文／劉淑娟，客語支援教師，新竹縣竹東客家人，這下戴新竹市（饒平腔）
前駁仔，一條「創意私房」个新聞，分𠊎試著發痴驚。
有兜人講：「這毋單淨係一條新聞，係一面鏡仔，照著社會个面皮。」𠊎輒常問自家：𫣆俚个社會敢係發病了？仰會有人做恁積惡、夭壽个事情？
一個拗蠻有名聲个男仔人，利用權勢摎機會，翕人个「私密」相片，分人翕个斯正十過歲子定定呢！佢自家也有細人仔。包尾調查著毋單淨佢一儕人做這種事情。佢兜隻隻生來恁斯文，其實係好頭好面臭屎胐，隻隻面皮皮，正經想毋解？佢兜仰毋驚自家个爺哀、世細分人呸口涎水？
屋下教子，爺娘一句話、一隻動作，都會對細人留下嶄蠻大个影響。大人話著細人還細聽毋識，其實佢兜總係跈在大人屎朏尾學樣啊。人講个：「大鬼無好樣，細鬼仔照樣。」毋單淨係家庭，像公司等職場環境也共樣。若係頭家講話無重輕，做事無規無矩。下背个人，自家就會跈樣。像人講个：「家娘無好樣，心臼跈和尚。」所以大人若愛細人變好，就愛自家先行正。
頭擺，學校个課本無教，上早，世大人也罕得講。總係講：「𫣆俚愛有禮貌、愛知人我……。」𫣆俚會講分數、講升學、講成績，毋過基本个「尊重人」嗄無教，好得經過前駁該條大新聞，學校、爺哀也開始學精了，開始教性別平等、愛敢拒絕个觀念，大聲講：「𠊎無愛、做毋得等等。」
𫣆俚个社會愛變好，愛從小事情開始改變。攝影機毋係做毋得用，手機也毋係問題，問題係𫣆俚愛仰般來用？你有權、有資源个時節，你還較愛記得：「人在該做，天在該䀴。」
𠊎希望，經過這件事情之後，毋會有人再過問受害人「你戇仔乜？仰毋早兜講？」，顛倒愛講「承蒙你講出來，𠊎支持你」。𠊎希望有一日，細人仔做得勇敢講：「你做毋得凴著𠊎」，大人就知這句話个意思。
尊重毋單淨係一隻詞，係一種行動；教育也毋單淨係一本課本，乜係逐日个態度。
華語
前陣子，有一則「創意私房」的新聞，讓我看了真是又氣又驚。
有人說：「這不只是一則新聞，更像是一面鏡子，照出了社會的臉孔。」我常常在心裡問自己：我們的社會是不是病了？為什麼會有人做出那麼惡劣、喪盡天良的事情？
一位非常很有名氣的男子，竟然利用權勢和機會，偷拍別人的「私密」照片，而且對象竟然還是未成年！他自己也有孩子啊。最後的調查發現，做這種事的，不只他一個。他們一個個看起來文質彬彬，其實骨子裡是爛透了。這些人臉皮到底有多厚？他們難道都不怕自己的父母、孩子將來被人唾棄嗎？
在家庭中教養孩子，父母的一句話、一個動作，都會在孩子心中留下很深的影響。大人常以為小孩聽不懂、看不明白，但其實他們一直在模仿大人。俗話說：「上樑不正下樑歪。」這不只是在家庭裡，在公司、職場也是一樣。如果老闆說話不分輕重，做事沒規矩，下面的人自然也會照樣學。正如那句話：「婆婆不端莊、沒好榜樣，媳婦也會跟著學壞。」所以，大人若希望孩子變好，就得自己先做好榜樣。
以前，學校的課本沒教這些，過去的大人也少提這類觀念。只會說：「要有禮貌、要懂事……」我們會談分數、談升學、談成績，但最基本的「尊重他人」，卻沒有人教。幸好這次新聞事件過後，學校與家長終於開始學乖了，開始教孩子性別平等、學會說「不」、懂得拒絕，更大聲地說：「我不願意，你不可以這樣。」
我們的社會要進步，就要從小事開始改變。攝影機不是不能用，手機也不是問題，問題是：我們該怎麼使用？當你有權、有資源的時候，更要記得：「人在做，天在看。」
我希望，經過這件事後，沒有人再去責怪受害者「你是傻子嗎？為什麼不早點說？」反而要說：「謝謝你願意說出來，我支持你。」我希望有一天，孩子可以勇敢地說：「你不能這樣對我。」而大人會聽得懂這句話的意義。
「尊重」不是一個漂亮的詞，而是一種行動；「教育」也不只是一本課本，更是每天的態度。
