文／林淳華
戴台中市豐原區學老人，在東勢學大埔客語，研究過北埔客家文化，感謝大埔客語先生羅月鳳、北埔文史工作者陳紹忠指導。
新竹縣北埔鄉大坪國小个育英樓毋單淨係一棟建築，佢乜係當年木造結構建築个盡尾一棟，《來自土地个建築：北埔大坪國小育英樓》毋單淨係一本書，佢乜紀錄著當多人煞猛打拚爭取育英樓變做歷史建築个過程。
大坪國小教室出現在1986年柯一正導演拍个「我們都是這樣長大的」電影裡肚，在2020年該當時，學校因為育英樓當老咧，想愛拆這間禮堂，無想著，刺激社區居民調查育英樓起屋个歷史，居民訪問起屋个師傅了後，阿姆哀！育英樓保留咧當年北埔木造構建築當多个特色，該當時北埔戲院、校舍這兜个木造結構建築都毋見撇，單淨伸育英樓。
𠊎識跈緊北埔鄉調查文史个陳紹忠做田野調查，佢用海陸腔訪問大木結拜八兄弟个屋家人，乜帶領大坪國小學生到北埔老師傅个屋家，送感謝卡分建築師陳雲翔、監造羅文相个餔娘，老師傅个餔娘都九十零歲咧，看著恁多个小學生，當歡喜。佢乜邀請泥水師傅劉連勝、釘桌凳个羅石松到學校，學生送厥等感謝卡，老師傅試著學生个感恩，無枉費當年起屋、做桌凳个苦心。
泥水師傅劉連勝今年九十二歲咧，佢同厥倈毋識讀過大坪國小，毋過，佢用泥水打育英樓个地基，分師生有當砸个禮堂好使用，佢認為當有意義。佢係北埔有名个老師傅，篤篤實實，毋會偷工減料，當年佢打地基時，禮堂愛用个木材，提早一年就放在操場邊脣準備好勢，該當時學校尞避暑，佢帶緊五到十人，照緊沙、石頭、紅毛泥个比例，攪共下打地基。
仰脣講育英樓係歸社區𢯭手起个？因為起屋該滿，學校先生會在朝會結束、第二節下課該滿，還係上無影響課業課程个時節，帶緊學生到橋下搬石頭，有用接龍方式，乜有一個人搬，當年搬過石頭个校友，對這禮堂都當有感情！
建築師徐嘉明乜係學校个家長，佢發現，屋頂樹料毋係一般建材行買得著，因為毋係裁四角形，係保留樹材个紋路。佢觀察，該禮堂二樓窗門盡多，一樓偎地泥有氣窗，係配合山區濕氣重，愛分空氣對流；所有管線放在建物牆壁外背，係方便修整，因為山區水電管線修整無方便。
1969年，育英樓起屋之時，北埔老師傅同社區居民共下來起。2023年，登錄為新竹縣歷史建築，2024年出書，寫出大家共下做訪問，在網路項做連署行動。育英樓起屋同保留都係對民間起勢，乜歡喜看著公家單位來𢯭手同支持。
華語
新竹縣北埔鄉大坪國小的育英樓不只是一棟建築，它還是當年北埔木構建築的最後一棟；《來自土地的建築：北埔大坪國小育英樓》不只是一本書，它還紀錄許多人千辛萬苦爭取育英樓成為歷史建築的過程。
大坪國小校舍曾經出現在1986年柯一正導演拍攝的「我們都是這樣長大的」電影中，在2020年時，校方因育英樓禮堂建築老舊，想要拆除這座禮堂，沒想到激發社區居民考查育英樓興建時的歷史，訪談匠師之後，不得了，育英樓保留許多當年北埔木構建築的特色，當年北埔戲院、學校的木構建築都不見了，只剩下育英樓。
我曾經跟隨北埔鄉文史工作者陳紹忠做過田調，他以海陸腔客語訪談大木結拜八兄弟的家屬，並曾帶領大坪國小學生到北埔匠師的家裡，跟建築師陳雲翔、監造羅文相的家人致上感謝卡，匠師太太們都已九十多歲，看到那麼多小學生造訪，相當高興。也曾邀請泥水師傅劉連勝、製作課桌椅的羅石松到學校，學生親自送上感謝卡，老師傅看到學童的感恩，不枉當年蓋校舍的苦心。
泥水師傅劉連勝今年已經92歲了，他和兒子都不曾念過大坪國小，但是他以泥水打下育英樓地基，讓師生有堅固的禮堂可以使用，認為非常有意義。他可是北埔鄉家喻戶曉的老師傅，盡責務實，從不偷工減料。當年他在打地基時，禮堂需要的木構建材，早在一年前就已經放在旁邊備料，那年暑假，他就帶領五到十人開始依照沙、石頭、水泥的比例，攪拌泥水鋪地基。
為何說育英樓是整個社區幫忙興建呢？因為建造時，老師會利用朝會結束、第二節下課時，或是比較不影響課業的課程，帶領學生到橋下搬運石頭，有接龍，有單獨搬運，當年搬運卵石的校友對於這座禮堂都非常有感情！
身為學生家長的建築師徐嘉明發現，屋頂木材不是一般建材行所買到，因為不是切成四方形，而是保留原木的紋理。他觀察該禮堂二樓窗戶特別多，甚至一樓靠近地面還有氣窗，就是配合山區濕氣重，要讓空氣對流，所有管線外露，就是利於維修，解決山區水電管線維修的不便。
1969年，育英樓興建時，動員北埔匠師和社區居民，2023年，登錄為新竹縣歷史建築和2024年出書時，群策群力做訪談和進行網路連署行動，育英樓興建和保留都來自民間，也樂見公部門的協力支持。
