係，坐起來頗為舒適，這麼大的交通船分做上下兩層，上層係商務艙，價格偏高，下層經濟就較廉，上下兩層略約有三百個座位，雖然是當日首班，真沒想到，乘客還蠻多的，幾乎滿座。
開船後略約20分鐘左右，有台高商稱快到五通碼頭了，要將台胞證備妥，我很習慣的在背包取出我兩夫妻夾在一個皮夾的護照及台胞證，順勢放在屁股上的後褲袋以方便取出查驗，誰知急急忙忙中沒放進褲袋卻落在座位上，因為兩座位中間有隔板，起身時未見落在座位上的皮夾。當我轉身時瞄見地上有有一個疑似我老婆帶過的黄色口罩；當時心裡想那干我何事！可是立馬感覺到有一個聲音提醒我「撿起來吧！」於是我彎下腰撿，卻看到那夾著兩本護照及台胞證的皮夾直挺挺的躺在座位上，啊！好家在，這時已嚇破膽了！
事後想這件事，如果皮夾沒有撿回來，不只過不了海關，還得在先在共產黨官方重新申請護照及台胞證，花錢事小，卻造成哪兒也去不了的窘境，就連旅館checin都無法完成，當然四日廈門旅遊也就泡湯了。
歷經這個教訓以後，每當我在椅子上起身的時候都會很習慣地回頭一望，以免誤事。因為「不怕百步遠，只怕一不險」啊！
